كوميتەت توراعاسى داريعا نازارباەۆا باستاعان دەپۋتاتتار ءبىرىنشى ۇلتتىق عارىش ورتالىعىنا كەلىپ, جاڭادان اشىلعان عارىش تەحنيكالارىن قۇراستىرۋ بيۋروسىنا باردى. ساپار بارىسىندا «حالىق قالاۋلىلارى» بيۋرونىڭ وندىرىستىك ۋچاسكەلەرىن ارالاپ, اتقارىلىپ جاتقان جۇمىستارمەن تانىستى. عارىشتىق اپپاراتتاردى قۇراستىرۋ جانە سىناۋ كەشەنىنىڭ تسەحىندە بولىپ, كورسەتىلىم گالەرەياسىن, ۇشۋدى باسقارۋ ورتالىعىن تاماشالادى.
سودان كەيىن قورعانىس جانە اەروعارىش ونەركاسىبى ءمينيسترى بەيبىت اتامقۇلوۆ دەپۋتاتتارعا وسى سالادا يگى ىستەرمەن تانىستىردى. ونىڭ ايتۋىنشا, كەيىنگى جىلدارى قازاقستاندىق جەر سەرىكتەرىنە شەتەلدىكتەردىڭ قىزىعۋشىلىعى ارتقان.
«اۋعانستان تاراپى ءبىزدىڭ سپۋتنيكتەرگە قىزىعىپ وتىر. بۇدان بولەك, تۇركىمەنستان ەلىمىزدىڭ جەر سەرىگى كەسكىنىنە تاپسىرىس بەردى. وزبەكستاندا تەلەكوممۋنيكاتسيالىق سپۋتنيك بولماعاندىقتان, ولارعا بايلانىس قىزمەتىن ۇسىندىق. الداعى ۋاقىتتا ۇلتتىق عارىش ورتالىعى Airbus كومپانياسىمەن بىرگە كونكۋرسقا ءتۇسۋدى كوزدەپ وتىر. چيلي مەن پەرۋ دە قازاقستاندىق جەر سەرىگى كەسكىنىن قىزىعاتىنىن جەتكىزدى», دەدى ب.اتامقۇلوۆ.
بۇدان بولەك, ۆەدومستۆو باسشىسى جەر سەرىگىنىڭ تيىمدىلىگى قالاي قولدانىلىپ جاتقانىن جونىندە اڭگىمەلەپ بەردى. ونىڭ ايتۋىنشا, الماتى قالاسىندا جول ەرەجەسىن بۇزعان كولىكتەردى انىقتايتىن عارىشتىق باقىلاۋ جۇيەسى ەنگىزىلگەن. سونىڭ ناتيجەسىندە, جۇزدەن استام ەرەجە بۇزۋ تىركەلگەن. ءمينيستردىڭ ايتۋىنشا, زاڭسىز جەر باسىپ الۋشىلاردى, ەسىرتكى القابىن, جاسىرىن كونتراباندانى, جول ساپاسىن جەر سەرىگى ارقىلى انىقتاۋعا مۇمكىندىك بار.
«سپۋتنيكتەردىڭ كومەگى ارقىلى ءتۇرلى سالادا مونيتورينگ جۇرگىزىلەدى. ماسەلەن, اۋىل شارۋاشىلىعىندا بىرقاتار مىندەت جۇكتەلگەن. جەر سەرىگى ارقىلى توپىراقتىڭ ىلعالىن, ەگىننىڭ ونىمدىلىگىن, جەردى دۇرىس پايدالانۋ ماسەلەلەرىن باقىلايمىز», دەدى ب.اتامقۇلوۆ.
بۇدان كەيىن دەپۋتاتتار «ەۋروكوپتەر قازاقستان ينجينيرينگ» جشس تىكۇشاق قۇراستىرۋ جانە قىزمەت كورسەتۋ زاۋىتىنا بارىپ, وندىرىستىك الاڭدارمەن, سەرۆيستىك جانە اۆياتسيالىق وقىتۋ ورتالىقتارىن ارالادى.
اباي اسانكەلدى ۇلى,
«ەگەمەن قازاقستان»
سۋرەتتى تۇسىرگەن ەرلان ومار
