سۋرەتتى تۇسىرگەن ايباتىر نۇراش
اقساي قالالىق №8 جالپى ورتا ءبىلىم بەرەتىن مەكتەبى اتالعان ءبىلىم عيماراتىنا بىلتىر سالىنعان 100 ۇيلىك ارالتال شاعىن اۋدانىنىڭ بالالارى بارادى. مەكتەپ عيماراتى تولىقتاي زاماناۋي ۇلگىدە سالىنىپ, قاجەتتى كەرەك-جاراقتارمەن قامتاماسىز ەتىلگەن. مۇندا سپورت زالدارى, اسحانا, زەرتحانا كابينەتتەرى مەن شەبەرحانا, سونداي-اق شاعىن ورتالىق جۇمىسىنا ارنالعان ارنايى ورىندار اشىلعان.
وبلىس اكىمىنىڭ ورىنباسارى عابيدوللا وسپانقۇلوۆ بارلىق اتا-انالار مەن مۇعالىمدەردى, وقۋشىلاردى ايتۋلى وقيعامەن قۇتتىقتادى.
– ەلباسى بيىلعى جولداۋىنىڭ «ادامي كاپيتال – جاڭعىرۋ نەگىزى» اتتى جەتىنشى باعىتىندا ەلىمىزدەگى ءبىلىم بەرۋ سالاسىنا ەرەكشە كوڭىل ءبولىپ, بۇل ىستە وزىق جۇيەنى قالىپتاستىرۋ كەرەكتىگىنە توقتالدى. سونداي-اق «رۋحاني جاڭعىرۋ» باعدارلاماسىندا دا مەملەكەتتىڭ العا دامۋى تەك ءبىلىمنىڭ سالتانات قۇرۋى ارقىلى عانا مۇمكىن دەپ ايتىلعان. بۇل ورايدا وبلىس كولەمىندە اتقارىلعان اۋقىمدى ءىس كوپ. جىل سايىن ءبىلىم ساپاسىن كوتەرۋ, مۇعالىمدەردىڭ بىلىكتىلىگىن ارتتىرۋ باعىتىندا تىنباي جۇمىس اتقارىلىپ, جاڭا ءبىلىم بەرۋ نىساندارىنىڭ قۇرىلىسى جۇرگىزىلىپ جاتىر, – دەدى عابيدوللا وسپانقۇلوۆ.
وتكەن جىلى وڭىردە 24 ءبىلىم بەرۋ نىسانى سالىنسا, بيىل قاڭتار ايىنىڭ وزىندە جاڭادان 2 مەكتەپ پايدالانۋعا بەرىلدى.
قازبەك قۇتتىمۇرات ۇلى,
«ەگەمەن قازاقستان»
باتىس قازاقستان وبلىسى
