ەل ۇلەسى اتالدى

كەشە ەلىمىزدىڭ سىرتقى ىستەر ءمينيسترى ەرجان قازىحانوۆ استانادا وتەتىن اۋعان ماسەلەسى بويىنشا حالىقارالىق بايلانىس توبىنىڭ 12-ءشى وتىرىسىنا قاتىسۋ ءۇشىن ەلىمىزگە كەلگەن اۋعانستان سىرتقى ىستەر ءمينيسترى زالماي راسۋلمەن كەزدەستى. ەكى ەلدىڭ ديپلوماتيالىق ميس­سياسىنىڭ باسشىلارى ەكىجاقتى ىنتىماقتاستىقتىڭ ماڭىزدى ماسە­لەلەرىن, ورتالىق ازياداعى جاع­دايدى قاراستىرىپ, الداعى ۋاقىتتا وتەتىن ءىس-شارانىڭ كۇن ءتارتىبى جايلى پىكىر الماستى. ە.قازىحانوۆ قازاقستان اۋعانستاننىڭ سىرتقى ساياساتتاعى سەنىمدى ارىپتەسى ەكەندىگىنە توقتالا كەلە, «استانا كابۋلمەن ەكىجاقتى جانە دە كوپجاقتى ولشەمدەردەگى ساياسي بايلانىستىڭ دامۋىنا ايرىقشا ءمان بەرەدى», – دەپ اتاپ ءوتتى. «قازاقستاننىڭ ەنەرگەتيكا, تاۋ-كەن ونەركاسىبى, كولىك, ترانزيتتىك ساۋدا جانە اۋىل شارۋاشىلىعى سا­لاسىنداعى قوماقتى تاجىريبەسى بار كومپانيالارى اۋعان ەكونوميكاسىن دامىتۋ بويىنشا كەلەشەگى بار جوبالارعا قاتىسۋعا دايىن», – دەدى ە.قازىحانوۆ. سىرتقى ساياسات ۆە­دوم­ستۆوسى وكىلىنىڭ ايتۋىنشا, ەكو­نوميكالىق سالاداعى ءوزارا ارەكەت­تەسۋدىڭ ىقپالدى قۇرالى رەتىندە قىركۇيەك ايىندا كابۋلدا وتكەن ساۋدا-ەكونوميكالىق ىنتىماق­تاس­تىق بويىنشا قازاقستان-اۋعانستان ۇكىمەتارالىق كوميسسياسىن ايرىق­شا اتاپ وتۋگە بولادى. اۋعانستان ۇكىمەتىنىڭ ساياسي جانە الەۋمەتتىك-ەكونوميكالىق سا­لا­لار­داعى ماسەلەلەرىن شەشۋدىڭ وزەكتىلىگىن ايتا كەلە, ە.قازىحانوۆ شىۇ, اوسشك, ءوااۇو (ورتا­ازيا­لىق ايماقتىق اقپاراتتىق ءۇي­لەس­تىرۋشى ورتالىق) سىندى اۋ­ماقتىق ۇيىمدار شەڭبەرىندەگى جا­سالعان قۇرىلىمداردىڭ ىسكە اسى­رىلۋ ماڭىزدىلىعىن دا نازاردان شىعارمادى. كەزدەسۋدە اۋعانستاندى قايتا قالپىنا كەلتىرۋگە باعىتتالعان ءبىر­قاتار گۋمانيتارلىق جوبالاردىڭ جۇزەگە اسىرىلۋىنداعى قازاق­ستان­نىڭ ۇلەسىنە ايرىقشا نازار اۋ­دارىلدى. ولاردىڭ ىشىندە سوڭعى ەكى جىلدا اۋعان ستۋدەنتتەرىنە ارنالعان ءبىلىم بەرۋ باعدارلاما­سىنىڭ ءساتتى جۇزەگە اسۋى, قازاقستان ۇكىمەتىنىڭ ارالاسۋىمەن «قۇندىز – تالۋقان – شەرحان – باندار» كولىك جولدارىن قالپىنا كەلتىرۋ ۇدەرىسى, سونداي اق, قالعان ەكى نىسان – مەكتەپ پەن اۋرۋحانانىڭ جاقىن ۋاقىت­تا ىسكە قوسىلۋى جايى ايتىلدى. قازاقستان اۋعانستانعا بەلسەندى تۇردە قامقورلىق كورسەتۋگە دايىن ەكەندىگىن ءوزىنىڭ ەقىۇ-داعى ءتورا­عالىعى بارىسىندا دالەلدەگەنى بەلگىلى. دەمەك, قازاقستان – «ۇشتىك» مۇشەسى جانە بيىلعى جىلى ەقىۇ-نىڭ ازيالىق ارىپتەستەرمەن ىنتى­ماقتاستىق جونىندەگى بايلانىس تو­بىنا توراعا رەتىندە اۋعان ءما­سەلەسىنىڭ شەشىلۋىنە جان-جاقتى مۇددەلىلىك تانىتىپ وتىرعان بىردەن ءبىر ەل. ءلايلا ەدىلقىزى.