بۇل ەكى وقيعادان دا م.تىنىشباەۆ اتىنداعى قازاق كولىك جانە كوممۋنيكاتسيالار اكادەمياسىنىڭ ستۋدەنتتەرى شەت قالعان جوق. ولاي دەيتىنىمىز, ەلىمىزدىڭ ەڭ ۇلكەن مەگاپوليسىندە نازارباەۆ داڭعىلىنىڭ پايدا بولۋى ۋاقىت تالابىنا ساي وقيعا, سەبەبى, اكادەميا جاستارى ەلباسىنىڭ تاۋەلسىز قازاقستان رەسپۋبليكاسىنىڭ ىرگەتاسىن قالاپ, شەكاراسىن نىق بەكىتىپ, ەكونوميكالىق-الەۋمەتتىك رەفورمالاردى جۇزەگە اسىرىپ, بولاشاققا باعدار بەرگەن تۇڭعىش پرەزيدەنتىمىزدىڭ حالىق الدىنداعى ەڭبەگى وراسان زور دەپ سانايدى. ۇلت تىرەگى – ەلباسىنىڭ جىل سايىنعى حالىققا جولداۋلارىن ء«بىزدىڭ ماقساتىمىز ايقىن, باعىتىمىز بەلگىلى» دەپ باستاۋى دا بوس ءسوز ەمەس, دەيدى ستۋدەنتتەر قاۋىمى.
ال مانشۇك اپامىزدىڭ 95 جىلدىق مەرەيتويىنا كەلسەك, قازاقتىڭ داڭقتى دا باتىر قىزدارى مانشۇك پەن ءاليا ەرلىكتەرىنە تاعزىم ەتىپ, ولاردى ۇلىقتاۋ باعىتىندا اكادەميادا بۇگىنگى تاڭدا ءبىراز جۇمىستار اتقارىلعان. سونىڭ ايعاعى رەتىندە اكادەميانىڭ دوتسەنتى, ۇلتجاندى ازامات كەڭەس ءجۇسىپوۆتىڭ باستاماسىمەن ستۋدەنتتەردەن قۇرالعان دەلەگاتسيالاردىڭ باتىر اپالارىمىز جەرلەنگەن رەسەيدىڭ پسكوۆ وبلىسىنا جاساعان ساپارلارىن ايتۋعا بولادى. ونىڭ ءبىرى – 2010 جىلى ۇلى جەڭىستىڭ 65 جىلدىعى قارساڭىندا ۇيىمداستىرىلسا, ەكىنشىسى – 2016 جىلى نوۆوسوكولنيكي قالاسىنىڭ 115 جىلدىق مەرەيتويىنا وراي ءوتتى. قوس ساپار دا اكادەميا رەكتورى ب.م.قۋانىشەۆتىڭ قارجىلاي كومەك كورسەتىپ, قولداۋىنىڭ ارقاسىندا جۇزەگە اسقان. ساپارلار بارىسىندا دەلەگاتسيا مۇشەلەرى باتىر قىزدار بەيىتتەرىنە گۇل شوقتارىن قويىپ, باس ءيىپ, تاعزىم ەتىپ, قۇران باعىشتادى, اسكەري داڭق مۋزەيلەرىن ارالادى, جەرگىلىكتى تۇرعىندارمەن, ونىڭ ىشىندە جاستار مەن سوعىس جانە ەڭبەك ارداگەرلەرىمەن كەزدەستى, باتىر قىزدار ەرلىكتەرىن پسكوۆتىقتارمەن بىرگە ەسكە الدى.
سونداي-اق نوۆوسوكولنيكي قالاسىنىڭ مادەنيەت ۇيىندە وتكەن «سىزدەردىڭ ەرلىكتەرىڭىز – ءبارىمىزدىڭ جۇرەگىمىزدە!» اتتى تاقىرىپتىق كەشكە بەلسەنە قاتىسىپ (2010 ج), «رەسەي مەن قازاقستان: ءبىر جولمەن» تاقىرىبىندا وتكىزىلگەن حالىقارالىق عىلىمي-پراكتيكالىق كونفەرەنتسيادا باياندامالار (2016 ج) جاسادى. وسىلايشا, جاستارىمىز قازاق جانە ورىس حالقى دوستىعىنىڭ نىعايۋىنا ءوز ۇلەستەرىن قوسىپ, اتسالىستى. ساپاردان سوڭ دا باتىر قىزدار ەرلىگىن جاس ۇرپاققا ناسيحاتتاۋ ماقساتىندا الماتىداعى جوعارى وقۋ ورىندارى جانە كوللەدج ستۋدەنتتەرى مەن مەكتەپ وقۋشىلارى اراسىندا كۋراتورلىق ساعاتتار, دوڭگەلەك ۇستەلدەر مەن تاقىرىپتىق كەشتەر وتكىزدى.
وسى ەلەۋلى وقيعاعا وراي اكادەميانىڭ ءبىر توپ ستۋدەنتتەرىنە بۇرناعى جىلدارى بەس مىڭعا جۋىق شاقىرىمدى ارتقا تاس-
تاپ, باتىر اپالار ەرلىگىنە سوناۋ نەۆەل مەن نوۆوسوكولنيكيگە بارىپ باس يگەندە, نەگە قالاداعى مانشۇك مەكتەبىنە بارىپ قايتپاسقا دەگەن وي كەلەدى. سول سەبەپتى, «كولىك تەحنيكاسى» فاكۋلتەتىنىڭ ءبىر توپ ستۋدەنتتەرى دوتسەنت كەڭەس ءجۇسىپوۆتىڭ باسشىلىعىمەن قازاقستاننىڭ تاۋەلسىزدىك مەرەكەسى قارساڭىندا نازارباەۆ داڭعىلىمەن ماقتانىشپەن ءجۇرىپ ءوتىپ, №28 مەكتەپ-ليتسەيدە اشىلعان مانشۇك اپامىزدىڭ ەسكەرتكىش-بيۋستىنە گۇل شوقتارىن قويىپ, ماڭگى وشپەس ەرلىگىنە تاعى دا ءبىر تاعزىم ەتتى. سونان سوڭ مەكتەپ ديرەكتورى ايسۇلۋ مەدەتبەكوۆامەن بىرگە باتىر قىز مۇراجايىن ارالاپ, اتى اڭىزعا اينالعان اپالارىنىڭ ومىرىنەن قوسىمشا دەرەكتەرگە قانىقتى.
مانشۇك اپامىز اتالمىش مەكتەپتە 1931-1937 جىلدارى ءبىلىم العان ەكەن. بۇگىندە ىرگەتاسى 1932 جىلى قالانعان بۇل ءبىلىم ورداسى جاس ۇرپاققا رۋح بەرەر ەرلىكتىڭ ۇلگىسى ىسپەتتى. ولاي دەيتىن سەبەبىمىز, سوناۋ سۇراپىل وتتى جىلدارى مايدانعا مەكتەپتىڭ 120 مۇعالىمى مەن وقۋشىلارى اتتانىپ, ولاردىڭ ىشىندە ۇشەۋى – مانشۇك مامەتوۆا, ۆلاديمير زاسيادكو, ۆلاديمير برەۋسوۆ كەڭەس وداعىنىڭ باتىرلارى اتاندى. ال مەكتەپكە باتىر قىزدىڭ ەسىمى 1960 جىلى بەرىلگەن.
مەكتەپكە ساپار بارىسىندا اكادەميا ستۋدەنتتەرى ەلباسى باستاماسىمەن جۇزەگە اسىپ جاتقان «مادەني مۇرا» مەملەكەتتىك باعدارلاماسى اياسىندا ارداگەر ۇستاز, مۋزىكاتانۋشى, قازاق مۋزىكاسى جايلى كوپتەگەن تەلەحابارلار اۆتورى, قازاقستان رەسپۋبليكاسى مادەنيەتىنە ەڭبەك سىڭىرگەن قايراتكەر يۋري پەتروۆيچ اراۆينمەن كەزدەسىپ, قازاقتىڭ حالىق مۋزىكاسى مەن اسپاپتارى جايلى ءدارىسىن تىڭدادى.
كەزدەسۋ سوڭىندا اكادەميا دەلەگاتسياسى مەكتەپ مۇراجايىنا سىيلىقتار جانە ءاليا مەن مانشۇك جايلى رەسەي گازەتتەرىنە شىققان ءوز ماتەريالدارىن تارتۋ ەتتى. ستۋدەنتتەر «باتىرىن قۇرمەتتەگەن قازاق حالقى باردا باتىر اپامىزدىڭ ەسىمى ەشقاشان ۇمىتىلمايدى» دەگەن وي تۇيىندەپ قايتتى.
گۇلزەينەپ سادىرقىزى,
«ەگەمەن قازاقستان»
