«جىلىتۋ پۋنكتى» دەگەن جازۋى بار قوعامدىق كولىكتەردە تۇرعىندارعا ءشاي مەن كوفە تەگىن بەرىلەدى. «بۇل اۆتوبۋستار قالا شەتىندەگى وقۋشىلاردى مەكتەپكە تاسۋعا ارنالعان قوعامدىق كولىكتەر. بالالار ايازعا بايلانىستى ساباقتان بوساتىلعاندىقتان اۆتوبۋستار وسىنداي يگى ماقساتقا پايدالانىلۋدا. ون اۆتوبۋس وسكەمەندەگى ادامدار ەڭ كوپ جينالاتىن «ۋشانوۆ الاڭى», «45-ءىنشى گاسترونوم», «قازاقستان», «يۆۋشكا», «ورتالىق بازار», «ادىلەت ءۇيى», «وزەن ۆوكزالى», «حاليفا التاي مەشىتى», «احمەر (اسكەري قالاشىق)», «گەس» سەكىلدى ايالدامالاردا تۇراتىن بولادى», - دەيدى وسكەمەن قالاسى اكىمىنىڭ ءباسپاسوز قىزمەتىنىڭ جەتەكشىسى اسەم قايراتبەك.
كەشە وسكەمەندەگى ايالدامالاردا نەمەسە جول بويىندا تۇرعان تۇرعىنداردى ۇيىنە تەگىن جەتكىزىپ سالىپ جۇرگەن جۇرگىزۋشىلەر تۋرالى جازعان ەدىك. مۇنداي ىزگى ءىس وبلىس ورتالىعىندا ءالى دە جالعاسۋدا. الايدا قالاداعى كەيبىر پوليتسەيلەر وسى ءساتتى ء«تيىمدى» پايدالانعىسى كەلگەن سەكىلدى. پوليتسيا قىزمەتكەرلەرى ايالدامادا توڭىپ تۇرعان ادامداردى ۇيىنە جەتكىزبەك بولىپ توقتاعان جۇرگىزۋشىلەرگە ايىپپۇل سالىپتى. قالا تۇرعىندارىنىڭ ءبىرى وسى جاعدايعا بايلانىستى الەۋمەتتىك جەلى ارقىلى وسكەمەننىڭ اكىمىنە شاعىم ايتىپ, قايىرىمدى جۇرگىزۋشىلەرگە اراشا ءتۇسۋدى سۇراپتى. قۋات تۇماباەۆ قالالىق ءىىب باستىعىنا جۇرگىزۋشىلەرگە ايىپپۇل ارقالاتقان پوليتسەيلەردى انىقتاپ, ءتيىستى شارا قولدانۋدى تاپسىردى.
ازامات قاسىم,
«ەگەمەن قازاقستان»
وسكەمەن
