ءوزىنىڭ ساۋالىندا سەناتور وسى كۇنگە دەيىن مەملەكەتتىك «قازتەلەراديو» اق مەنشىگى بولىپ كەلگەن «وتاۋ تۆ»-نى دامىتۋعا رەسپۋبليكالىق بيۋدجەتتەن 53,4 ملرد تەڭگە بولىنگەنىن, 2016 جىلدىڭ جەلتوقسانىنا دەيىنگى مەرزىمدە ەلىمىزدىڭ 77,5 پايىز تۇرعىندارىن قامتىعان 356 ستانسا سالىنعانىن, ابونەمەنتتەرىنىڭ سانى 1 ملن-نان اسقانىن جانە ت.ب. ايتا كەلىپ, ەندى سونىڭ ءبارىن جەكەمەنشىككە بەرۋدىڭ قانشالىقتى تيىمدىلىگى بارىن سۇراعان. سونىمەن بىرگە ساۋالدا كومپانيانى جەكەمەنشىككە بەرۋدىڭ كەسىرىنەن «قازتەلەراديو» اق بويىنشا بۇرىن اقى-پۇلسىز تاراتىلىپ كەلگەن 55 ارنانى كورسەتپەۋگە تۋرا كەلەتىنىنە دە الاڭداۋشىلىق بىلدىرىلگەن.
وسى ساۋالعا ايدىڭ باسىندا پرەمەر-مينيستر ب.ساعىنتاەۆتىڭ اتىنان جاۋاپ كەلدى. وندا «وتاۋ تۆ» ارقىلى «نەگىزگى» جانە «تولىق» دەپ اتالاتىن ەكى ءتۇرلى ارنالار پاكەتى سپۋتنيكتىك تەلەراديوحابارلارى تاراتىلىپ كەلگەنى ايتىلا وتىرىپ, سونىڭ ىشىندە «نەگىزگى» پاكەت ارقىلى وتاندىق 45 تەلەارنا مەن 17 راديوارنانىڭ حابارلارى تۇرعىندارىمىزعا رەسپۋبليكالىق بيۋدجەتتىڭ ەسەبىنەن تەگىن ۇسىنىلىپ كەلگەنى جەتكىزىلگەن. ال «تولىق» پاكەت ارقىلى شەتەلدىك 74 تەلەارنانىڭ حابارلارىن ابونەمەنتتەر اقىلى نەگىزدە تۇتىنادى ەكەن.
جاۋاپقا قاراعاندا ماسەلەنىڭ ءبارى وسىعان كەلىپ تىرەلەتىن سياقتى. وسى ارنالاردىڭ حابارلارىن تاراتۋ ءتيىمدى ەمەستىگى انىقتالعان, ويتكەنى شەتەلدىك كونتەنتتەردىڭ ونىمدەرىن ساتىپ الۋ قىمباتقا تۇسكەن. وسى ءۇشىن «قازتەلەراديو» اق «وتاۋ تۆ»-نىڭ اقىلى سپۋتنيكتىك تەلەراديوحابارلارىن سىرتتان كەلگەن وپەراتورمەن بىرلەسىپ تاراتۋىن ماقۇل كورىپتى. جاسالعان ساراپتاما بويىنشا «تۆ-سوممەرس» جشس-ءنىڭ «ساspio HD» ساۋدا ماركاسى جەڭىمپاز بولىپ تانىلىپتى. 2017 جىلدىڭ 30 قاراشاسىندا «قازتەلەراديو» اق باسقارماسىنىڭ شەشىمىمەن وسى كومپانيامەن ىنتىماقتاسۋ شارتى جاسالعان. بۇل كومپانيانىڭ يەلەرى قاتارىندا گ.نۇرباەۆ, ە.يساباەۆ, ت.شاكەنوۆ جانە «Modern Nomads Entertainment» اتتى اق (ونىڭ قوجايىندارى كىم ەكەندىگى كورسەتىلمەگەن) اتالادى.
سونىمەن بىرگە جاۋاپ «ساspio HD» ابونەمەنتتىك اقىنى بۇرىنعى دەڭگەيدە ۇستاۋ ءۇشىن ابونەمەنتتەردىڭ سپۋتنيكتىك قابىلداعىشتارىن اۋىستىرمايتىنىن, قوسىمشا جاراقتار المايتىنىن جانە قوسىمشا مونتاجدىق جۇمىستار جۇرگىزبەيتىنىن ايتادى.
جاۋاپقا قاراعاندا «وتاۋ تۆ» جەكەمەنشىك فيرمانىڭ مەنشىگىنە تولىق بەرىلمەيدى, جۇمىس ونىمەن بىرلەسە جۇرگىزىلەدى.
دايىنداعان جاقسىباي سامرات,
«ەگەمەن قازاقستان»
