اۋداندىق جاستار رەسۋرستىق ورتالىعىنىڭ ديرەكتورى سايات يبراەۆ ءومىردىڭ قيىندىعىنا قايىسپاعان قايسار جانداردىڭ باس بىرىكتىرىپ, جۇپ جاراستىرعان قۋانىشىنا ءوڭىر جۇرتشىلىعى العاش رەت كۋا بولىپ وتىرعانىن ايتادى. «كەيدە ون ەكى مۇشەسى ساۋ ادامدار تاعدىردىڭ بولماشى سىناعىنا شىداماي بورداي ۇگىلىپ, ومىردەن ءتۇڭىلىپ جاتادى. كەرىسىنشە, ءتۋابىتتى كەمتار نەمەسە تاعدىر تاۋقىمەتىمەن مۇگەدەك بولعان جاندار ومىرگە قۇشتار كەلەدى. جاراتقان يەمىز بۇل جانداردىڭ ءبىر مۇشەسىن كەم جاراتىپ, مۇمكىندىگىن شەكتەگەنىمەن, مۇقالماس ەرىك-جىگەر, قاجىماس كۇش بەرىپ, جان جاراسىن جەڭىلدەتەتىندەي. تەمىرلان مەن ءمادينا ءبىر-ءبىرىن 10 جىلدان بەرى جاقسى تانيدى ەكەن. احاج قىزمەتكەرلەرى دە, مەشىت يمامى دا وسىندا كەلىپ, ولارعا نەكە كۋالىگىن تاپسىردى. تويى دا وسى جەردە ءوتتى. قۋانىشقا اۋدان اكىمىنىڭ ورىنباسارى, مەشىتتىڭ نايب-يمامى, ءماسليحات دەپۋتاتتارى, ىشكى ساياسات ءبولىمى, اۋداندىق كومەك كورسەتۋ ورتالىعىنىڭ قىزمەتكەرلەرى مەن تاربيەلەنۋشىلەرى, قاريالار, ەكى جاقتىڭ اتا-اناسى مەن تۋعان-تۋىستارى دا ورتاقتاسىپ, ىزگى تىلەكتەرىن ءبىلدىرىپ, سىي-سياپاتتارىن تابىستادى», - دەيدى ول.
ال ءومىردىڭ سىناعىنا سىر بەرمەي, جاڭا ومىرگە بەت تۇزەگەن جانداردىڭ نەكەسىن قيعان اياگوز ورتالىق مەشىتىنىڭ نايب-يمامى ەرجان قاجى تولەۋباەۆ تا مۇنداي جايتكە ءوز تاجىريبەسىندە العاش رەت كۋا بولعانىن, ءوزىنىڭ ازداپ تولقىعانىن دا جاسىرمادى. «قوبالجىعانىمىز راس. ويتكەنى, قازىر ءبىزدىڭ قوعامىمىزدا قول-اياعى بالعاداي, تەپسە, تەمىر ۇزەتىن ازاماتتارىمىزدىڭ وتباسىن قۇرماي, سالت اتتىلى, ساباۋ قامشىلى بولىپ جۇرگەنى از با؟ نەمەسە بۇگىن كوڭىل جاراستىرعان جاستاردىڭ جىل تولماي, ءتىپتى ءبىر-ەكى اي وتپەي اجىراسىپ جاتقاندارى ويلاندىرا ما؟ ارينە, ويلاندىرادى. وسى تۇرعىدان كەلگەندە تەمىرلان مەن ءمادينانىڭ شاڭىراق كوتەرۋىن بىرىنشىدەن, باتىلدىق, ەكىنشىدەن, كوپتەگەن ادامدارعا ۇلگى-ونەگە دەپ ەسەپتەيمىن. الەۋمەتتىك كومەك كورسەتۋ ورتالىعىنىڭ قىزمەتكەرلەرى بۇرىن توماعا-تۇيىق جۇرەتىن ەكەۋىنىڭ سوڭعى كەزدەرى كوڭىل-كۇيلەرىندە وڭ وزگەرىس بايقالىپ, ومىرگە دەگەن قۇلشىنىستارى ارتا تۇسكەنىن بىزگە قۋانا جەتكىزدى. سوندىقتان وسى ورتالىق قىزمەتكەرلەرىنىڭ ەڭبەگىن دە ەستەن شىعارماي, العىس ايتۋىمىز كەرەك شىعار», - دەيدى يمام.
ازامات قاسىم,
«ەگەمەن قازاقستان»
شىعىس قازاقستان وبلىسى,
اياگوز اۋدانى
