ۇلتتىق عىلىم اكادەمياسىنىڭ باس عىلىمي حاتشىسى, اكادەميك م.قاليمولداەۆ الەمدى وزگەرىسكە باستاعان زاماناۋي تەحنولوگيالاردى مەڭگەرۋ, دامىعان 30 ەلدىڭ قاتارىنا كىرۋ جولىندا قازاقستاندىق عالىمداردىڭ ۇلەسى قوماقتى بولاتىنىنا سەنىم ءبىلدىردى. جولداۋدا بەلگىلەنگەن باسىمدىقتار تۋرالى قازاقستان پرەزيدەنتى جانىنداعى ستراتەگيالىق زەرتتەۋلەر ينستيتۋتىنىڭ ديرەكتورى زارەما شاۋكەنوۆا, تاريح عىلىمدارىنىڭ دوكتورى, پروفەسسور بەرەكەت كارىباەۆ بايانداما جاسادى. وتاندىق عالىمداردىڭ عىلىم مەن تەحنولوگيانىڭ ينتەگراتسيالانۋى بارىسىنداعى ءرولى سارالاندى.
ال ۇلتتىق عىلىم اكادەمياسىنىڭ پرەزيدەنتى, اكادەميك مۇرات جۇرىنوۆتىڭ ايتۋىنشا, اكادەميانىڭ بوس ورىندارىنا جاڭا مۇشەلەرىن سايلاۋ, ءداستۇرلى ۇلتتىق بايانداماسىنىڭ بيىلعى 14 تومىن دايارلاۋ, كوپ جىلعى ۇزىلىستەن كەيىن قايتا بەرىلگەن عىلىم سالاسىنداعى ق.ساتباەۆ, ى.التىنسارين, د.قوناەۆ, م.اۋەزوۆ, ش.ءۋاليحانوۆ, كۇلتەگىن اتىنداعى سىيلىقتاردى تاعايىنداۋ, 73 مەملەكەتكە تارالاتىن 8 جۋرنالدى ۋاقتىلى جوعارى ساپالى ەتىپ شىعارۋ, باسىم عىلىمي باعىتتاردى انىقتاۋعا قاتىسۋ, ۇلتتىق عىلىمي كەڭەس قۇرامىنا اكادەميكتەردىڭ كوپتەپ كىرۋىنە جانە ساراپتاما جاساۋعا بەلسەندى قاتىسۋىنا ىقپال جاساۋ ىسپەتتى اۋقىمدى جۇمىستار كۇتىپ تۇر. بىلتىر ەلباسىنىڭ رەسمي ساپارى اياسىندا بەلارۋس اكادەمياسىمەن ىنتىماقتاستىق تۋرالى شارتقا قول قويىلدى. سونداي-اق فرانتسيا, قىتاي, مولدوۆا, تاتارستان, ابحازيا عىلىم اكادەميالارىمەن بەلسەندى عىلىمي سەرىكتەستىك دامىپ كەلەدى.
«بيىلعى ەلباسى جولداۋىنداعى مىندەتتەردى ورىنداۋ الدىمەن زيالى قاۋىمنىڭ, ونىڭ ىشىندە وزىق, الدىڭعى قاتارلى عالىمدارعا قاتىستى. جولداۋدا ايتىلعان 10 ماسەلە وتاندىق عالىمداردىڭ كۇش سالۋىن تالاپ ەتەدى. اسىرەسە, يننوۆاتسيالىق يندۋستريالاندىرۋدى عىلىمي سۇيەمەلدەۋسىز جۇزەگە اسىرۋ مۇمكىن ەمەس. بۇل رەتتە اكادەميانىڭ حالىقارالىق بەدەلى جىلدان جىلعا قاناتىن كەڭگە جايىپ كەلەدى. بۇل – ورتاق تابىس. كەلەشەكتە دە وتاندىق عىلىمنىڭ تازا ءارى بيىك يدەالدارىن ودان ءارى دامىتۋ ءۇشىن قىزمەت ەتە بەرەيىك», دەدى م.جۇرىنوۆ.
ايگۇل احانبايقىزى,
«ەگەمەن قازاقستان»
الماتى
