ماسەلەن, سەمەيلىكتەر الداعى ۋاقىتتا «InfoBus» ءموبيلدى قوسىمشاسى ارقىلى قالاداعى قوعامدىق كولىكتەردىڭ ءجۇرىپ-تۇرۋىن قاداعالاي الادى. بۇگىندە GPS-مونيتورينگى بار ينتەراكتيۆتى كارتانى 43 مىڭ سەمەيلىك قولدانىپ ءجۇر. قوعامدىق كولىكتىڭ قىزمەتىن باعالايتىن «BusReport» باعدارلاماسى تاسىمالداۋشىلار تاراپىنان جول بەرىلگەن بىرنەشە ماسەلەنى انىقتادى. ماسەلەن, بىلتىر قالالىق سوت بويىنشا «سەماۆتوپارك» جشس-ىمەن كەلىسىمشارت بۇزىلعان بولاتىن. بۇل اۆتوپارك قالا اۋماعىندا №5, 8, 10, 22, 24, 37, 43 جانە 45 باعىتتارىنا جۇرگەن ەكەن. بۇگىندە بۇل باعىتتار تەندەر كونكۋرسى وتكەنگە دەيىن «مۋساپيروۆ» جك مەن «تاكسوموتورلى پارك» جشس-نا ۋاقىتشا بەرىلدى. وبلىس باسشىسى دانيال احمەتوۆ وسكەمەن مەن سەمەيدەگى قوعامدىق تاسىمال قىزمەتىندەگى كەمشىلىكتەردى سىنعا العان بولاتىن. ءوڭىر باسشىسىنىڭ ايتۋىنشا, «تاسىمالداۋشىلار ون جىلدان اسىپ كەتسە دە, اۆتوبۋستارىن جاڭارتپايدى, بىراق جولاقىسىن ءوسىرۋدى سۇراۋعا بار». بىلتىر جەلتوقسان ايىندا سەمەيدە قالا تاسىمالى بويىنشا جاڭادان 20 اۆتوبۋس ىسكە قوسىلدى.
وبلىس اكىمىنىڭ ايتقان سىنى ورىندى, – دەدى سەمەي قالاسىنىڭ اكىمى ەرماك ءسالىموۆ, – 2015 جىلى كولىك جانە كوممۋنيكاتسيالار مينيسترلىگى «ەكى جىل وتكەندە تاسىمالداۋشى ءوز اۆتوبۋستارىن جاڭارتۋ كەرەك» دەگەن بۇيرىق شىعارعان ەدى. وكىنىشكە قاراي, تاسىمالداۋشىلارمەن بەكىتىلەتىن بەس جىل بۇرىنعى كەلىسىمشارتتا بۇل شارت كورسەتىلمەپتى. وبلىس اكىمى قوعامدىق تاسىمال قىزمەتىنىڭ ساپاسىن ءبىلۋ ءۇشىن سەمەيگە كەلىپ, اۆتوبۋستارعا وتىرىپ, قالانى ارالاپ كوردى. مىنە, جىلدىڭ باسىنان باستاپ اۆتوبۋس پاركىن جاڭارتۋعا وراي كونكۋرستىڭ تالاپ-شارتتارىن وزگەرتتىك. كونكۋرسقا دايىن بولۋ ماقساتىندا, ماسەلەن, «مۋساپيروۆ» جك ءوزىنىڭ 20 اۆتوبۋسىن جاڭارتتى. ولار №5, 8 جانە 22 باعىتقا جۇرەدى. تاعى دا 50 اۆتوبۋستى ساتىپ الۋدى كوزدەپ وتىر.
ءبىر جاقسىسى, ەندى سەمەيدە ەلەكتروندى بيلەت ماسەلەسى شەشىلمەك. اۆتوبۋستاردا تەگىن Wi-Fi قىزمەتى بولماق. سەمەيدىڭ اۆتوبۋستارى وسىلاي زاماناۋي باعىتتا حالىققا قىزمەت كورسەتەتىن بولدى.
ال وسكەمەندە جولاۋشى تاسىمالداۋشىلارىنىڭ ماسەلەسى ۋشىعىپ تۇر. اۆتوبۋستاردى جاڭارتۋ ىسىنە ۇقىپتىلىقپەن قاراپ, مىقتاپ قولعا الۋدى تاپسىرامىن. سەمەيدە جاڭا قوعامدىق كولىكتەر ساتىپ الىنىپ جاتىر. وسكەمەن قالاسىنىڭ اكىمى قۋات تۇماباەۆ پەن تاسىمالداۋشىلارعا جول كارتاسىن ازىرلەۋگە 10 كۇن ۋاقىت بەرەمىن, – دەدى تاسىمالداۋشىلارمەن كەزدەسكەن دانيال احمەتوۆ.
ەستەرىڭىزگە سالا كەتسەك, 2017 جىلدىڭ قىسىندا قالالىق قوعامدىق كولىك جولاقىسى 90 تەڭگەگە كوتەرىلگەن. ول كەزدەگى كاسىپكەرلەر ءۋاجى مەن ۋادەسى تاسىمالداۋ جاعدايىن جاقسارتۋ ەدى.
راۋشان نۇعمانبەك,
جۋرناليست
سەمەي
