كۇن تارتىبىنە بەينەباقىلاۋ جۇيەسىن كەڭەيتۋ ماسەلەسى قويىلدى. قازىر وبلىستا 758 بەينەباقىلاۋ كامەراسى بار, ونىڭ 329-ى جوندەۋدە, 11-ءى جول بويىندا ورنالاسقان. قۇقىق قورعاۋ ورگاندارى 10 اقپانعا دەيىن بارلىق كامەرالار جۇمىس ىستەيتىنىنە سەندىردى.
2017 جىلى بەينەكامەرالار ارقىلى 27 قىلمىس اشىلىپ, 16 072 اكىمشىلىك قۇقىقبۇزۋشىلىق انىقتالدى. جالپى وتكەن جىلى 142 مىڭنان استام قۇقىقبۇزۋشىلىق تىركەلدى, ونىڭ 106 مىڭى جولدا ءجۇرۋ ەرەجەلەرىن بۇزۋ.
- جالپى العاندا 1 ملرد 267 ملن تەڭگە ايىپپۇل سالىندى, ونىڭ 782 ميلليونى تولەندى. جەرگىلىكتى بيۋدجەتتىڭ قۇقىقتىق ءتارتىپتى قاداعالاۋ ورگاندارىن جابدىقتاۋعا باعىتتالعان قاراجاتى قاۋىپسىزدىكتى قامتاماسىز ەتۋگە جۇمسالىپ جاتىر,- دەدى ءىىد باسشىسى ايان دۇيسەمباەۆ.
وبلىستىق ءىىد جاڭا شاعىن اۋداندارعا, قالا ماڭىنداعى سەلولىق وكرۋگتەرگە تاعى دا قوسىمشا 1410 كامەرا ورناتاتىن جوبا دايىندادى. اكىمدىك بۇل جوبانى قارجىلاندىرۋ ماسەلەسىن قاراستىرىپ جاتىر.
اتىراۋ وبلىسىنىڭ اكىمى نۇرلان نوعاەۆ وسى باعىتتاعى جۇمىستاردى جانداندىرۋ كەرەكتىگى جايلى تاپسىرما بەرىپ, قالالىق بەينەباقىلاۋ جۇيەسىن بىرىڭعاي اقىلدى جۇيەگە ەنگىزۋ «تسيفرلىق قازاقستان» باعدارلاماسىنىڭ باستى باعىتتارىنىڭ ءبىرى ەكەنىن ايتتى.
- جاقىندا «بۇلتتى» تەحنولوگيالاردى قولداناتىن بەينەكامەرالار ورناتۋدى باستايمىز, اۋقىمدى جۇمىس جۇرەدى, - دەدى نۇرلان نوعاەۆ. – ءبىزدىڭ الدىمىزدا كامەرالاردى ستراتەگيالىق ماڭىزدى مەملەكەتتىك ورگاندارعا, ادامدار كوپ جينالاتىن جەرلەرگە قوندىرۋ مىندەتى تۇر. قۇقىق قورعاۋ ورگاندارى كاسىپكەرلەرمەن ويىن-ساۋىق ورىندارىندا ىشكى ىستەر ورگاندارىنىڭ جەدەل ارەكەت ەتۋ ورتالىعىنا شىعاتىن كامەرالار قوندىرۋ جونىندە ءتۇسىندىرۋ جۇمىستارىن جۇرگىزۋلەرى كەرەك.
وبلىس اكىمى ايماقتاعى قىلمىستىق احۋالدى جاقسارتۋعا قاتىستى قۇقىق قورعاۋ ورگاندارى باسشىلارىنا ناقتى تاپسىرمالار بەردى.
- اتىراۋ مەن قۇلسارى قالالارىنىڭ تۇرعىندارى ءۇشىن تاعى ءبىر ماسەلە - كوڭىل كوتەرەتىن ورىندار مەن تاۋلىك بويى ىستەيتىن دۇكەندەردىڭ جۇمىسى بولىپ وتىر. ادامدار تۇنگى ۋاقىتتا شۋ مەن قوعامدىق ءتارتىپتىڭ بۇزىلۋىنا كوپ شاعىم جاسايدى, - دەپ اتاپ ءوتتى ايماق باسشىسى. – وكىنىشكە قاراي, بۇل ورىنداردىڭ يەلەرى ءوز مىندەتتەرىنە نەمقۇرايلى قارايدى جانە جاقىن ماڭدا ورنالاسقان ۇيلەردىڭ تۇرعىندارىنىڭ تالاپتارى مەن ەسكەرتۋلەرىنە ءمان بەرمەيدى. مەن ارىپتەستەرىمە, قۇقىق قورعاۋ ورگاندارىنىڭ باسشىلارىنا وسى جايتقا باسا نازار اۋدارۋدى تاپسىرامىن.
