سەكسەننىڭ سەڭگىرىنە كەلگەن ۇستازدىڭ ءجۇرىسى شيراق, داۋىسى جاس ادامنىڭ داۋىسىنداي. جاس كورىنۋىنىڭ سىرى نەدە ەكەن دەگەن ويعا قالدىم. بۇل, ەڭ الدىمەن ادامنىڭ تەگىنە, ءومىر ءسۇرۋ ورتاسىنا جانە ماماندىعىنا بايلانىستى بولسا كەرەك. ماماندىققا بايلانىستى دەگەنىمە تاڭ قالاتىندار دا, داۋ ايتاتىندار دا تابىلار. مەنىڭ ويىمشا, بۇل بىردەن-ءبىر ەسكەرىلەتىن دۇنيە. ادامنىڭ جاس كورىنۋىنە بىردەن-ءبىر اسەر ەتەتىن ماماندىقتىڭ ءبىرى – مۇعالىم. سەبەبى مۇعالىم جەتكىنشەكتەرمەن جۇمىس ىستەيدى, بالالاردىڭ قۋانىشتى جۇزدەرىن كورىپ, بىرگە قۋانادى. دەمەك قۋانىشى ەسەلەنە تۇسەدى. ارينە مۇعالىم بولۋ, بالا تاربيەلەۋ – قيىن دا جاۋاپتى ءىس. سول قيىندىقپەن بىرگە قۋانىشى دا ەكى ەسە كوپ. بۇعان جاستاردىڭ كۇمانى بولماۋى كەرەك. جاستاردا قۋات كوزى بار. جاستاردىڭ ورتاسىندا رۋحتاناسىز, قاناتتاناسىز, قارتايماۋعا تىرىساسىز. ومىردەگى اسىل ماماندىق – مۇعالىمنىڭ الدىنان پرەزيدەنت تە, اكىم دە, عالىم دا وتەدى. سوندىقتان ءار ادام جاستىق شاعىمەن بىرگە مۇعالىمىن دە ەسىنە الارى انىق.
ال عاليا كارىمجانقىزى مۇعالىمدەردىڭ مۇعالىمى بولدى. كەلەشەك مۇعالىمدەردى وقىتتى, تاربيەلەدى. قىرىق جىلدان استام ۋاقىتىن مۇعالىمدىككە ارناعان ول ءوزى دە مۇعالىمدەر وتباسىندا دۇنيەگە كەلگەن بولاتىن. بۇل تۋرالى بىردە «مەنىڭ اكەم دە, انام دا ءوز ومىرلەرىن بالا وقىتۋعا سارپ ەتتى. جۇمىستارىنا ادال بولدى. داستارقان باسىندا ۇنەمى شاكىرتتەرىنىڭ جەتىستىكتەرى تۋرالى ايتىپ وتىراتىن. مەن دە سول كىسىلەردەي بولعىم كەلەتىن. انام ءشاربان حاسانقىزى اعارتۋ ءىسىنىڭ ۇزدىگى بولدى. بىردە انامدى كوپ جىلدىق ادال ەڭبەگى ءۇشىن توسبەلگىمەن ماراپاتتادى. بۇل مەنىڭ تاڭداۋىمدى ودان سايىن ناقتىلاي ءتۇستى», دەگەن ەدى.
عاليا كارىمجانقىزى اباي اتىنداعى قازاق پەداگوگيكالىق ينستيتۋتىن ءتامامداپ, ينستيتۋت رەكتورى مالىك عابدۋلليننىڭ ءوز قولىنان ديپلومىن العان سوڭ وقۋ ورنىنىڭ جولداماسىمەن تۋعان ەلى كوكشەتاۋعا قايتا ورالدى. جەرگىلىكتى تەحنيكۋمدا ورىس ءتىلى پانىنەن ساباق بەردى. ءوزى سياقتى الماتى مەديتسينالىق ينستيتۋتىن اياقتاپ, جولدامامەن دارىگەر بولىپ جۇمىس ىستەپ جۇرگەن جىگىتكە تۇرمىسقا شىقتى. كۇيەۋى تولەۋحان بەرتىسحانوۆ قىزمەت بابىمەن پاۆلودارعا اۋىسقاندا, عاليا كارىمجانقىزى پارتيا جولداماسىمەن العاشقىدا №9 كاسىبي ليتسەيدە ديرەكتوردىڭ وقۋ-تاربيە ءىسى بويىنشا ورىنباسارى بولسا, ءبىر جىلدان سوڭ ۆ.ۆوروۆسكي اتىنداعى پاۆلودار پەداگوگيكالىق ۋچيليششەسىنە (قازىرگى بەيسەن احمەتوۆ اتىنداعى پاۆلودار پەداگوگيكالىق كوللەدجىنە) ۇستازدىق قىزمەتكە كەلدى. ال ومىرلىك قوساعى قالا اۋرۋحاناسىندا ىشكى اعزاعا وتا جاساۋشى حيرۋرگ بولىپ ەڭبەك ەتتى. دەمەك ەكەۋىنىڭ دە جۇمىستارى ادام ومىرىمەن بايلانىستى بولدى.
«قازىر ءبىلىمنىڭ جاڭا جۇيەسى قالىپتاسۋدا. شەتەلدىڭ وقۋ جۇيەلەرى مەن تاجىريبەلەرى ەنگىزىلۋدە. «ەلۋ جىلدا – ەل جاڭا» دەگەن وسى. دەسە دە تەلەديداردان كورەتىن مۇعالىم مەن وقۋشى اراسىنداعى ءتۇرلى كەلەڭسىزدىكتەردى سانامىز قابىلداي الار ەمەس. مۇنىڭ ءبارى ادامنىڭ تىم الەۋمەتتەنىپ كەتۋىنەن دەۋگە بولادى. سوندىقتان ءبىر ءسات ءبىر-بىرىمىزگە دەگەن قۇرمەتىمىزدى, ءىلتيپاتىمىزدى, ادامي قارىم-قاتىناسىمىزدى ەستەن شىعارما-
يىق», دەيدى ارداگەر ۇستاز.
عاليابانۋ رەزۋانوۆا,
فيلولوگيا عىلىمدارىنىڭ كانديداتى
