قىسقى وليمپيا ويىندارىنا (قوو) تاۋەلسىز مەملەكەت رەتىندە 1994 جىلدان بەرى تۇراقتى تۇردە قاتىسىپ كەلە جاتقان قازاقستان ۇلتتىق قۇراماسى بيىل رەتتىك سان بويىنشا اق قار, كوك مۇز ۇستىندە وتەتىن الامانعا جەتىنشى رەت قاتىسپاق. بۇعان دەيىنگى التى وليمپيا ويىندارىندا ەلىمىزدىڭ سپورتشىلارى جەتى مەدال جەڭىپ العان. تارقاتىپ ايتار بولساق, 1994 جىلى نورۆەگيانىڭ ليللەحامەر قالاسىندا وتكەن ءتورت جىلدىقتىڭ باستى باسەكەسىندە شاڭعىشى – ۆلاديمير سميرنوۆتىڭ جالعىز ءوزى ءبىر التىن جانە ەكى كۇمىس مەدال يەلەنىپ, ايدى اسپانعا ءبىر-اق شىعاردى.
جاپونيانىڭ ناگانو قالاسىندا جالاۋى جەلبىرەگەن كەلەسى اق وليمپيادادا وتانداستارىمىز ەكى قولا مەدالدى قاناعات تۇتتى. ءبىرىن ۆلاديمير سميرنوۆ ولجالاسا, ەكىنشى قولا مەدالدى كونكيمەن جۇگىرۋ سپورتىنىڭ وكىلى ليۋدميلا پروكاشەۆا يەلەندى. مۇنان كەيىنگى ەكى وليمپيادادا (2002 جىل, سولت-لەيك-سيتي (اقش), 2006 جىل, تۋرين (يتاليا) سپورتشىلارىمىز تۇعىر بيىگىنەن كورىنە الماي, ەلگە جۇلدەسىز ورالدى. ال 2010 جىلى ۆانكۋۆەردە (كانادا) وتكەن كەزەكتى وليمپيادادا كۇللى قازاقستان ەلەنا حرۋستالەۆانىڭ (بياتلون) كۇمىسىن قاناعات تۇتسا, 2014 جىلعى سوچي وليمپياداسىندا دەنيس تەننىڭ (مانەرلەپ سىرعاناۋ) جالعىز قولاسى قازاقستان قۇراماسىن جۇلدەسىز قايتۋدان قۇتقارىپ قالدى. مىنە, قىسقى وليمپيا ويىندارىندا قازاقستان قۇراماسىنىڭ سپورتشىلارى ءجۇرىپ وتكەن قىسقاشا جولى وسىنداي. ال بيىلعى قىسقى وليمپيا ويىندارىندا قاي سپورتشىلارعا ءۇمىت ارتامىز؟ وسى سۇراق توڭىرەگىندە از-كەم توقتالىپ وتسەك.
پحەنچحاندا وتەتىن قىسقى وليمپيا ويىندارىندا قۇراما قورجىنىنا كىم مەدال سالادى دەپ ساۋال تاستالسا, 10 ادامنىڭ توعىزى مانەرلەپ سىرعاناۋشى دەنيس تەننىڭ ەسىمىن اتاۋى مۇمكىن. ويتكەنى ول وسىدان ءتورت جىل بۇرىنعى وليمپيادانىڭ سوڭعى كۇندەرى قولا مەدال العان ەدى. دەگەنمەن, سوچي وليمپياداسىنان ەلگە اقپارات تاراتقان سپورت ءجۋرناليسى رۋسلان مەدەلبەكتىڭ ايتۋىنشا, تەن پحەنچحاندا ۇزدىك 10 سپورتشىنىڭ قاتارىنا كىرسە, قازاقستان ءۇشىن دە, ءوزى ءۇشىن دە ۇلكەن جەڭىس ەكەنىن ايتادى. «ارينە, دەنيس تەننىڭ ۇزدىك ۇشتىككە ەنىپ, مەدال العانىن قالايمىن. بىراق, ونىڭ قازىرگى باعدارلاماسى تەك ۇزدىك وندىققا جەتسە جاقسى ناتيجە دەپ ەسەپتەۋگە بولادى. ەگەر وليمپياداعا دەيىن ول جاڭا باعدارلاما دايىندايتىن بولسا, جۇلدەگەرلەر قاتارىنان كورىنىپ قالۋى مۇمكىن. ونىڭ قازىر ورىنداپ جۇرگەن باعدارلاماسىنان ۇزدىك سەگىز باعدارلاما بار. سوندىقتان ءوز باسىم تەننەن جۇلدە كۇتەمىن دەپ ايتا المايمىن. ال ەليزابەت تۇرسىنباەۆاعا كەلەر بولساق, ونىڭ باعدارلاماسى تەك ۇزدىك بەستىككە عانا جەتەدى», دەيدى ر.مەدەلبەك.
قاي سپورتشىدان ناتيجە كۇتۋگە بولادى دەگەن سۇراعىمىزعا رۋسلان مەدەلبەك فريستايلشىلار – يۋليا گالىشەۆا مەن دميتري رەيحەردتىڭ جۇلدەگە تالاسۋعا مۇمكىندىكتەرى بار ەكەنىن ايتادى. «30-عا تولعان بياتلونشى الەكسەي پولتورانين ءبىر عاجايىپ بولىپ وردا بۇزباسا, ول سپورتشىنىڭ دا جۇلدە الۋى قيىن. مەنىڭ بولجامىم بويىنشا, بۇل وليمپيادادا قازاقستان قۇراماسى ءبىر مەدال الۋعا مۇمكىندىگى بار. ول مەدالعا ۇمىتكەر گالىشەۆا مەن رەيحەردتىڭ ءبىرى», دەدى ول.
بۇل پىكىرمەن ۇلتتىق شتاتتىق كوماندالار جانە سپورت رەزەرۆى ديرەكتسياسىنىڭ وكىلى ايدوس رىمقۇل دا كەلىسىپ وتىر. ونىڭ ايتۋىنشا, بيىلعى اق وليمپيادادا فريستايلشىلار ءبىر جۇلدە الۋى مۇمكىن. «پحەنچحاندا فريستايل قۇراماسى ءبىر مەدال الادى دەپ توپشىلاپ وتىرمىن. گالىشەۆا كەم دەگەندە قولا مەدالعا قول جەتكىزۋگە قاۋقارلى. باسقا سپورتشىلاردا ءۇمىت از. بياتلونشىلار ۇزدىك توپ-15-ءتىڭ قاتارىنا ەنەتىن شىعار. ەگەر كونكيشى كرەچ بابىندا بولسا, بالكىم ول دا جۇلدەگە تالاسۋىنا بولادى. مەنىڭشە, مەدالدى فريستايلشىلار الادى. رەيحەردتەن دە ءۇمىت كۇتۋگە بولار ەدى, بىراق ول سوڭعى كەزدەرى تۇراقسىز ونەر كورسەتىپ ءجۇر. گالىشەۆانىڭ مەدال الۋى كانادالىق اپالى-ءسىڭلىلى قىزداردىڭ دايىندىعىنا بايلانىستى دەپ ايتار ەدىم. سەبەبى ولاردىڭ دايىندىعى ورتاشا بولسا دا جەتىپ جاتىر, تورەشىلەر سۇيرەپ شىعادى», دەيدى ا.رىمقۇل.
راس, سوڭعى ۋاقىتتا فريستايلشىلار يۋليا گالىشەۆا مەن دميتري رەيحەردتىڭ ناتيجەلەرى كوڭىل كونشىتەرلىك. وتكەن ايدا قىتايدىڭ Secret Garden تاۋ-شاڭعى كۋرورتىندا فريستايلدان الەم كۋبوگىندا گالىشەۆا مەن رەيحەرد ءبىر التىن, ەكى كۇمىس مەدال جەڭىپ الدى.
موگۋل جارىسىنىڭ ءبىرىنشى كۇنىندە گالىشەۆا 77,79 ۇپايمەن ەكىنشى ورىن يەلەنسە, امەريكالىق سپورتشى دجەلين كاۋف 77,90 ۇپاي جيناپ, الەم كۋبوگىنىڭ جەڭىمپازى اتاندى. ال ەكىنشى كۇنگى گراند-فينال باسەكەسىندە يۋليا گالىشەۆا جوعارىداعى قارسىلاسىن ارتقا تاستاپ, التىن مەدالعا قول جەتكىزدى. بۇل سىندا امەريكالىق سپورتشى ەكىنشى, كانادالىق فريستايلشى ءۇشىنشى ورىن الدى. ەرلەر اراسىنداعى گراند-فينالدا دميتري رەيحەرد 84.92 ۇپايمەن كۇمىس مەدال ەنشىلەدى. كانادالىق ميكاەليا كينگسبەري التىن (85.94), اۋستريالىق مەتت گرەحەم (82.96) قولا مەدالدى قاناعات تۇتتى. جارىستىڭ ءبىرىنشى كۇنىندە دميتري رەيحەرد 36-شى ورىننان كورىنگەن ەدى.
بيىلعى اق وليمپيادادا باستى ءۇمىتىمىز فريستايلشىلار بولماق. وليمپياداعا دەيىن ەكى سپورتشىمىز ءتورت الەم كۋبوگىنا قاتىسىپ, دايىندىقتارىن ودان ءارى شىڭداپ, پحەنچحانعا اتتاناتىن بولادى.
ءالي بيتورە,
«ەگەمەن قازاقستان»
