شاراعا ينۆەستيتسيالار جانە دامۋ مينيسترلىگى قۇرىلىس جانە تۇرعىن ءۇي-كوممۋنالدىق شارۋاشىلىق ىستەرى كوميتەتىنىڭ توراعاسى مارحابات جايىمبەتوۆ, «تكش قازورتالىعى» اق باسقارۋشى ديرەكتورى رۋسلان كۋلوۆ جانە قۇرىلىس جانە تۇرعىن ءۇي-كوممۋنالدىق شارۋاشىلىق ىستەرى كوميتەتىنىڭ باسقارما باسشىسى ازىمبەك نالىباەۆ قاتىستى.
شارا بارىسىندا م.جايىمبەتوۆ 2015-2018 جىلدار ارالىعىندا «نۇرلى جول» مەملەكەتتىك باعدارلاماسى اياسىندا 2 695 كم جىلۋ, سۋمەن جابدىقتاۋ جانە سۋ تارتۋ جەلىسى, 21 قازاندىق, 70 سورعى ستانساسى, كارىز جۇيەسى مەن سۋ تازارتۋ قوندىرعىلارى جانە باسقا دا نىساندار سالىنعانىن ايتتى.
«ەلباسىنىڭ جارلىعىمەن 2015 جىلعى 6 ساۋىردە بەكىتىلگەن «نۇرلى جول» مەملەكەتتىك باعدارلاماسىندا جىلۋمەن, سۋمەن قامتاماسىز ەتۋ جانە سۋ بۇرۋ جۇيەسىن جاڭعىرتۋعا ايتارلىقتاي قارجى ءبولىندى. مەملەكەتتىك باعدارلاما بيۋدجەتتىك نەسيە بەرۋ جانە سۋبسيديالاۋ ارقىلى تۇرعىن ءۇي-كوممۋنالدىق شارۋاشىلىعى ينفراقۇرىلىمىن جاڭعىرتۋدى قاراستىرادى. باعدارلاماداعى ينۆەستيتسيالىق جوبالاردى ىسكە اسىرۋ ناتيجەسى بويىنشا 2020 جىلعا دەيىن كەلەسى ناتيجەلەرگە قول جەتكىزۋ جوسپارلانۋدا. ولار جىلۋ, سۋمەن قامتاماسىز ەتۋ, سۋ تارتۋ جەلىلەرىنىڭ توزۋىن 67%-دان 53%-عا دەيىن ءتۇسىرۋ جانە تۇتىنۋشىلارعا كورسەتىلەتىن قىزمەت ساپاسىن جاقسارتۋ, شەكتى تاريف قاعيداتتارىن قولدانۋ جانە ماقساتتى ينۆەستيتسيالىق ترانسفەرتتەردى بيۋدجەتتىك نەسيەلەرمەن جانە جەكە كاپيتالدارمەن الماستىرۋ ەسەبىنەن سالانى كوممەرتسيالاندىرۋ پروتسەسىن ىسكە قوسۋ, سالانى بىرىڭعاي تەحنيكالىق ستاندارتتارعا كوشىرۋ», دەدى م.جايىمبەتوۆ.
قۇرىلىس جانە تۇرعىن ءۇي-كوممۋنالدىق شارۋاشىلىق ىستەرى كوميتەتىنىڭ توراعاسى ءسوزىن قورىتىندىلاي كەلە, مينيسترلىك باعدارلامانى ىسكە اسىرۋدىڭ بارىسىنا تۇراقتى باقىلاۋ جۇرگىزەتىنىن, جەرگىلىكتى اتقارۋشى ورگانداردىڭ قارجىلاندىرۋ جوسپارىندا كورسەتىلگەن مەرزىمدى بۇزۋىنا جول بەرمەۋ بويىنشا ۋاقتىلى شارالار قابىلدايتىنىن اتاپ ءوتتى.
راۋان قايدار,
«ەگەمەن قازاقستان»
