اقتوبە – كولىك-لوگيستيكا ينفراقۇرىلىمىن دامىتۋعا وتە ىڭعايلى ءوڭىر. ەڭ باستىسى, مۇندا ونى ورگە باستىرۋدىڭ جاڭا مۇمكىندىكتەرى مەن پايدالانىلماعان رەزەرۆتەرى بار. اكتيۆ جينالىسى كەزىندە بۇل ءۇشىن ءبىرىنشى كەزەكتە جەرگىلىكتى جانە رەسپۋبليكالىق ماڭىزى بار اۆتوكولىك جولدارىنا كۇردەلى جوندەۋلەر جۇرگىزۋ قاجەتتىگى اتاپ ءوتىلدى. بيىل وبلىس اۋماعىندا اقتوبە – اتىراۋ – استراحان حالىقارالىق اۆتوموبيل جولىنىڭ قۇرىلىسى قىزۋ قارقىن الماق. سونداي-اق شالقار – ىرعىز اۆتوجولىن كۇردەلى جوندەۋدەن وتكىزۋگە, ءارى وبلىس ورتالىعىنداعى اينالمالى اسپالى كوپىرلەر قۇرىلىسىنا بايلانىستى جاڭا شەشىمدەر بەلگىلەنبەك.
جولداۋدا قويىلعان بەسىنشى مىندەتكە بايلانىستى وبلىستا قۇرىلىس سالاسىندا جانە تۇرعىن ءۇي-كوممۋنالدىق شارۋاشىلىق سەكتورىندا دا جاڭا وزگەرىستەردىڭ تۇندىگى تۇرىلمەك. سونىڭ ىشىندە «نۇرلى جەر» باعدارلاماسىن جۇزەگە اسىرۋعا وراي 870 مىڭ شارشى مەتر باسپانا پايدالانۋعا بەرىلمەك.
اقتوبە يننوۆاتسيا مەن ءوندىرىستى دامىتۋ ىسىندە جانە يننوۆاتسيالىق قاراجاتتار تارتۋ تۇرعىسىندا رەسپۋبليكا وڭىرلەرى اراسىندا كوش باستاۋشى وڭىرلەردىڭ قاتارىنان ورىن الادى. بۇعان مىسال رەتىندە وتكەن جىلى وڭىرگە 437 ميلليارد تەڭگە ينۆەستيتسيالىق قاراجات تارتىلعانىن ايتساق تا جەتكىلىكتى. ال بيىلعى مەجە – جارتى تريلليون تەنگە كولەمىندە بولماق.
مەملەكەت باسشىسى جولداۋىنىڭ بيىلعى باستى وزەگى ادامي كاپيتالدى دامىتۋ ەكەنى بەلگىلى. وسى ورايدا وبلىستا ءبىلىم, دەنساۋلىق ساقتاۋ, مادەنيەت, سپورت, سالاماتتى ءومىر سالتىن ورنىقتىرۋ ماسەلەلەرى بويىنشا جاڭا كوكجيەكتەر اشىلماق. سونىڭ ىشىندە 2020 جىلعا دەيىن بۇلدىرشىندەردى بالاباقشامەن 100 پايىزدىق دەڭگەيدە قامتۋ جونىندە ناقتى ءىس-شارالار كەشەنى جاسالعان. سونداي-اق وتكەن جىلى وبلىستا 15 ورتا مەكتەپ ءۇيىنىڭ قۇرىلىسى اياقتالىپ, پايدالانۋعا بەرىلسە, بيىل 26 مەكتەپ عيماراتى تۇرعىزىلۋدا. جولداۋدا قويىلعان تسيفرلاندىرۋ مەن اقپاراتتىق-انىقتامالىق جۇيەنى ءبىر ىزگە كەلتىرۋ ءۇشىن وڭىردە ارنايى جۇمىس توبى قۇرىلعان.
ارينە, ايماقتا بارلىق قوعامدىق-تۇرمىستىق ماسەلەلەردىڭ شەشىمى تابىلعان دەسەك, شىندىققا كولەڭكە ءتۇسىرىپ الارمىز. ايتالىق, وبلىس اۋماعى ينتەرنەت جۇيەسىمەن 100 پايىزعا جۋىق قامتىلعانىمەن, ويىل, ىرعىز, شالقار, تەمىر سەكىلدى شالعاي اۋدانداردا ونىڭ جىلدامدىعى تومەن ەكەنى دە راس. كاسىپتىك-تەحنيكالىق ءبىلىم بەرۋ ورىندارىنىڭ تيىمدىلىگىن كوتەرۋ مەن ينفورماتيكا سالاسىنا قاجەتتى ماماندار ازىرلەۋ جانە دۋالدى وقىتۋ ءادىسىن جەتىلدىرۋ ىسىندە ءوز كەزەگىن كۇتىپ تۇرعان ىستەر دە جەتكىلىكتى.
ەركىن ەلدىڭ ەرتەڭى – بۇگىنگى بۇلدىرشىندەر مەن جەتكىنشەكتەر. كەز كەلگەن قوعام مەن مەملەكەتتىڭ ىزگىلىگى وعان قانشالىقتى دەڭگەيلە قامقورلىق جاسالعانىمەن كورىنبەك. وسى تۇرعىدا ادامي كاپيتالدىڭ جاڭا ساپاسىن ايقىنداپ بەرگەن پرەزيدەنتتىڭ بيىلعى جولداۋىنىڭ ورنى ايىرىقشا. مۇندا ەلدىڭ بولاشاعى جاستارعا قاتىستى مەرەيلى مىندەتتەردى ءداستۇر ساباقتاستىعىنا قوسا, بۇگىنگى جاڭاشا كوزقاراس جاعدايىندا جۇزەگە اسىرۋ جولدارى ايتىلعان. قالاي دەگەندە دە, بۇگىنگى جاستار تاربيەسىنىڭ باستى وزەگى پاتريوتتىق تاربيە, وتانشىلدىققا ۇندەۋ, ونەگەلىك سالت-ءداستۇرىمىزدى ودان ءارى دامىتۋ بولىپ قالا بەرمەك. بۇل رەتتە اكتيۆتە سويلەگەن سوزىندە اقتوبە وبلىسىنىڭ اكىمى ب.ساپارباەۆ بيىلعى جىل وبلىستا بالالار جىلى بولىپ جاريالانعانىن جەتكىزدى.
ءتۇيىپ ايتقاندا, اكتيۆ جينالىسىندا جولداۋدا قوزعالعان مىندەتتەرگە سايكەس ءوڭىرى الەۋمەتتىك-ەكونوميكالىق تۇرعىدان دامىتۋدىڭ بارلىق مۇمكىندىكتەرى جان-جاقتى سارالاندى.
تەمىر قۇسايىن,
«ەگەمەن قازاقستان»
اقتوبە
