«ەگەمەن قازاقستاننىڭ» ارنايى جوباسى: جاسامپازدىق جەمىستەرى
جيىرما جىلدىڭ ىشىندە اتقارىلعان يگى ىستەردىڭ ارقاسىندا ءاربىر ءوڭىرىمىز وزگەرىپ, ءومىرىمىز جاقسارىپ كەلەدى. «ەگەمەن قازاقستان» گازەتى وسىنداي وركەندى وزگەرىستەردى بەينەلەيتىن ماتەريالداردى تۇراقتى جاريالاپ تۇرادى. تومەندە وڭتۇستىك قازاقستان وبلىسىنىڭ وتىرار اۋدانىنان فوتورەپورتاج بەرىلىپ وتىر. 
“ ۇلى وتىرار – قازاق وركەنيەتىنىڭ التىن دىڭگەگى”. ەلباسىمىز ايتقان وسى قاناتتى سوزدە ۇلكەن ماعىنا جاتىر. ەجەلگى وتىرار ءوز ۋاقىتىندا الەمدەگى ەڭ دامىعان قالالاردىڭ ءبىرى بولعان. ءابۋ ناسىر ءال-فارابيدەن بولەك, فارابتان شىققان عۇلامالاردىڭ عىلىمي ەڭبەكتەرى الەمدىك وركەنيەتتىڭ دامۋىنا سۇبەلى ۇلەس قوسقان. وتىرار اۋدانىنىڭ اكىمى بەيبىت سىزدىقوۆ “پرەزيدەنتىمىزدىڭ تىكەلەي پارمەنىمەن “مادەني مۇرا” مەملەكەتتىك باعدارلاماسى قابىلدانىپ, سونىڭ اياسىندا “كونە وتىراردى قالپىنا كەلتىرۋ” باعدارلاماسى قابىلدانىپ, اۋدانىمىزداعى تاريح جانە مادەنيەت ەسكەرتكىشتەرىن ەل يگىلىگىنە اينالدىرۋعا مۇمكىندىك تۋدى” دەيدى. بەيبىت شالدار ۇلىنىڭ ايتقانىنداي-اق اكىم قۋانىش ايتاحانوۆ ءوز كەزەگىندە وتىراردىڭ جەر استىنداعى تاريحىن جەر بەتىنە جارقىراتىپ شىعارسا, بەيبىت سىزدىقوۆ كەشەگى مەن بۇگىننىڭ اراسىن ادەمى جالعاپ جاتىر. اۋداننىڭ الەۋەتىن كوتەرىپ, سورتاڭ تارتقان بوز دالاعا سۋ شىعاردى. شاعىن جانە ورتا كاسىپكە ەكپىن بەردى. جاقىندا تاۋەلسىزدىكتىڭ 20 جىلدىعى قارساڭىندا وتىراردا كۇش اتاسى قاجىمۇقاننىڭ 140 جىلدىعى مەن ۇلت رۋحانياتىنىڭ ۇستازى اتانعان وزبەكالى جانىبەكوۆتىڭ 80 جىلدىعى لايىقتى اتالىپ ءوتتى. الىس جانە جاقىننان مارتەبەلى قوناقتار كوپ كەلدى. “قوبىز بەن دومبىرا” كومپوزيتسياسىندا وتكەن راسىمنەن سوڭ, “جىبەك جولى” داڭعىلى سالتاناتتى تۇردە اشىلدى. 
تاۋەلسىزدىك مەرەكەسىنە وتىرارلىقتار ەرەكشە دايىندىقپەن كەلىپتى. اۋدانعا كىرەبەرىستە وڭ جاقتا “قازاقستان تاۋەلسىزدىگىنە 20 جىل” اتتى ساياباقتا قازاقتىڭ ايتۋلى ءۇش بيىنە اسقاقتاعان ەسكەرتكىش ورناتىلعان. باسقا دا تاعىلىمدى دۇنيەلەرى كوپ. زامانىندا دۇنيە ءجۇزى بالۋاندارى اراسىندا قازاق قاجىمۇقاندى ەركىن ەڭسەردىم دەگەن بالۋان بولعان ەمەس. سپورت كەشەنى الدىندا قازاق باتىرىنا ورناتىلعان ەسكەرتكىش ەلدىكتىڭ ايقىن بەلگىسىندەي تانىلادى. قوناقتار ءابۋ ناسىر ءال-ءفارابيدىڭ مۇراجايىمەن تانىسقاننان كەيىن, ىرگەلەس ساياباقتا رۋح ساردارى وزبەكالى جانىبەكوۆتىڭ ەسكەرتكىشىن اشىپ, گۇل شوقتارىن قويدى. وسى ولكەدەگى اقىن-شايىرلار اللەياسىنان كەيىن وزبەكالى جانىبەكوۆتىڭ مۇراجايى اشىلدى. سانالى عۇمىرىندا قازاق جادىگەرلەرىن تىرنەكتەپ جيناپ, ۇلت مەرەيىن اسقاقتاتۋعا بار كۇش-جىگەرىن جۇمساعان تۇلعا تويىنا سوناۋ قوستاناي, تورعايدان قوناقتار كەلىپتى. مۇراجاي جانىنا جانىبەكوۆتىڭ قولى تيگەن ەكى كيىز ءۇي تىگىلىپ, ىشىنە وزەكەڭنىڭ ءوزى تۇتىنعان كونە بۇيىمدارى, ءۇي جابدىقتارى قويىلىپتى. سول كۇنى مادەني ءىس-شارا مادەنيەت سارايىندا وتكەن قوس الىپتىڭ رەسپۋبليكالىق عىلىمي-تاجىريبەلىك كونفەرەنتسياسىنا ۇلاستى. كونفەرەنتسيانى 
ءو.جانىبەكوۆتىڭ تالىمىنەن وتكەن بەلگىلى عالىم قۇلبەك ەرگوبەك جۇرگىزىپ وتىردى. وندا قازاقستان كاسىپوداقتار فەدەراتسياسىنىڭ پرەزيدەنتى س.مۇقاشەۆ, ەڭبەك ارداگەرى د.بوپوۆا, اكادەميك ءو.ايتباي ۇلى, پارلامەنت ءماجىلىسىنىڭ دەپۋتاتى ش.مىرزاحمەتوۆ, اقىن-جازۋشىلار م.شاحانوۆ, ن.مۇقاتوۆ سياقتى ازاماتتار ءسوز الىپ, ەكى تۇلعا جونىندە تاعىلىمدى ويلارىن ايتتى. الداعى ۋاقىتتا اتقارىلاتىن مىندەتتەر بەلگىلەندى. وسى كەشتە “كونە وتىرار وركەنيەتى”, “رۋح ساردارى”, “بالۋان بابا” جانە “وتىرار القابىنىڭ اقىندارى” اتتى كىتاپتاردىڭ تۇساۋكەسەر ءراسىمى ءوتتى. ونداعان جىلداردىڭ ەنشىسىنە سالساڭ دا ولقى بولمايتىن وسىنداي تابىستارعا وتىرار ءبىر-اق جىلدا جەتتى. بۇل – تاۋەلسىزدىكتىڭ ءتاتتى جەمىسى. 
ارنايى بەتتى دايىنداعان «ەگەمەن قازاقستان» گازەتىنىڭ وڭتۇستىك قازاقستان وبلىسىنداعى مەنشىكتى ءتىلشىسى باقتيار تايجان, سۋرەتتەردى تۇسىرگەن بەرەكە قويشىباي ۇلى.
