ستۋدەنت حاميدولدا 1986 جىلى 7 تامىزدا موڭعوليانىڭ حەنتي ايماعىندا دۇنيەگە كەلگەن. اكەسى قوبدا ايماعىندا تۇرىپ, 80-جىلدارى حەنتي ايماعىنا جۇمىس بابىمەن كوشىپ كەلەدى. شەشەسى بايانولگەيدىڭ قىزى. 1985 جىلى حاميدولدا سايىرحان مەن ءساۋيا بەكتەمىرقىزى وتباسىن قۇرادى.
– اكەم حاميدولدا ۇلانباتىرداعى اۋىل شارۋاشىلىعى ينستيتۋتىن ينجەنەر-مەحانيك ماماندىعى, ال, انام ءساۋيا سول ينستيتۋتتى مالدارىگەرى ماماندىعى بويىنشا بىتىرگەن. اكەم موڭعوليادا مەحانيزاتوردان باستاپ باس ينجەنەرگە دەيىن قىزمەت اتقاردى, – دەيدى ستۋدەنت.
ءبىرى ينجەنەر-مەحانيك, ءبىرى مال دارىگەرى بولىپ اتامەكەنگە جەتكەن حاميدولدانىڭ وتباسى ناعىز اۋىلعا كەرەك جوعارى ءبىلىمدى ماماندار ەمەس پە. تەمىردەن ءتۇيىن جاساۋ قولىنان كەلىپ تۇرعاندا بوس وتىرا ما, قازىر ول اۋىلداعى جەكە كاسىپكەرلەردىڭ ءبىرى, ءۇي جىلىتاتىن پەشتەر جاسايدى. ال ءساۋيا ەلگە ورالعالى بەرى اۋىلدىق مال دارىگەرلىك پۋنكت مەڭگەرۋشىسى بولىپ ەڭبەك ەتەدى.
– مەنىڭ اتىمدى اتام قويىپتى. سەبەبى, مەن تۋعان كەزدە اكە-شەشەم ستۋدەنت بولىپ ۇلانباتىردا ينستيتۋتتا وقىپ جۇرگەن. مەن اتا مەن اجەنىڭ باۋىرىندا ءوستىم. اتام ەكىنشى دۇنيەجۇزىلىك سوعىسقا قاتىسقان (1945 جىلى جاپونيامەن) قوبدا ايماعىنداعى سوعىس ارداگەرلەرىنىڭ ەسكەرتكىشىندە ەسىمى جازىلعان, ۇستا بولعان كىسى. اجەم سىرماق باساتىن, كيىزدەن ءارتۇرلى بۇيىمدار جاسايتىن, سونىمەن قاتار جىر-داستانداردى جاتقا ايتاتىن ءانشى بولدى, – دەيدى ستۋدەنت ەسكە الىپ.
1991 جىلى العاشقىلاردىڭ ءبىرى بولىپ ەلگە اسىققان كوشتىڭ ىشىندە حاميدولدا سايىرحاننىڭ دا وتباسى بولدى. ول كەزدە ستۋدەنت 5 جاستا ەكەن. كەلگەن كەزدە تالدىقورعاننىڭ ءۇشارال اۋدانى اقشي اۋىلىنا جەتىپتى. 1992 جىلى ار جاقتان كوشىپ كەلگەن باسقا تۋىس-تۋعانمەن بىرگە بولايىق دەپ ماي اۋدانىنا كوشىپ كەلىپتى. اۋىلدا قازىر 40-قا جۋىق ەلگە كوشىپ كەلگەن اعايىندار تۇرادى.
– مەن 1-سىنىپقا اقشيمان اۋىلىندا تۇرعان كەزدە باردىم. وتكەندە ءوزىڭىز جازعان قالماققىرىلعان تاۋىنىڭ جانىندا تۇردىق. شەجىرەلى تاريحي جەر. بالا كەزىمدە ءجيى باراتىنبىز, – دەيدى.
ستۋدەنت تە اكەسىنىڭ جولىن قۋىپ, تەحنيكالىق ماماندىقتى تاڭداپتى. 2004 جىلى س.تورايعىروۆ اتىنداعى پاۆلودار مەملەكەتتىك ۋنيۆەرسيتەتى ماشينا جاساۋ فاكۋلتەتىنىڭ كولىك, كولىك تەحنيكاسى جانە تەحنولوگياسى ماماندىعىنا ءتۇسىپ, 2008 جىلى ءبىتىرىپ شىعىپتى.
– ءوز ماماندىعىڭ بويىنشا زاۋىتقا نەگە جۇمىسقا بارمادىڭ؟ سەن سياقتى قازاق بالالارى وندىرىسكە كەرەك ەمەس پە؟ – دەگەن سۇراعىما:
– اۋىلعا دا مامان كەرەك قوي! –دەيدى ستۋدەنت. – ۇيلەنىپ, باس قۇرادىق دەگەندەي. ۋاقىتى كەلگەندە كورەرمىز, – دەدى سەنىممەن.
جۇبايى ايتاڭسىق حۋدابايدىڭ دا ەكى جوعارعى ءبىلىمى بار. ايتاڭسىق وبلىس ورتالىعىنداعى مەملەكەتتىك پەداگوگيكالىق ينستيتۋتتى قازاق ءتىلى مەن ادەبيەتى ءپانى ماماندىعى بويىنشا ءبىتىرىپ, كەيىننەن مەكتەپكە دەيىنگى بالا تاربيەسى ماماندىعىن الىپتى. قازىر ايكوركەم دەگەن كىشكەنتاي قىزىمەن ۇيدە.
– قازىر اكە-شەشەم ءىنىم ادەبيەتتىڭ قولىندا بىرگە تۇرادى. ايەلى سەرىكگۇل مەكتەپ مۇعالىمى. ادەبيەت اۋدانداعى اگرارلىق كوللەدجدە شەبەر-مۇعالىم بولىپ قىزمەت جاسايدى. قارىنداسىم جانارگۇل تۇرمىس قۇرعان. اكەم مەن انامنىڭ فاريدا, ءدىنيسلام, ايعانىم, ايكوركەم دەگەن نەمەرەلەرى ءوسىپ كەلەدى. فاريدا دەپ ءوزىڭىز 2012 جىلى اۋىلعا كەلگەندە اتىڭىزدى بەرگەنبىز, –دەيدى ستۋدەنت قوشتاساردا.
فاريدا بىقاي,
«ەگەمەن قازاقستان»
پاۆلودار وبلىسى,
ماي اۋدانى,
كەڭتۇبەك اۋىلى
سۋرەتتە: ستۋدەنتتىڭ وتباسى – ايەلى ايتاڭسىق, قىزى ايكوركەم
