باسقارما توراعاسى مارتەبەلى مەيمانعا كورمە اياقتالعان سوڭ, ۇلتتىق كومپانياعا مىندەتتەلگەن بىرقاتار جۇمىستار جونىندە ايتىپ بەردى. سونداي-اق ە.شورمانوۆ 2017 جىلعى قاراشانىڭ 10-نان باستاپ «نۇر الەم» ۇلتتىق پاۆيلونى, ۇزدىك تاجىريبەلەر ايماعى, ەنەرگيا حولى جانە كونگرەسس ورتالىعىنىڭ كەلۋشىلەر ءۇشىن قايتا ىسكە قوسىلعانىنا دا توقتالدى. كەزدەسۋ بارىسىندا «استانا» حالىقارالىق قارجى ورتالىعى, «Astana Hub» ءىت ستارتاپتارىنىڭ حالىقارالىق تەحنوپاركى, جاسىل تەحنولوگيالار ورتالىعى جانە وزگە دە ۇيىمدار جايعاساتىن نىسانداردى قايتا جوندەۋ جۇمىستارى جۇرگىزىلىپ جاتقانىن تىلگە تيەك ەتتى.
ەربول شورمانوۆ جاپونيانىڭ استانا ەكسپو-2017 كورمەسىندە يگى باستامالارعا ۇيىتقى بولعانىن اتاپ كورسەتتى. «جاپونيا كورمەگە قاتىساتىنىن العاشقى بولىپ راستاعان مەملەكەتتەردىڭ ءبىرى بولدى. كورمە كەزىندە كۇنشىعىس ەلىنىڭ پاۆيلونى ەڭ كوپ تاماشالانعان «ۇزدىك 10 پاۆيلون» (700 مىڭ ادام تاماشالاعان) قاتارىنان ورىن الدى. ەكسپو-2017 بارىسىندا, كورمەگە كەلۋشىلەر جاپون حالقىنىڭ مادەنيەتىمەن جانە داستۇرىمەن ەتەنە تانىسىپ, جارىق-ديودى, بالدىر بيوماسساسى جانە سۋتەكتى ەنەرگەتيكا سالاسىنداعى سوڭعى تەحنولوگيالارىن تاماشالادى. ەڭ باستىسى, ەكى ەلدىڭ بيزنەس وكىلدەرى ءوزارا بايلانىس ورناتتى», دەدى ە.شورمانوۆ.
ءوز كەزەگىندە جاپونيا ەلشىسى ەكسپو-2017
كورمەسىنىڭ ۇيىمداستىرىلۋ دەڭگەيىنە جوعارى باعا بەردى. «ەكسپو-2017 حالىقارالىق مامانداندىرىلعان كورمەسىنىڭ وتكىزىلۋى ەكى ەل اراسىنداعى دوستىق قارىم-قاتىناستىڭ ودان ءارى نىعايۋىنا يگى ىقپال ەتكەنىن ۇلكەن سەنىممەن ايتا الامىن», دەدى ي.كاۆاباتا.
سونداي-اق ي.كاۆاباتا جاپونيانىڭ وساكا قالاسىندا ەكسپو-2025 بۇكىلالەمدىك كورمەسىن وتكىزۋ قۇقىعىنا يە بولۋى باعىتىنداعى جۇمىستاردىڭ باستالعانىن ايتىپ, قازاقستان تاراپىنان قولداۋ جاسالاتىنىنا سەنىم ءبىلدىردى. كەزدەسۋ سوڭىندا ەربول شورمانوۆ يتيرو كاۆاباتاعا ماڭىزدى كەزدەسۋ ءۇشىن العىس ايتىپ, جاپونيا تاراپىمەن جوعارى تەحنولوگيالار جانە جاسىل ەنەرگەتيكا سالاسىندا الداعى ۋاقىتتا دا بىرلەسىپ جۇمىس اتقاراتىنىنا سەنىم ءبىلدىردى.
جىلقىباي جاعىپار ۇلى,
«ەگەمەن قازاقستان»
