جيىنعا ءماجىلىس دەپۋتاتتارى, مينيسترلىك وكىلدەرى, جوعارى وقۋ ورىندارىنىڭ رەكتورلارى مەن وڭىرلىك كاسىپوداق بىرلەستىكتەرىنىڭ باسشىلارى قاتىستى. فورۋمدى قازاقستان رەسپۋبليكاسىنىڭ كاسىپوداقتار فەدەراتسياسى ۇيىمداستىردى.
فورۋمدا كاسىپوداقتار فەدەراتسياسىنىڭ توراعاسى باقىتجان ءابدىرايىم جولداۋدىڭ نەگىزگى ەرەجەلەرى مەن تەزيستەرى كاسىپوداقتاردىڭ قىزمەتىمەن تىكەلەي بايلانىستى ەكەندىگىن اتاپ ءوتتى. «كاسىپوداقتاردىڭ قىزمەتىن تۇبەگەيلى رەفورمالاۋ ماقساتىندا ورتاشا مەرزىمدى كەزەڭگە فەدەراتسيانى جاڭعىرتۋدىڭ جول كارتاسى ازىرلەندى. بۇل ءوز كەزەگىندە قازاقستانداعى كاسىپوداقتار قوزعالىسىنا جاڭا لەپ بەرۋى ءتيىس», دەدى ب.ءابدىرايىم.
سالالىق ءبىلىم جانە عىلىم قىزمەتكەرلەرى كاسىپوداعىنىڭ توراعاسى مايرا امانتاەۆا بيىلعى جولداۋدا ۇستازداردىڭ قۇقىعىن قورعاۋ قاجەتتىگىن ءتۇسىنۋ, ولاردىڭ ءبىلىم الۋ دەڭگەيىن ارتتىرۋ, ۇستازدار مەن عالىمداردىڭ الەۋمەتتىك-ەكونوميكالىق الەۋەتىنە جاردەمدەسۋ ماسەلەلەرى كوتەرىلگەنىن ءسوز ەتتى.
«پرەزيدەنتتىڭ قازاقستان حالقىنا ارناعان جولداۋىندا 10 مىندەت ايتىلدى. سونىڭ 7-ءشى مىندەتى ءبىلىم سالاسىنىڭ قىزمەتكەرلەرىنە ارنالدى. جالپى, وسى 10 مىندەتتىڭ جۇزەگە اسۋىنىڭ ءوزى ءبىلىم سالاسىنا, ياعني كادرلاردىڭ بىلىكتى بولۋىنا, قازىرگى زامان تالابىنا توتەپ بەرە الاتىن مامان دايىنداۋعا جانە سولاردىڭ ەڭبەگىنە بايلانىستى. بيىلعى جولداۋ ءبىلىم سالاسى قىزمەتكەرلەرىنە ۇلكەن مىندەت جۇكتەپ وتىر», دەدى م.امانتاەۆا.
فورۋم بارىسىندا كوتەرىلگەن ماسەلەلەردىڭ بىرقاتارى كاسىپوداقتار فەدەراتسياسى ازىرلەگەن جول كارتاسىنا ەنگىزىلدى. وسى قۇجاتتا الەۋمەتتىك ادىلدىك جانە ارىپتەستىك قاعيدالارىن دامىتۋ, الەۋمەتتىك-ەڭبەك قاتىناستارىن ارتتىرۋ, كاسىپوداقتاردى كۇشەيتۋ جانە نىعايتۋ ءۇشىن ناقتى مىندەتتەر ايقىندالعان. جول كارتاسى ەلىمىزدەگى قۇقىقتىق جاپپاي وقۋدىڭ بىرىڭعاي جۇيەسىن قۇرۋدى, رەسپۋبليكالىق ۇشجاقتى كوميسسيا جۇمىسىن جاڭعىرتۋدى, بەكىتىلگەن ۇجىمدىق شارتتاردىڭ ساپاسى مەن مولشەرىن ارتتىرۋدى قاراستىرادى.
قازاقستاننىڭ كاسىپوداقتارى جۇمىس بەرۋشىلەرمەن تىعىز قارىم-قاتىناس ورناتۋ ارقىلى جۇمىس ورىندارىنىڭ ساقتالۋىن قامتاماسىز ەتىپ وتىر. قازىرگى تاڭدا جۇمىس ورىندارىن ساقتاۋ جونىندە 115 134 مەموراندۋم بەكىتىلگەن. بۇل ەلىمىز بويىنشا 2,8 ميلليون ەڭبەككەردى قامتيدى.
فورۋم اياسىندا وبلىستارداعى ءبىلىم جانە عىلىم قىزمەتكەرلەرى كاسىپوداقتارىنىڭ توراعالارى ءسوز سويلەدى. كەزدەسۋگە قاتىسۋشىلار نۇرسۇلتان نازارباەۆتىڭ ء«تورتىنشى ونەركاسىپتىك رەۆوليۋتسيا جاعدايىنداعى دامۋدىڭ جاڭا مۇمكىندىكتەرى» جولداۋىندا ايتىلعان مىندەتتەردىڭ ماڭىزدىلىعىن ءسوز ەتتى.
اباي اسانكەلدى ۇلى,
«ەگەمەن قازاقستان»
