اگرارلىق ءوڭىر ءۇشىن بۇل ناعىز كەرەكتى قۇرال ەكەنى ايتپاسا دا تۇسىنىكتى. سوندىقتان دا ونى اقمولالىق كاسىپورىننىڭ وندىرىستىك قۋاتىمەن قۇراستىرىپ-جيناۋ جولعا قويىلماق. جەرگىلىكتى جەردىڭ كليماتتىق جاعدايىنا بەيىمدەلىپ جاسالاتىن «Amity» كەشەنىنىڭ العاشقى پارتياسىن قۇراستىرۋ بيىل ناۋرىز ايىنا جوسپارلانعان. بۇگىنگى تاڭدا اتالعان قۇرىلعىنىڭ 12 داناسىن قۇراستىرۋعا ارنالعان قۇنى 1,5 ميلليون اقش دوللارى تۇراتىن كەرەك-جاراقتارىن ساتىپ الۋ كەلىسىمشارتى جاسالعان. كاسىپورىننىڭ باس ديرەكتورى ولەگ ءبالىبيننىڭ پايىمداۋىنشا, وسى تەكتەس يننوۆاتسيالىق جوبالاردى جۇزەگە اسىرۋ ناتيجەسىندە نارىقتى جوعارى تەحنولوگيالى قۇرال-جابدىقتارمەن قامتۋعا ىقپال ەتىپ, وڭىردەگى اگرويندۋستريا الەۋەتىن ارتتىرۋعا جانە اۋىلشارۋاشىلىق تەحنيكالارىن جاڭعىرتۋعا جول اشىلادى. جالپى, «قازاقستان اگرو يننوۆاتسيالىق كورپوراتسياسى» جشس زاماناۋي كوپسالالى اۋىلشارۋاشىلىق, ارنايى جانە كوممۋنالدى تەحنيكالاردى شىعارۋشى كاسىپورىن سانالادى.
بۇگىنگى تاڭدا زاۋىتتا 78 ادام جۇمىس ىستەۋدە. اتالعان كاسىپورىن جىلىنا «PVP-351», «SHABYN» جيناۋ-پرەستەۋ تەحنيكاسىنىڭ 200 داناسىن, «پر-ف-145» «SHABYN» تەحنيكاسىنىڭ 600 داناسىن, بۇدان باسقا اسپالى جەر جىرتۋ قۇرالىنىڭ 150 داناسىن جانە وزگە دە قۇرال-جابدىقتاردى شىعارا باستاعانىن ايتا كەتۋ كەرەك. ارزان دا ساپالى تىركەمەلى جانە اسپالى اۋىلشارۋاشىلىق تەحنيكالارىن شىعارۋعا بەل بۋعان زاۋىت ەلىمىزدىڭ وزگە دە وڭىرلەرىندەگى كاسىپورىندارىمەن بايلانىس ورناتۋعا مۇددەلى. ءوز ونىمدەرىن ەلىمىزدىڭ كەز كەلگەن وڭىرىنە جەتكىزىپ بەرۋگە دە ءازىر ەكەندىكتەرىن ءبىلدىرىپ وتىر. ونىڭ ۇستىنە قازىرگى تاڭدا اۋىل شارۋاشىلىعىن دامىتۋ ماقساتىندا زاماناۋي جاڭا تەحنيكالار مەن قۇرال-جابدىقتارمەن قامتاماسىز ەتۋگە جانە ماشينا جاساۋ سالاسىن دامىتۋعا ارنالعان مەملەكەتتىك باعدارلاما جۇزەگە اسىرىلۋدا. بۇل رەتتە قۇرامىنا مەملەكەت پەن كۆازيمەملەكەتتىك سەكتور جانە اۋىلشارۋاشىلىق تەحنيكالارى مەن قۇرال-جابدىقتارىن ءوندىرۋشى كاسىپورىن وكىلدەرى كىرگەن جۇمىس توبى جۇمىس ىستەۋدە.
سونىمەن بىرگە ەلىمىزدىڭ ماشينا-تراكتور پاركىن جاڭارتۋ باعىتىندا بىرقاتار قادامدار جاسالىپ جاتىر. اۋىلشارۋاشىلىق ماشينالارىن جاساۋ جول كارتاسى دا ازىرلەنگەن. اتالعان جول كارتاسى قولدا بار ءوندىرىس قۋاتىن ارتتىرۋمەن قاتار, جاڭا ءونىم تۇرلەرىن شىعارۋعا دا مۇمكىندىك بەرەدى دەپ كۇتىلۋدە. جانە دە شارۋالاردى شەتەلدىك نۇسقالاردان بىردە-ءبىر كەم ەمەس وتاندىق ساپالى دا ارزان تەحنيكالارمەن قامتاماسىز ەتۋى ءتيىس.
وسى جۇمىستاردىڭ بارلىعى ەلباسىنىڭ بيىلعى جولداۋىندا ايتىلعان «اقىلدى تەحنولوگيالار» – اگروونەركاسىپ كەشەنىن قارقىندى دامىتۋ مۇمكىندىگى» اتتى ءۇشىنشى مىندەتپەن ۇشتاسىپ جاتىر. شيكىزاتتى قايتا وڭدەپ, الەمدىك نارىقتارعا جوعارى ساپالى دايىن ونىممەن شىعۋ – ۋاقىت تالابى. ونىڭ ۇستىنە بيىلدان باستاپ اۋىلشارۋاشىلىق تەحنيكالارىن ساتىپ الۋدى سۋبسيديالاۋدا باسىمدىق ەڭ الدىمەن وتاندىق ءونىم ونىمدىرۋشىلەرگە بەرىلەتىن بولادى.
اسقار تۇراپباي ۇلى,
«ەگەمەن قازاقستان»
اقمولا وبلىسى
