جەتىستىكتەرگە جەتە بەرەتىنىمىز ءسوزسىز
ەلىمىزدىڭ تۇڭعىش پرەزيدەنتى ن.ءا.نازارباەۆ حالىقتى يگى ىستەرگە جۇمىلدىرۋ, قوعامداعى تاتۋلىق پەن كەلىسىمدى نىعايتۋ, بۇكىل حالىقارالىق قوعامداستىقتىڭ ريزاشىلىعى مەن قۇرمەتىنە يە بولعان جاھاندىق جانە وڭىرلىك بەيبىت باستامالاردىڭ اۆتورى رەتىندە ەلدىڭ سىرتقى ساياسي باعىتىن ءدال ايقىنداۋ ىسىنە وراسان زور ۇلەسىن قوسىپ كەلەدى. مەملەكەت باسشىسىنىڭ جان-جاقتى سارالانعان ىشكى جانە سىرتقى ساياساتىنىڭ ارقاسىندا ەلىمىز ساياسي جانە الەۋمەتتىك-ەكونوميكالىق سىلكىنىستەرگە ۇشىراماي, سەرپىندى دامۋ ۇستىندە.
بارشا ۇلتتى باۋىرىنا باسقان باۋىرمال قازاق حالقى بىرەۋدى ارتىق, بىرەۋدى كەم كورمەگەن. تاتۋلىق پەن دوستىقتى وزىنە ەجەلدەن سەرىك ەتكەن. قازاقستان – ءوز ۇلتى, ءدىنى, ءتىلى, مادەنيەتى, تاريحى, سالت-ءداستۇرى بار قۇدىرەتتى ەل. قازاققا ءتان اتا-بابالارىمىزدان قالعان ار-نامىس, جىگەر-قايرات مۇرا رەتىندە كەلەشەك ۇرپاققا جەتكەن. وسى قالپىمىزدان تايىنباي, بارشانىڭ الدىندا سىيلاستىعى مول, بىرلىگى جاراسقان, قۇرمەتتەيتىن ەل بولساق مەرەيىمىز ارتىپ, جەتىستىكتەرگە جەتە بەرەتىنىمىز ءسوزسىز.
گۇلنار حودجابەكوۆا,
ماڭعىستاۋ وبلىسى توتەنشە جاعدايلار دەپارتامەنتىنىڭ
ءباسپاسوز حاتشىسى
ۋاقىتپەن بىرگە جاڭارعان «ەگەمەن»
كىتاپحاناشى بولۋ ابىرويلى قىزمەت بولعاندىقتان ەلدەگى بولىپ جاتقان ءار وزگەرىستى قالت جىبەرمەي باقىلاپ وتىرۋعا مىندەتتىسىڭ. وسى جاعىنان العاندا ءبىز ءۇشىن قوعامنىڭ بارلىق سالاسىن قامتىپ وتىرۋعا تىرىساتىن ەلىمىزدىڭ باس گازەتى «ەگەمەن قازاقستاننىڭ» ورنى بولەك. «قاعاز گازەتتىڭ ۋاقىتى ءوتتى, ەندى جۇرت جاڭالىقتى ينتەرنەت ارقىلى بىلەدى» دەگەن قاساڭ كوزقاراستى جوققا شىعارىپ, ۋاقىتپەن ۇندەسە جاڭارىپ كەلە جاتقان باسىلىمنىڭ ءبىرى وسى «ەگەمەن» دەپ ويلايمىن. قوعامدىق وقيعالاردىڭ ەڭ ماڭىزدىسىن بىلگىڭ كەلسە وقيتىن گازەت. ءار وڭىردە بولىپ جاتقان جايتتاردى قاعىس قالدىرمايدى, ەلىمىزدىڭ تۇكپىر-تۇكپىرىندە نە بولىپ جاتقانىن ءبىلۋ دە ارقايسىمىزعا ماڭىزدى. سوندىقتان شىعار, «ەگەمەنگە» شىعۋ وزگە باسىلىمدارعا شىعۋدان ماڭىزدىراق بولىپ تۇرادى. سوڭعى كەزدەرى ادەبيەت پەن مادەنيەتكە دە كوپ كوڭىل ءبولىپ ءجۇر. تانىمدىق ماتەريالدار دا ءجيى شىعادى. وسى قارقىنىن باسەڭدەتپەي ەلدىڭ جاي-كۇيىن ءجيى جازىپ تۇرسا دەيمىز. قوعامنىڭ كولەڭكەلى تۇستارىن باسقا ەمەس, باس گازەت جازسا, شەشىلۋى دە جىلدام ءارى وڭاي بولادى عوي دەپ ويلايمىن.
تاعى ءبىر قۋانتارلىعى – گازەتتىڭ ديزاينى. قاعازدىڭ ساپاسى دا ءبىز ءۇشىن ماڭىزدى. كەي گازەتتەر مايلانىپ, ۇستاساڭ قولىڭا جۇعىپ, كوپ وتپەي سارعايىپ كەتەدى. ال «ەگەمەن قازاقستان» وتە ساپالى. قاعازدىڭ ساپاسىنان باستاپ, ماقالالاردىڭ ورنالاسۋىنا دەيىن وتە ماڭىزدى. قولعا ۇستاۋعا دا ىڭعايلى. اشىپ قالعاندا جارقىراپ تۇرسا – قانداي جاقسى. سوسىن گازەتكە ورنالاستىرىلعان QR كود. بۇل دا كىتاپحاناشىلاردىڭ جۇمىسىن ءبىرشاما جەڭىلدەتتى. باياعىداعىداي كوشىرمە جاساپ اۋرە بولمايسىڭ, كەرەك ەتكەن ادام كود ارقىلى وزىنە كەرەكتى ءنومىردى جۇكتەپ الادى. بۇل دا وزگە باسىلىمدار ۇلگى الاتىن جايت. گازەت ۇجىمى «ەل گازەتى» دەگەن اتقا لايىق قىزمەت ەتە بەرەدى دەپ سەنەمىز.
قۇرالاي التىنبەكوۆا,
س.سەيفۋللين اتىنداعى
الماتى وبلىستىق امبەباپ
كىتاپحاناسىنىڭ ادىسكەرى
الماتى وبلىسى
ون ءبىر يمامعا جالاقى بەرەدى
ءدىن ىستەرى جانە ازاماتتىق قوعام مينيسترلىگىنىڭ باستاماسىمەن ەلىمىزدە ءارتۇرلى الەۋمەتتىك جوبالاردى قولداۋ ماقساتىندا «ۋاقىپ» كورپوراتيۆتىك قايىرىمدىلىق قورى قۇرىلعان بولاتىن. «ۋاقىپ» ءسوزى اراب تىلىنەن الىنعان, قايىرىمدىلىق ۇعىمىن بىلدىرەدى. اتالعان قوردىڭ قىزمەتى الەۋمەتتىك ءالسىز توپتار مەن مۇمكىندىگى شەكتەۋلى جاندارعا كومەك كورسەتۋگە, ءدىني ەكسترەميزمنىڭ الدىن الۋعا, يمامداردىڭ كاسىبي بىلىكتىلىگىن ارتتىرۋعا, ءدىن قىزمەتكەرلەرىنىڭ الەۋمەتتىك ماسەلەلەرىن شەشۋگە باعىتتالعان. قور قازىرگى قالىپتاسۋ كەزىندە دەمەۋشىلەردىڭ كومەگىنە ارقا سۇيەپ وتىر. وسى قور ارقىلى بىلىكتى يمامداردى اۋىلدىق جەرلەرگە تارتۋعا ىنتالاندىرۋ, يمامداردىڭ جالاقىسىن كوتەرۋ, مەشىتتەردىڭ كوممۋنالدىق شىعىندارىن تولەۋگە كومەكتەسۋ سىندى بىرقاتار قوردالانعان ماسەلەلەردى شەشۋ جوسپارلانۋدا. بۇگىنگى تاڭدا وبلىس اۋماعىندا اتالعان قوردى تانىستىرۋ جۇمىستارى جۇرگىزىلدى. قازىر ءوڭىر بويىنشا 11 يمام «ۋاقىپ» قورىنىڭ دەمەۋشىلىگىمەن ايلىق جالاقىمەن قامتاماسىز ەتىلىپ وتىر.
داۋلەت قاجى قابيبولدين,
وبلىستىق «حاليفا التاي» مەشىتىنىڭ
نايب يمامى
وسكەمەن
تابيعاتى ەرەكشە ەدى
مەن ناعاشى اپام وڭالاي قالىبەكوۆانى اركەز ماقتان تۇتامىن, ۇلگى ەتەمىن. وڭالاي – شەشەمنىڭ ءسىڭلىسى. بۇل اپاتايىم تۋرالى قانشا ايتسام دا ەستەلىكتەرىم جىر-داستان سەكىلدى تاۋسىلمايدى. ول ون ءبىر بالا تاربيەلەپ وسىرگەن ناعىز باتىر انا. ءبارى دە جوعارى ءبىلىم العان, ءار سالادا قىزمەت ەتەدى. جەتىجىلدىق ورتالاۋ مەكتەپتى ءبىتىرىپ, كارى اكە-شەشەسىنە قارايلاپ وقي الماي قالدى. ون جەتى جاسىندا تۇرمىس قۇردى. ءوزىنىڭ بالالارىنا توعىز جاستاعى ءسىڭلىسى تولعانايدى قوسىپ, بارلىعىن دا اياعىنان تىك تۇرعىزدى. جەزدەم جانايداردى دا وقىتىپ, بىلدەي ينجەنەر-مەحانيك ەتىپ شىعاردى. تابيعات وعان ولەڭ جازۋ, سۋىرىپسالمالىق سياقتى تۋما قاسيەتتى اياماي بەرە سالعان. شابىتى كەلگەندە كۇي تالعاماستان وتىرعان جەرىندە البوم, بلوكنوتتىڭ ىشىنە جازىپ تاستايتىن. ارتىنا وسىنشا مول مۇرا قالدىراتىنىن بىلگەن جوقپىز. كەيىنگى ۇرپاقتارى «جىر داپتەرىم, بالالارىما ارناعان سىر داپتەرىم» دەگەن ولەڭدەر جيناعىن باستىرىپ شىعاردى. اۋىلداعى ايەلدەر كەڭەسىنىڭ ءتورايىمى بولدى, «اجەلەر» ءانسامبلىن قۇردى. بىردە بەلگىلى قوعام قايراتكەرى مۇرات اۋەزوۆپەن كەزدەسۋ وتكەندە اپامىز ەشقانداي قاعازعا قاراماستان تولعانا, شابىتتانا سويلەگەنى بار. سوندا مۇرات مۇحتار ۇلى «ەل ىشىندەگى تۋما تالانتتار عوي», دەپ تامسانعان. ۋاقىت كوشىن اعىسى قاتتى, تولقىنى اساۋ تايداي تۋلاعان تەلەگەي تەڭىزگە تەڭەيتىن بولساق, ونىڭ اراسىندا جۇتىلىپ كەتپەي ءوز جولىن تاپقانىنا, ارتىنا ۇمىتىلماس ۇلگى-ونەگە قالدىرعانىنا شۇكىرشىلىك دەيمىز.
ورىنشا ءجۇنىسوۆا,
ەڭبەك ارداگەرى
سولتۇستىك قازاقستان وبلىسى,
م. جۇماباەۆ اۋدانى
