شيەلى كەنتىندەگى 150 ورىندىق ورتالىق اۋرۋحانانىڭ ىرگەتاسى قالاندى. وبلىس اكىمى اۋدان تۇرعىندارىن جاڭا نىسان قۇرىلىسىنىڭ باستالۋىمەن قۇتتىقتاپ, جىلى لەبىزىن ءبىلدىردى.
«ەلباسىمىز نۇرسۇلتان ءابىش ۇلى نازارباەۆ جىل سايىنعى جولداۋلارىندا ۇلت دەنساۋلىعىن جاقسارتۋ جايىن ۇدايى ايتىپ كەلەدى.وسى رەتتە, مەملەكەت تاراپىنان تۇراقتى قولداۋدىڭ ناتيجەسىندە ەلىمىزدىڭ دەنساۋلىق ساقتاۋ سالاسى جۇيەلى تۇردە دامۋ ۇستىندە. سوڭعى ەكى جىلدىڭ ىشىندە سىر وڭىرىندە زاماناۋي قۇرال-جابدىقتارمەن قامتىلعان 41 دەنساۋلىق ساقتاۋ نىسانى سالىندى. شيەلى اۋدانىندا ءبىرازدان بەرى شەشىلمەي جاتقان جاڭا اۋرۋحانا سالۋ ماسەلەسى بولاتىن. بۇگىن, مىنە, ءبىز ونىڭ قۇرىلىسىن باستادىق. امانشىلىق بولسا, اۋرۋحانا كەلەسى جىلى پايدالانۋعا بەرىلەدى»,- دەدى وبلىس اكىمى.
سونداي-اق, اۋىل تۇرعىندارىن ەڭبەك ارداگەرى كيىكباي سمايىل ۇلى قۇتتىقتاپ, اق باتاسىن بەردى.
ايماق باسشىسى مەن قر پارلامەنتى سەناتىنىڭ دەپۋتاتى مۇرات باقتيار ۇلى شيەلى اۋدانىندا مەملەكەتتىك-جەكەمەنشىك ارىپتەستىك اياسىندا سالىنعان 200 ورىندىق سپورتتىق ساۋىقتىرۋ كەشەنىنىڭ اشىلۋ سالتاناتىنا قاتىستى. جالپى قۇنى 42 ملن. تەڭگەنى قۇرايتىن سپورت كەشەنىندە كۇرەس, بوكس, كىشى فۋتبول, ۆولەيبول سياقتى سپورت تۇرلەرىنە ارنالعان زالدار بار. كەشەن قۇرىلىسىن «بەتا ي ك» جشس جۇرگىزگەن.
ودان بولەك, ايماق باسشىسى اۋدان اكىمدەرىنىڭ حالىق الدىنداعى قورىتىندى ەسەپ بەرۋ جيىندارىنا قاتىستى.
«اۋدانداردىڭ الەۋمەتتىك-ەكونوميكالىق دامۋ كورسەتكىشتەرى جاقسى, دەگەنمەن, وسىمەن شەكتەلۋگە بولمايدى. بىرنەشە جىلدار بۇرىن قىزىلوردا وبلىسى الەۋمەتتىك-ەكونوميكالىق دامۋ قارقىنى بويىنشا سوڭعى ورىندا ەدى, ال قازىر ايماعىمىز كوپتەگەن كورسەتكىشتەر بويىنشا الدىنعى قاتاردا. ءبىز جاڭا داۋىردە ءومىر سۇرۋدەمىز, سوندىقتان ونىڭ ەرەجەلەرىنە باعىنۋىمىز قاجەت. ەلباسىنىڭ بيىلعى جولداۋىنداعى باستى مىندەت – بارلىق سالالاردى تسيفرلاندىرۋ, سوندىقتان ناتيجەگە قول جەتكىزۋ ءۇشىن ءبىز زامان تالابىنا ساي بولۋىمىز كەرەك. ول ءۇشىن بارلىق مۇمكىندىكتەر بار. جولداۋدى جۇزەگە اسىرۋ بارىسى ارقايسىمىزدىڭ جۇمىسىمىزعا بايلانىستى», - دەدى ول.
سونداي-اق, ايماق باسشىسى 2018 جىل قىزىلوردا وبلىسىندا جاپپاي كاسىپكەرلىكتى دامىتۋ جىلى دەپ جاريالاناتىنىن مالىمدەپ, شاعىن جانە ورتا بيزنەستى دامىتۋ ماسەلەسىنە دە ەرەكشە كوڭىل ءبولۋدى تاپسىردى.
ايتا كەتەيىك, سوڭعى 5 جىلدا قىزىلوردا وبلىسىندا 57 مەديتسينالىق نىسان, ونىڭ ىشىندە ارال, قازالى جانە شيەلى اۋداندارىنداعى ورتالىق اۋرۋحانالار اشىلدى. 2018 جىلىنىڭ قاڭتار ايىنان باستاپ بايقوڭىر قالاسىندا 15 مىڭ قازاقستاندىققا قىزمەت كورسەتەتىن ەمحانا جۇمىسىن باستادى.
سونىمەن قاتار, الداعى 3 جىلدا تاعى دا 100 دەنساۋلىق ساقتاۋ نىسانى سالىنباق. ودان بولەك, 2015 جىلى ولاردىڭ جابدىقتالۋ كورسەتكىشى 43 پايىز بولسا, 2017 جىلى 76,5 پايىزدى قۇرادى, ال اعىمداعى جىلى 90 پايىزعا جەتەدى دەپ جوسپارلانۋدا.
سوڭعى 3 جىلدا وبلىستا 9 سپورتتىق نىسان پايدالانۋعا بەرىلدى. ال, وتكەن جىلى قىزىلوردادا مەملەكەتتىك-جەكەمەنشىك ارىپتەستىك اياسىندا بوي كوتەرگەن سپورتتىق-ساۋىقتىرۋ كەشەنى ءوز جۇمىسىن باستاعان بولاتىن. سونداي-اق, ايماقتىڭ 7 ەلدى مەكەنىندە دە سپورت كەشەندەرىنىڭ قۇرىلىسى ءجۇرىپ جاتىر.
