بيىل جامبىل وڭىرىندە بۇرىن-سوڭدى بولماعان قىس بولىپ, سارىشۇناق اياز ەلدى ابىگەرگە سالۋدا. ءتىپتى وبلىستىڭ مويىنقۇم, سارىسۋ, تالاس سەكىلدى شالعاي اۋداندارىندا كۇننىڭ سۋىقتىعى 30 گرادۋستان استى. كەيبىر اۋىلدارداعى مەكتەپتەردە ساباق توقتاتىلدى. بالالار تۇگىلى ەرەسەك ازاماتتاردىڭ ءوزىنىڭ جۇمىسقا بارىپ-كەلۋى قيىندىق تۋدىرىپ تۇرعان كەزدە سارىسۋ اۋدانى جاڭاتاس قالاسىندا قالا تۇرعىندارى ءۇشىن «تەگىن تاكسي» قايىرىمدىلىق اكتسياسى باستاۋ الدى.
اتالعان اكتسيا اۋداندىق «جاستار رەسۋرستىق ورتالىعى» مەكەمەسىنىڭ ينسپەكتور مامانى باۋىرجان بالعابايدىڭ باستاماسىمەن باستالىپ, جاڭاتاستىق جاستاردان قولداۋ تاۋىپتى. اۋەلى اكتسيانى ۇيىمداستىرۋشىلار جاڭاتاس قالاسىنداعى «ايگولەك» بالاباقشاسىنىڭ تاربيەلەنۋشىلەرى مەن ولاردىڭ اتا-انالارىن تۇرعىلىقتى مەكەنجايلارىنا جەتكىزۋ ءىسىن قولعا العان. ءسويتىپ ەل رازىلىعىنا بولەنگەن جاستار ءالى دە بۇل اكتسيانىڭ جالعاسا بەرەتىنىن ايتۋدا.
ايتا كەتەيىك, اتالعان شاراعا 7 اۆتوكولىك جۇمىلدىرىلعان ەكەن. اكتسيا بارىسىندا جۇزدەن استام ەرەسەك ازاماتتارمەن قاتار بالالار دا ۇيلەرىنە تەگىن جەتكىزىلگەن.
حاميت ەسامان,
«ەگەمەن قازاقستان»
جامبىل وبلىسى
