ياننيك بوكۋيننىڭ ەسىمىن ەستىمەگەن جان نەكەن-ساياق. ول الەمدەگى ەڭ ايتۋلى ونەر وشاقتارىندا شەبەرلىك ساباعىن وتكىزەتىن بىردەن-ءبىر بالەتمەيستەر. ولاردىڭ قاتارىندا كورولدىك شۆەد بالەتى, درەزدەن مەملەكەتتىك وپەراسى (گەرمانيا), فين ۇلتتىق بالەتى, لوزانناداعى بەجار بالەتى (شۆەيتساريا), مونتە-كارلو بالەتى, حيۋستون بالەتى (اقش), گونكونگ بالەتى, رەسەيدىڭ ۇلكەن تەاترى, ت.ب. بار.
ايتا كەتەرلىگى, الەمدىك دەڭگەيدەگى تانىمال شەبەر ءوزىنىڭ حورەوگرافيالىق ءبىلىمىن پاريج وپەراسىنىڭ بالەت مەكتەبى مەن پاريج ۇلتتىق كونسەرۆاتورياسىندا العان بولاتىن. بالەت ونەرىندە اتاق-داڭقى ورلەگەن ازامات كەزىندە بونن وپەراسى بالەتىنىڭ, فلاندريا كورولدىك بالەتىنىڭ, ريم وپەرا تەاترىنىڭ, بەرليندەگى نەمىس وپەراسىنىڭ جەتەكشى ءسوليسى بولىپ ونەر كورسەتسە, كەيىن ءوزىنىڭ شىعارماشىلىق جولىن ۆەنا مەملەكەتتىك وپەراسى بالەت ترۋپپاسىنىڭ تالىمگەر ۇستازى رەتىندە جالعاستىرعان ەدى.
بوكۋين ءادىسى دەلىنەتىن ساباقتارعا فرانتسۋز مەكتەبىنىڭ ۇلگىسى تۇرعىسىنان قاراعاندا, كوپتەگەن باعىت-باعدارلار ەنەدى. ءومىر بەلەستەرىندە تالاي تانىمال تاعدىرلارمەن, پەداگوگ-ماماندارمەن جۇمىس ىستەگەن مايتالمان سونىمەن قاتار شەبەرلىك ساباقتارىندا كاسىبي ءتۇرلى جاراقاتتاردى جەڭۋ تاجىريبەلەرىمەن ءبولىسۋدى ەشقاشان نازاردان تىس قالدىرعان ەمەس. اتاقتى پەداگوگ قوزعالىس كوورديناتسياسىنا ەرەكشە كوڭىل بولەدى: ولار بالەت تىلىندە «پور دە برا» دەپ اتالادى, ياعني دەنە, قول مەن باستىڭ دۇرىس قالپىن ساقتاۋ ارقىلى جاسالاتىن ءادىس. ساباق ۇستىندە ارتىستەر جىلدام ىرعاقتا جاسالاتىن «ۇساق» قيمىل تەحنيكاسى, اۋەندىلىك, سەرپىن, اياقتاردى دۇرىس قويۋ بويىنشا وقىپ, ۇيرەنەدى.
– قازاقستانعا كەلگەنىمە وتە قۋانىشتىمىن, «استانا وپەراداعى» جۇمىس – مەن ءۇشىن جاڭالىققا تولى, ءارى قىزىقتى تاجىريبەگە كەزىگۋدەمىن. مۇندا كەلگەن سەبەبىم, جاقىندا بالەت ترۋپپاسىنىڭ كوركەمدىك جەتەكشىسى التىناي اسىلمۇراتوۆادان ارنايى شاقىرتۋ الدىم. استانالىق ارىپتەسىمنىڭ ونەرى ر.پەتي مەن ك.ماكميللان سىندى ايگىلى حورەوگرافتاردىڭ ەسىمدەرىمەن تىكەلەي بايلانىستى, ول – تاجىريبەلى ماماندارمەن الەمنىڭ جەتەكشى تەاترلارىندا, ءتۇرلى بالەت مەكتەپتەرىندە قىرۋار تابىسقا قول جەتكىزگەن جان. ترۋپپا جەتەكشىسى رەتىندە وعان قازاقستاندىق ارتىستەردىڭ بۇل تاجىريبەنى قابىلداۋى ەرەكشە ماڭىزدى. ال «استانا وپەرا» تەاترى بالەت سوليستەرىنىڭ دايىندىعىنا كەلسەك, دەڭگەيلەرى وتە جاقسى ءارى قيمىلدارى ۇلپاداي جەڭىل, سەرگەك, ونىڭ ۇستىنە ەڭ باستىسى, ولاردىڭ كوكىرەك كوزدەرى اشىق, زەرەك, وزدەرىنە ازىرگە تىڭ دۇنيە بولىپ سانالاتىن ادىستەمەمەن قۇلشىنا جۇمىس ىستەۋدە. ارتىستەر الەمدىك دەڭگەيدى باعىندىرۋ جولىندا وزدەرىنىڭ كۇش-جىگەرلەرىن ايانىپ قالىپ جاتقان جوق جانە مەن ولاردىڭ العا قويعان وسى ماقساتتارىنا جەتەتىنىنە سەنەمىن, – دەدى ياننيك بوكۋين.
ايتۋلى بالەتمەيستەر ەلىمىزدىڭ تاريحى مەن بۇگىنگى جارقىن باستامالارىنا تاڭدانىپ, وتانىمىزدىڭ ورداسى مەن «استانا وپەرا» تەاترى تۋرالى شات-شادىمان راۋىشتە پىكىر ءبىلدىردى.
– ءسانى مەن ساۋلەتى كەلىسكەن كەرەمەت تەاتردى كورىپ قىزىعاسىڭ. اسىرەسە ماعان ءمارمار زالىنىڭ كوركەمدىگى ۇنادى, فويەنىڭ قابىرعالارىن ساندەپ تۇرعان قازاقستان تابيعاتىنىڭ كارتينالارى قانداي تاماشا. «استانا وپەرانىڭ» ۇلكەن زالى ايرىقشا اسەر قالدىرادى, دايىندىق زالدارى كەڭ, بالەت ەدەندەرى ساپالى – مۇنداي جايت ءاربىر تەاتردا كەزدەسە بەرمەيدى, – دەدى ماەسترو قىسقا دا نۇسقا بەرگەن سۇحباتىندا.
قارشىعا كۇلەن
