باعدارلامانى جۇزەگە اسىرۋدا تۇرعىن ءۇي قۇرىلىسىنا باسىمدىق بەرىلگەنى ايان. ءبىر جىل ىشىندە ماڭعىستاۋ وبلىسىندا بۇل ماقساتقا بارلىق قارجى كوزدەرىنەن بولىنگەن قارجىعا 833, 022 شارشى مەتر ءۇي سالىندى. بۇل وتكەن جىلمەن سالىستىرعاندا 17 پايىزعا ارتىق كورسەتكىش. ال سالىنعان پاتەر سانىنا شاققاندا وبلىس اۋماعىندا 7011 پاتەر ءوز يەلەرىن قۋانتتى دەگەن ءسوز. ونىڭ ىشىندە كوشىپ كەلۋشىلەرى كوپ, جۇرتتىڭ ارمانىنا اينالعان وبلىس ورتالىعى اقتاۋ قالاسىنىڭ ۇلەسى قاشاندا زور. «نۇرلى جەر» باعدارلاماسى بويىنشا اقتاۋدا جاڭا شاعىن اۋداندار كولەمى ۇلعايىپ, 34-شاعىن اۋدان, 32 ا, 17, 31 ب, 32 ب جانە «شىعىس» شاعىن اۋداندارىندا اسەم ۇيلەر بوي كوتەردى. بۇل ۇيلەرگە وتكەن جىلى 3952 وتباسى قونىس تەپتى.
باعدارلامادا ايتارلىقتاي قارقىنعا يە باعىت – نەسيەلىك تۇرعىن ءۇي سالۋعا جالپى اۋماعى 83,641 شارشى مەترلىك 1198 پاتەر ءۇشىن 4452,379 ملن تەڭگە ءبولىندى. 528 پاتەردىڭ قۇرىلىسى اياقتالىپ, قولدانىسقا بەرىلدى. اقتاۋ قالاسىنداعى 34-شاعىن اۋدانداعى جەراستى پاركينگى بار كوپ پاتەرلى تۇرعىن ءۇي قۇرىلىسى مەن مۇنايلى اۋدانىنىڭ ماڭعىستاۋ اۋىلىنداعى 24 پاتەرلى 12 جالدىق ءۇيدىڭ قۇرىلىسى اياقتالسا, وبلىس ورتالىعىنداعى كوپ پاتەرلى تۇرعىن ءۇي قۇرىلىسى بيىل اياقتالادى دەپ جوسپارلانعان.
ساتىپ الۋ قۇقىعىنسىز جالدىق تۇرعىن ءۇي قۇرىلىسى دا قارقىندى جۇرۋدە. اتالمىش باعىت ءۇشىن 1 404,664 ملن تەڭگە ءبولىنىپ, ەكى نىسان سالىنىپ جاتىر. ءبىرى – مۇنايلى اۋدانىنىڭ ماڭعىستاۋ اۋىلىندا سالىنىپ جاتقان 24 پاتەرلى 8 ءۇي بولسا, ەكىنشىسى – وسى اۋداننىڭ باتىر اۋىلىنداعى 4 پاتەرلى 40 ءۇي. مۇنايلى – تاۋەلسىزدىك العان سوڭ ەلىمىزدە العاش اشىلعان اۋدان بولعانمەن, ماڭعىستاۋ وبلىسى بويىنشا حالقىنىڭ سانى جاعىنان الدىڭعى قاتاردا تۇر. وعان اۋداننىڭ وبلىس ورتالىعىنا قاناتتاس ورنالاسۋى سەبەپ بولسا كەرەك. تۇرعىندار سانى جىلدان-جىلعا ارتىپ كەلە جاتقان اۋداندا تۇرعىن ءۇي ەڭ باستى, ەڭ قاجەتتى ماسەلە. باتىر اۋىلىندا جوسپار بويىنشا سالىنۋعا ءتيىستى 64 پاتەردىڭ 16-سى سالىنىپ بىتسە, قالعان ۇيلەردىڭ قۇرىلىسىن بيىل اياقتاۋ مەجەلەنىپ وتىر.
«نۇرلى جەر» باعدارلاماسىن ىسكە اسىرۋدا قازاقستاننىڭ يپوتەكالىق كومپانياسىنىڭ, ۇلتتىق كومپانيالاردىڭ, جەكە كومپانيالار مەن جەكە تۇرعىن ءۇي سالۋشىلاردىڭ ۇلەسى زور.
2017 جىلى ماڭعىستاۋ وبلىسىندا بارلىق قۇرىلىس-مونتاج جۇمىستارىنا 197 ملرد تەڭگە بولىنگەن بولسا, «نۇرلى جەر» بويىنشا ءۇي سالۋ ءۇشىن ۇلتتىق قوردان 9 ملرد 675 ملن تەڭگە, رەسپۋبليكالىق بيۋدجەتتەن 262 ملن تەڭگە, بارلىعى 9 ملرد 938 ملن تەڭگە ءبولىنىپتى. قۇرىلىس سالۋعا قاجەتتى ينفراقۇرىلىم جۇمىستارى ءۇشىن وبلىستا 2017 جىلى 4 ملرد 081 ملن تەڭگە قارالىپ, بۇل قاراجاتقا 10 نىساننىڭ جۇمىسى جاسالعان.
– اقتاۋ قالاسىندا ۇزاق جىلدار بويى پاتەر جالداپ جۇردىك. جاس وتباسىنا بۇل وڭاي بولعان جوق. اي سايىن 60-70 مىڭ تەڭگە اقشانى پاتەر يەسىنە ساناپ بەرگەنشە, وسى اقشانى ءوز پاتەرىمىزگە سالاتىن كۇن بولسا عوي دەپ ارماندايتىنمىن. ارمانىمىز «نۇرلى جەر» باعدارلاماسى ارقىلى ىسكە استى. اقتاۋدان سالىنعان سۋ جاڭا ۇيدەن 70 شارشى مەترگە جۋىق ەكى بولمەلى ءۇيدىڭ يەسى اتانىپ, تەك مەنىڭ وتباسىم عانا ەمەس, بۇكىل اعايىن-تۋىس, دوس-جاراندارىمىزبەن بىرگە مارە-سارە بولدىق, – دەيدى د.ابدىبەك ەسىمدى دەپۋتات.
دەمەك, «نۇرلى جەر» باعدارلاماسى ماڭعىستاۋلىقتاردىڭ ءۇمىتىن ۇكىلەپ, الىس ارمانىن جاقىنداتا ءتۇستى. ءالى دە ءۇي كەزەگىندە تۇرعاندار سالىنىپ جاتقان ءۇي قۇرىلىستارىنا قىزىعا كوز سالىپ قويادى...
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى
