Ikea كومپانياسىنىڭ رەسمي حابارلاماسىندا كامپارد وتكەن عاسىرداعى ۇزدىك كاسىپكەرلەردىڭ ءبىرى بولعانى تۋرالى ايتىلعان.
«ينگۆار كامپراد ءومىرىنىڭ سوڭىنا دەيىن ءوز سالاسىندا تىنباي ەڭبەكتەنىپ كەلدى. ول بىلىكتى كاسىپكەر رەتىندە ەستە قالادى. ومىرىندە ۇلكەن جەتىستىكتەرگە جەتكەنمەن, «جۇمىسىمنىڭ باسىم بولىگى ءالى الدا» دەگەن ماقساتپەن ءومىر ءسۇردى», دەپ جازىلعان Ikea حابارلاماسىندا.
كامپارد 2013 جىلى 87 جاسىندا ديرەكتورلار كەڭەسىندەگى قىزمەتىنەن ءوز ەركىمەن كەتكەن.
ول وقۋشى كۇنىنەن كورشىلەرىنە سىرىڭكە ساتىپ, كاسىپپەن اينالىسقان. وسىلاي تاجىريبە جيناعان ول نەبارى 17 جاسىندا Ikea دۇكەندەر جەلىسىن قۇردى.
كومپانياعا جەتەكشىلىك ەتكەن جىلدارى ول ەۋروپاداعى داۋلەتتى ادامداردىڭ تىزىمىندە ءبىراز ۋاقىت كوش باستاپ تۇردى. دەگەنمەن كامپراد ۇنەمشىلىگىمەن دە كوپشىلىكتى تاڭعالدىراتىن. ساياحاتقا ول ىلعي ەكونوميكالىق كلاسپەن شىعۋدى, جۇمىسىنا تەك اۆتوبۋسپەن قاتىناۋدى ءارى ارزانداۋ كيىم كيۋدى ءجون كورەتىن.
كامپرادتىڭ مۇنداي ۇنەمشىلدىگى Ikea-ءدىڭ نەگىزگى ۇستانىمدارىنىڭ ءبىرى بولدى. كومپانيا تۇتىنۋشىلاردىڭ ارزان باعادا جيھازدار ساتىپ الۋىنا جاعداي جاساۋىمەن الەمگە تانىلعان.
«مۇنىڭ ەشقانداي قۇپياسى جوق. ەگەر ارزان باعادا ساپالى تاۋار ساتقىڭىز كەلسە, شىعىن كولەمىن ازايتۋىڭىز كەرەك, ياعني بارىنە ۇنەمشىلىك ەتكەنىڭىز ءجون. كومپانيا باسشىسى رەتىندە ۇلگى كورسەتپەسەم قىزمەتكەرلەرىمنەن ۇنەمشىلىكتى قالاي تالاپ ەتەمىن؟ سوندىقتان ايىپ ەتە كورمەڭىزدەر, سوڭعى ءبىر جىلدا گالستۋكتى ءبىرىنشى رەت تاعىپ وتىرمىن», دەپ 2007 جىلى كەزەكتى رەت قاراپايىم مىنەزىمەن كوزگە تۇسكەن.
1980 جىلى سۇحباتتارىنىڭ بىرىندە ول جيھاز وندىرىسىمەن اينالىسۋىنىڭ بىرنەشە سەبەبىن بارىن ايتقان.
«ولار ديسترۋبيتسيا سالاسىندا جەتەكشىلىك ەتىپ تۇر. اسىرەسە, قازىرگىدەي سۋپەرماركەتتەر ءوز قىزمەتىن تۇبەگەيلى جاڭعىرتۋعا ءماجبۇر بولعان كەزدە ماڭىزدىلىعى جوعارى», دەگەن ينگۆار كامپراد.
Ikea 1943 جىلى قۇرىلعان. قازىرگى ۋاقىتتا الەمدە كومپانيانىڭ 389 دۇكەنى بار.
ال Ikea ماعىناسى بىلايشا قۇرىلعان: ينگۆار كامپراد (IK), ءوزى وسكەن فەرمانىڭ اتاۋى – ەلمتاريد (ە) جانە كورشىلەس اگۋنناريۋد (ا) اۋىلىنىڭ اتاۋى.
