كۇرىشتىڭ قاۋىزىن ىدىراتۋ ارقىلى ەنەرگيا كوزدەرىن الۋعا بولاتىنىن دالەلدەگەن 20 جاستاعى ءىلياس مۇراتتىڭ ايتۋىنشا, ءبىر باتارەيانى ورناتۋ ەلەكتر ەنەرگياسىن 49 جىل بويى تەگىن پايدالانۋمەن بىردەي. ياعني باتارەيالاردىڭ ەكولوگياعا دا, ەكونوميكاعا دا پايداسى وراسان. بيولوگيالىق باتارەيالار قاراپايىم كۇرىشتىڭ قاۋىزىنا تازا بيولوگيالىق باكتەريالاردى قوسۋدى عانا قاجەت ەتەدى. وسى كەزدە ىدىراۋ پروتسەسى ءجۇرىپ, ەلەكتر ەنەرگياسى پايدا بولادى. ەشقانداي شىعىنسىز قۋات الۋعا بولادى. «بيولوگيالىق باتارەيالار بىرىنشىدەن, قاراجات وتە از جۇمسالىپ, ءوزىن ءوزى اقتاۋ مەرزىمى قىسقا ۋاقىتتى قامتيدى. ءبىز كۇرىشتىڭ قاۋىزىن ىدىراتۋ كەزىندە حيميالىق ەنەرگيانى تىكەلەي ەلەكتر ەنەرگياسىنا اۋىستىردىق. وسىلايشا ۇزاق مەرزىمگە شىدايتىن اككۋمۋلياتورلار ويلاپ شىعاردىق», دەيدى ءىلياس.
بيولوگيالىق باتارەيالاردىڭ باستى ارتىقشىلىعى – ۇزاق مەرزىمگە جارامدى. بۇل جوبانىڭ تەورياسىن ءىلياستىڭ اكەسى جازعان. بالاسى دوستارىمەن اكەسىنىڭ باستاعان ءىسىن تاجىريبەگە ەنگىزىپ, ناتيجە شىعارعان. ء«بىزدىڭ باتارەيالاردى ورنالاستىرۋعا 60 ملن تەڭگەدەي ينۆەستيتسيا كەرەك. ەگەر ينۆەستورلار تابىلىپ, قولداۋ كورسەتسە, باتارەيالاردى زەرتتەۋدى جالعاستىرىپ, تەك قازاقستان ەمەس, الەمدىك رىنوكقا شىعارعىمىز كەلەدى. ءبىزدىڭ جوباعا اقش-تان ماماندار قىزىعىپ وتىر, مامىر ايىندا جۇمىسىمىزدى تانىستىرۋعا شەتەلگە اتتانعالى وتىرمىز. دەسە دە, وسىنداي پايدالى دۇنيەنى ءوز ەلىمىزدىڭ ازاماتتارى قولداسا, ەلباسىمىز ايتقان ء«تورتىنشى ونەركاسىپتىك رەۆوليۋتسيا جاعدايىنداعى دامىعان قازاقستان» بولۋعا ءبىر ادىم جاقىندار ەدىك», دەيدى م.اۋەزوۆ اتىنداعى وڭتۇستىك قازاقستان مەملەكەتتىك ۋنيۆەرسيتەتىنىڭ 4-ءشى كۋرس ستۋدەنتى ءى.مۇرات. سونداي-اق ول باتارەيالاردىڭ پايدالى اسەر كوەففيتسيەنتىن كوتەرۋدى جوسپارلاپ وتىر. سول ارقىلى نوۋتبۋك جانە ۇيالى تەلەفونداردى ارزان ءارى كەز كەلگەن جەردە قۋاتتاۋعا بولاتىن مۇمكىندىك تۋعىزباق.
ايتا كەتەلىك, جاس ونەرتاپقىشتاردىڭ بۇل جوباسى جۋىردا وبلىستىق كاسىپكەرلەر پالاتاسىنىڭ باستاماسىمەن وتكەن بايقاۋدا باس جۇلدە الىپ, 1 ملن تەڭگە ۇتقان.
عالىمجان ەلشىباي,
«ەگەمەن قازاقستان»
