تۇرعىن ۇيلەر جوندەلۋ ۇستىندە

پرەمەر-مينيستر كارىم ءماسىموۆتىڭ توراعالىعىمەن كەشە ۇكىمەتتە وتكەن سەلەكتورلىق كەڭەستە ەكى ماسەلە قارالدى. ونىڭ ءبىرىنشىسى – كوپ پاتەرلى تۇرعىن ۇيلەردى جوندەۋدىڭ تەتىكتەرىن جۇزەگە اسىرۋ بارىسى تۋرالى ەلىمىزدىڭ قۇرىلىس جانە تۇرعىن ءۇي-كوممۋنالدىق شارۋاشىلىق ىستەرى اگەنتتىگىنىڭ توراعاسى سەرىك نوكين باياندادى.   ونىڭ ايتۋى بويىنشا, اتال­عان ماسەلە جونىندە قازىرگى كۇنى ەكى تەتىك ازىرلەنىپ, جۇزەگە اسى­رىلۋدا. بىرىنشىسىنە ۇكىمەت قو­رىنان 1,9 ميلليارد تەڭگە ءبولىن­گەن. بۇل قارجىعا 106 ءۇيدى ءجون­دەۋدەن وتكىزۋ جوسپارلانىپ وتىر. ۇستىمىزدەگى جىلدىڭ 11 قا­را­شاسىنداعى مالىمەت بويىنشا, وسى باعىتتاعى جوندەۋ جۇ­مىس­تا­رى ەلىمىزدىڭ 16 وڭىرىندەگى 91 تۇرعىن ۇيدە قولعا الىندى. بۇل جالپى كورسەتكىشتىڭ 86 پايىزىن قۇرايدى. بولىنگەن قارجىنىڭ 950 ميلليون تەڭگەسى نەمەسە 50 پايى­زى يگەرىلدى. اقتوبە وبلىسى مەن استانا قا­لاسىندا بولىنگەن قار­جى تولىقتاي يگەرىلدى. اتىراۋ, وڭتۇستىك قا­زاق­ستان وبلىستا­رىن­دا دا جۇمىس قىزۋ قارقىنمەن ءجۇ­زەگە اسىرىلۋدا. ەكىنشى تەتىكتى جۇزەگە اسىرۋعا ۇكىمەت 5,5 ميلليارد تەڭگە ءبول­گەن بولاتىن. بۇعان 449 ءۇي ءجون­دەۋدەن وتكىزىلۋگە ءتيىس. قازىرگى كۇنى وسى تەتىك بويىنشا جۇ­مىس­تار ەلىمىزدىڭ بارلىق وڭىرلە­رىن­دەگى 402 تۇرعىن ۇيدە جۇزەگە اسى­رىلۋدا. بۇل جالپىنىڭ 89 پايى­زىن قۇرايدى. بولىنگەن قارجى­نىڭ 3,9 ميلليارد تەڭگەسى نەمەسە 67 پايىزى يگەرىلدى. كۇن تارتىبىندەگى ەكىنشى ماسە­لە بويىنشا قىسقى جىلىتۋ ماۋ­سىمىنا دايىندىق جۇمىستارى­نىڭ ناتيجەلەرى قارالدى. وسى ماسەلەگە قاتىستى ەسكەرەتىن ءبىر­قاتار پروبلەمالار انىقتالىپ, ولاردى جويۋدىڭ جولدارى بەلگىلەندى. مۇناي جانە گاز ۆيتسە-ءمينيسترى بەرىك تولىمباەۆتىڭ حا­بار­لاۋىنا قاراعاندا, ەلىمىزدىڭ وڭتۇستىك وبلىستارىن گازبەن قام­تۋ ىسىندە بىرقاتار ىركىلىستەر ورىن الدى. بۇعان وزبەكستاننان ەلىمىزگە جەتكىزىلەتىن گاز كولە­مىنىڭ تومەندەۋى اسەر ەتىپ وتىر. وسىعان بايلانىستى قازاقستان ەندى تۇركىمەنستان گازىن الۋعا كىرىستى. ءسويتىپ, پروبلەما شەشىمىن تاپتى. اتالعان ماسەلەلەردى قورى­تىن­دىلاعان ۇكىمەت باسشىسى كارىم ءماسىموۆ ماسەلەگە جاۋاپ بەرەتىن ادامدارعا مۇنداي ما­ڭىز­دى ىستەردى كۇنى بۇرىن قولعا الىپ, الدىن-الا جۇرگىزۋ قاجەت­تىگىن ەسكەرتتى. سونىمەن قاتار ماسەلەلەردى تىڭعىلىقتى رەتتەۋ جونىندە ءتيىستى ورىندارعا تاپ­سىر­مالار بەردى. سۇڭعات ءالىپباي.