«قازمەديا» ورتالىعىندا وتكەن جيىندا اقپارات جانە كوممۋنيكاتسيالار ءمينيسترى داۋرەن اباەۆ وتكەن جىلى ءارتۇرلى جانرداعى, ءتۇرلى تاقىرىپتى قامتيتىن 40 سەريال كورەرمەن نازارىنا ۇسىنىلعانىن اتاپ ءوتتى.
«وزدەرىڭىز جاقسى بىلەسىزدەر, قازىر ءبىز وتاندىق سەريالداردى دامىتۋعا بارىنشا كوڭىل اۋدارىپ وتىرمىز. مەملەكەت باسشىسىنىڭ تىكەلەي تاپسىرماسى بويىنشا, حالقىمىزدىڭ سالت-ءداستۇرىن, تاريحى مەن ەرەكشە قۇندىلىقتارىن ناسيحاتتايتىن تەلەونىمدەرگە باسا نازار اۋدارىپ كەلەمىز.
ماسەلەن ءبىز وتكەن جىلى ءارتۇرلى جانرداعى, ءتۇرلى تاقىرىپتى قامتيتىن 40 سەريالدى كورەرمەن نازارىنا ۇسىندىق. وتاندىق تەلەحيكايالاردى ءتۇسىرۋدى تەك قانا مەملەكەتتىك ارنالارعا ەمەس, كوممەرتسيالىق كانالدارعا دا تاپسىرعان بولاتىنبىز. جانرلار جان-جاقتى ءارى ءارتۇرلى جاستاعى اۋديتورياعا ارنالعاندىقتان بۇل جۇمىستى جاۋاپتى ماماندارعا تابىستادىق دەپ ويلايمىن. بۇل سەريالداردىڭ بىرنەشە باعىتى بولدى. ماسەلەن, قوعامنىڭ الەۋمەتتىك تۇستارى, وتباسىلىق قۇندىلىقتار مەن بەرەكە-بىرلىكتى ناسيحاتتاپ, حالقىمىزدىڭ باي تاريحى مەن ءداستۇرىن دە كورسەتۋگە تىرىستىق. ارينە كورەرمەننىڭ كوزقاراسى ءارتۇرلى بولادى. سوندىقتان سەريالداردىڭ رەيتينگى دە بىردەن ارتىپ كەتۋى مۇمكىن ەمەس. ەڭ باستىسى, وسى جۇمىستار شىعارماشىلىق توپتاردىڭ كاسىبي دەڭگەيىنىڭ وسۋىنە ىقپال ەتەدى. ءبىز وعان سەنەمىز. قۇرمەتتى كورەرمەندەرىمىزدىڭ, زيالى ورتانىڭ پىكىرلەرىن ءبىلىپ وتىرمىز. ەكراندى شەتەلدىك سەريالدار جاۋلاپ الدى دەيتىندەر دە بار. سوندىقتان ءبىز الدىمىزعا اۋقىمدى ستراتەگيالىق ماقسات قويدىق. بۇل ماقساتىمىز – ساپالى وتاندىق تەلەفيلمدەردىڭ سانىن ارتتىرۋ, كورەرمەن تالعامىنا ساي, جاقسى سەريالدار ءتۇسىرۋ. سوندىقتان دا بۇل جۇمىستى جالعاستىرا بەرەتىن بولامىز», دەدى د.اباەۆ.
سونىمەن قاتار مينيستر وتكەن جىلى 131 الەۋمەتتىك بەينەروليك تۇسىرىلگەنىن جانە بۇل قازاقستان تەلەارناسىنىڭ تاريحى ءۇشىن رەكوردتىق كورسەتكىش ەكەنىن جەتكىزدى.
«اقپاراتتىق تەحنولوگيالار كۇننەن-كۇنگە دامىپ جاتقان زاماندا ءبىز اتا سالتىمىزدى ساقتاپ قالۋعا, ەفيردە كورسەتىلەتىن دۇنيەلەردىڭ ساپاسىن ارتتىرۋعا ۇلكەن نازار اۋدارۋىمىز قاجەت. حالقىمىز «ەلدىك مۇرات – ەڭ بيىك مۇرات» دەگەن قاناتتى ءسوزدى بەكەر ايتپاعان. سونىمەن وتكەن جىلى «قازاقستان» تەلەارناسى 15 سەريال, «حابار» 13 سەريال, جەكە تەلەارنالار ءارتۇرلى جانرلار مەن ءتۇرلى تاقىرىپتى قامتيتىن 12 ءونىم شىعاردى», دەدى مينيستر.
جيىنعا قاتىسقان «حابار» اگەنتتىگى» اق باسقارما توراعاسىنىڭ ورىنباسارى رينات كەرتاەۆ «حابار» ارناسىندا شىعاتىن سەريالداردىڭ 95 پايىزى قازاق تىلىندە ەكەنىن اتاپ ءوتتى.
«ويتكەنى بىزدە وتاندىق ونىمگە, ونىڭ ىشىندە قازاق تىلىندەگى ونىمگە دەگەن سۇرانىس جوعارى. سول سەبەپتى ءبىز كوپشىلىك كورەرمەننىڭ قازاقتىلدى ازاماتتار ەكەنىن ەسكەرە وتىرىپ, قازاقتىلدى اۋديتوريانىڭ قاتارى ارتىپ كەلە جاتقانىن الدىڭعى ورىنعا شىعارا وتىرىپ, مەملەكەتتىك تىلدەگى ءونىمدى كوپتەپ شىعارامىز. بۇرىندارى سەريالدار از تۇسىرىلەتىن كەزدە ءبىر جىلعا ارنالىپ جوسپارلانىپ تۇسىرىلگەن سەريالداردى ءبىز سول جىلدىڭ ىشىندە ءتۇسىرىپ, كورسەتىپ بىتىرەتىنبىز. ال سوڭعى جىلدارى اقپارات جانە كوممۋنيكاتسيالار مينيسترلىگىنىڭ سەريال ءوندىرىسىن قولداۋى, سەريالداردى قارجىلاندىرۋدى ارتتىرۋى ارقاسىندا بىلتىر شىققان سەريالداردىڭ ىشىندە ءالى دە بولسا قاڭتار, اقپان ايلارىندا ەفيرگە شىعارۋعا جوسپارلانىپ وتىرعان دۇنيەلەر بار. بىراق بارلىق سەريالدار ءوندىرىس بويىنشا جوسپارلانعان مەرزىمدە ءتۇسىرىلىپ, تاپسىرىلىپ ۇلگەردى. وتاندىق سەريالداردىڭ ءتۇسىرىلۋى تەلەارنا ءۇشىن دە ۇلكەن كومەك. ويتكەنى, تەلەارنادا ەكى ماۋسىم بار. ولار: كوكتەمگى جانە كۇزگى ماۋسىم. سول ماۋسىمداردىڭ ورتاسىنداعى ۇزىلىستەردى سەزدىرمەي, كورەرمەننىڭ وتاندىق سەريالداردى جىل بويى كورۋىنە جاقسى مۇمكىندىك بەرىلىپ وتىر دەگەن ويدامىز», دەدى ول.
ال «استانا» تەلەارناسىنىڭ باس ديرەكتورى ءلاززات تانىسباي نەگىزىنەن سەريالداردىڭ ءتىلى ول ارنانىڭ باعىتىنا, اۋديتورياسىنا بايلانىستى دەيدى. سونىمەن قاتار ل.تانىسباي «استانا» ارناسى اۋديتورياسىنىڭ 87 پايىزى قازاق تىلىندە بولعاندىقتان, سەريالدار تەك قازاق تىلىندە تۇسىرىلەتىنىن تىلگە تيەك ەتتى.
«QAZAQSTAN» رترك» اق باسقارما توراعاسى ەرلان قارين ۇلتتىق ارنا تۇسىرگەن «تار زامان» تەلەسەريالىنا توقتالىپ, كەڭىنەن اقپارات بەردى.
«تار زامان» سەريالى حح عاسىردىڭ باسىنداعى ءتۇرلى تاريحي درامالىق وقيعالارعا ارنالعان تۋىندى. بۇل اۋقىمدى جوبا بولدى. ءبىز وعان مۇقيات كىرىسىپ, ۇزاق دايىندادىق. تۇرسىن جۇرتباي, بەرىك ابدىعالي ۇلى باستاعان ارنايى كەڭەسشىلەر توبى قۇرىلدى. بەرىك ابدىعالي ۇلى جوبانىڭ باسىنان اياعىنا دەيىن ءوزى كەڭەسشى بولدى. ءبىز ونىڭ ستسەناريىن مۇقيات زەرتتەپ, قاراپ, وينايتىن اكتەرلەردى دە بۇكىل رەسپۋبليكا بويىنشا ىرىكتەدىك. سەريال بىرنەشە جەردە ءتۇسىرىلدى. ناقتىراق ايتساق, الماتىدا, تالدىقورعاندا, تارازدا, مەركىدە, پاۆلوداردا, باياناۋىلدا جانە ورىنبوردا ءتۇسىرىلىم جۇمىستارى جۇرگىزىلدى. بۇل سەريالدا 37 تاريحي كەيىپكەر سۋرەتتەلگەن. نەگىزگى كەيىپكەرلەرى – الاش قايراتكەرلەرى. اتالعان تۋىندى كورەرمەن نازارىنا ناۋرىز ايىندا ۇسىنىلادى», دەدى ەرلان قارين.
راۋان قايدار,
«ەگەمەن قازاقستان»
سۋرەتتى تۇسىرگەن
ەرلان ومار,
«ەگەمەن قازاقستان»
