سەمەي مەن اياگوزدە ەت كومبيناتى سالىنىپ, وسكەمەندە روبوتتاندىرىلعان حيرۋرگيا جانە ترانسپلانتاتسيا ورتالىعى اشىلىپ, قۋاتى 120 مىڭ توننالىق قوقىس وڭدەۋ زاۋىتى بوي كوتەرەدى. اۋىلداردى ساپالى اۋىز سۋمەن قامتاماسىز ەتۋ ءۇشىن قۇنى 13,7 ملرد تەڭگەنىڭ 37 جوباسى ىسكە قوسىلادى. «تسيفرلى شىعىس» جوباسى باستالادى.
وبلىس اكىمى دانيال احمەتوۆ وسكەمەندە ەلباسىنىڭ ء«تورتىنشى ونەركاسىپتىك رەۆوليۋتسيا جاعدايىنداعى دامۋدىڭ جاڭا مۇمكىندىكتەرى» اتتى جولداۋىن تالقىلاعان اكتيۆ جينالىسىندا ماڭىزدى قۇجاتتى جۇزەگە اسىرۋ ءۇشىن وڭىردە وسىنداي اۋقىمدى جۇمىستاردىڭ قولعا الىناتىنىن ايتتى. «بيىلعى جولداۋ «قازاقستان-2050» ستراتەگياسىن ورىنداۋ جولىنداعى جاسامپاز ىستەردىڭ تاعى ءبىر كەلەلى كەزەڭى. الەمدىك باسەكەگە قابىلەتتى بولۋدىڭ كەزەكتى باسپالداعى. مەملەكەت باسشىسى ۋاقىت تالابىنان تۋىندايتىن وزەكتى ماسەلەلەردى شەشۋدىڭ جولدارىن ايقىنداپ بەردى. دۇنيە ءجۇزىن قامتىپ وتىرعان ءتورتىنشى ونەركاسىپتىك رەۆوليۋتسيا جاعدايىنا بەيىمدەلۋ جانە ەلىمىزدىڭ ودان ءارى وركەندەۋىنە تىڭ سەرپىن بەرەتىن 10 نەگىزگى مىندەتتى اتاپ كورسەتتى. پرەزيدەنتتىڭ ەكونوميكانى يندۋستريالاندىرۋعا جانە تسيفرلاندىرۋعا قاتىستى تاپسىرماسىنىڭ ماڭىزى ەرەكشە. يننوۆاتسيانى ەندىرمەي, IT سالاسىن جانە ينجينيرينگتىك قىزمەتتەردى جەتىلدىرمەي الەمدىك ستاندارتتارعا ساي ونىمدەر شىعارۋ مۇمكىن ەمەس», دەدى ايماق باسشىسى.
ەلباسى جولداۋدا اگروونەركاسىپ كەشەنىنە «اقىلدى تەحنولوگيالاردى» ەنگىزۋ ماسەلەسىنە ايرىقشا توقتالعانى بەلگىلى. جيىندا ءسوز العان «مايلى داقىلداردىڭ تاجىريبە شارۋاشىلىعى» جشس ديرەكتورى فاريد ابىتاەۆ جاڭا تەحنولوگيالاردى ەنگىزۋ ناتيجەسىندە سوڭعى 5 جىلدا مال شارۋاشىلىعىندا جۇمىس ىستەيتىن قىزمەتكەرلەردىڭ جالاقىسىن 40 مىڭنان 120 مىڭعا دەيىن ۇلعايتقانىن, شەتەلدەن 6 مامان شاقىرعانىن اتاپ ءوتتى. «2012 جىلى جىلىنا 2700 توننا ءسۇت وندىرگەن ەدىك, ول كەزدە 120 ادام جۇمىس ىستەدى. قازىر 86 ادام جۇمىس ىستەيدى, بىراق جىلىنا 8 مىڭ توننا ءسۇت دايىندالادى. مىنە, جاڭا تەحنولوگيالاردىڭ ناتيجەسى. ءبىزدىڭ فەرمادا جۇمىس ىستەگىسى كەلەتىن جاستار كوپ. تراكتورلارىمىز كومپيۋتەرمەن جاراقتاندىرىلعان. فەرمادا ەڭبەك ەتەتىن جاستار جۇمىسىن اياقتاعاننان كەيىن تراكتورىن قويادى دا ينتەرنەتكە كىرىپ, الەۋمەتتىك جەلىدە وتىرادى», دەدى ول.
وبلىستىق ونكولوگيالىق ديسپانسەردىڭ باس دارىگەرى گۇلميرا ساعيدۋللينا پرەزيدەنت جولداۋىندا كورسەتىلگەن اۋرۋدىڭ الدىن الۋعا باعىتتالعان جۇمىستاردىڭ وڭىردە جۇزەگە اسىرىلۋ بارىسىنا توقتالىپ, بىلتىر ايماقتاعى ەمحانالارعا 8,5 ميلليارد تەڭگەگە جاڭا مەديتسينالىق قۇرىلعىلار ساتىپ الىنىپ, ورناتىلعانىن تىلگە تيەك ەتتى. باس دارىگەر ءوزى جەتەكشىلىك ەتەتىن اۋرۋحاناعا 800 ميلليون تەڭگەگە دياگنوستيكالىق جانە ەمدەۋ قۇرىلعىلارى قويىلعانىن, بۇل ونكولوگيالىق ناۋقاستاردى الدىن الا دياگنوستيكالاۋعا جانە ۋاقتىلى ەمدەۋگە مۇمكىندىك بەرەتىنىن ايتتى. «ەندى ايماق تۇرعىندارى وبلىستان شىقپاي-اق وسىندا تەكسەرۋدەن وتە الادى», دەدى باس دارىگەر.
اكتيۆ جيىنىندا سونىمەن قاتار «قازتسينك» جشس كوممۋنيكاتسيا باسقارماسىنىڭ باسشىسى بەرىكبەك كزىكەەۆ, قازاقستان-امەريكا ەركىن ۋنيۆەرسيتەتىنىڭ پرورەكتورى مارينا كيكينا, وسكەمەن قالالىق جاستار رەسۋرستىق ورتالىعىنىڭ ديرەكتورى رينات احمەتجانوۆ جولداۋداعى باسىم باعىتتارعا بايلانىستى ويلارىن ورتاعا سالدى.
ازامات قاسىم,
«ەگەمەن قازاقستان»
شىعىس قازاقستان وبلىسى
