«نۇرلى جول» مەملەكەتتىك باعدارلاماسى اياسىندا جامبىل وبلىسىندا تۇرعىن ءۇي قۇرىلىسى نەگىزىندە «اراي» القابىنان 19 ءۇيدىڭ جوباسى بەكىتىلگەن. ونىڭ ىشىندە جالپى قۇنى 8,57 ميلليارد تەڭگەگە 2015-2017 جىلدارى 1245 پاتەرلى 15 تۇرعىن ءۇي پايدالانۋعا بەرىلدى. ال قالعان 4 ءۇي مەملەكەتتىك «نۇرلى جەر» باعدارلاماسىنا اۋىسقان. ءبىر قۋانارلىعى, وڭىردە اسىرەسە جاس وتباسىلار باسپانالى بولىپ, قونىس تويى كوبەيدى. اعىمداعى جىلدىڭ وزىندە استانا كۇنى قارساڭىندا 800 پاتەر پايدالانۋعا بەرىلگەن ەدى. بۇل دا وڭىردە بۇگىنگى تاڭدا حالىقتى تۇرعىن ۇيمەن قامتۋعا باسا نازار اۋدارىلىپ وتىرعانىن كورسەتەدى.
وڭىردە اعىمداعى جىلدان باستاپ مەملەكەتتىك «نۇرلى جەر» باعدارلاماسى اياسىندا كوپ قاباتتى جانە ءبىر ۇلگىدەگى جەكە تۇرعىن ۇيلەردىڭ قۇرىلىسى باستالدى. «باعدارلاما جوسپارى بويىنشا اعىمداعى جىلى رەسپۋبليكالىق بيۋدجەتتەن كوپ قاباتتى ۇيلەر قۇرىلىسىنا بولىنگەن 1,56 ميلليارد تەڭگەگە جالپى اۋدانى 17,7 مىڭ شارشى مەتر نەمەسە 258 پاتەرلى 4 ءۇيدىڭ قۇرىلىسى جۇرگىزىلۋدە. 178 پاتەرلى 3 ءۇي ۇستىمىزدەگى جىلى پايدالانۋعا بەرىلەدى. ال 5,8 مىڭ شارشى مەتر نەمەسە 80 پاتەرلى 1 ءۇيدىڭ قۇرىلىسى جوسپار بويىنشا 2018 جىلى اياقتالادى», دەيدى وبلىس اكىمىنىڭ ورىنباسارى عالىمجان ءابدىرايىموۆ.
بۇدان بولەك جەرگىلىكتى بيۋدجەتتەن جۇمىستى جالعاستىرۋ ماقساتىندا 37 كوپ قاباتتى ءۇيدىڭ جوبالاۋ-سمەتالىق قۇجاتتارىن دايىنداۋعا 236 ميلليون تەڭگە ءبولىنىپ وتىر. بۇگىنگى تاڭدا 26 كوپ قاباتتى ءۇيدىڭ ساراپتاما قورىتىندىلارى دايىن. اتالعان جوبالاردىڭ نەگىزىندە 2017-2018 جىلدارعا جوسپارلانعان جالپى قۇنى 5,843 ميلليارد تەڭگەگە اۋدانى 57,7 مىڭ شارشى مەتر نەمەسە 1070 پاتەرلى 13 ءۇيدىڭ قۇرىلىسى باستالدى. بۇل جوبا كەلەسى جىلى اياقتالىپ, تاعى دا مىڭداعان وتباسىنىڭ باسپانالى بولۋعا مۇمكىندىگى بار. اتالعان جوبا جۋىردا عانا اۋليەاتا جەرىنە ارنايى جۇمىس ساپارىمەن كەلگەن ۇكىمەت باسشىسى باقىتجان ساعىنتاەۆقا تانىستىرىلعان بولاتىن.
كەلەسى جىلدان باستاپ تاراز قالاسىنداعى «اۆتوبەكەت» ماڭىنان 14-شاعىن اۋدان سالىنادى. بۇگىندە بۇل ماقساتقا 100 گەكتار جەر ءبولىنىپ, 44,35 شاقىرىم اۋماققا سۋ, كارىز, گاز, ينجەنەرلىك جۇيەلەر قۇرىلىسى جۇرگىزىلۋدە. جىلۋ جانە ەلەكتر جۇيەلەرىن تارتۋ 2018-2019 جىلدارى اياقتالاتىن بولادى. ال ى.سۇلەيمەنوۆ كوشەسىنىڭ سوڭىنان بوي كوتەرەتىن 15-شاعىن اۋدان قۇرىلىسىنا 362,2 گەكتار جەر ءبولىنىپ, مەملەكەتتىك «نۇرلى جەر» باعدارلاماسى اياسىندا 922 ءبىر ۇلگىدەگى جەكە تۇرعىن ءۇي قۇرىلىسىن جۇرگىزۋ جوسپارلانىپ وتىر. بۇگىنگى تاڭدا بۇل جەرگە 139,8 شاقىرىم سۋ, كارىز, گاز, ينجەنەرلىك جۇيەلەر تارتىلۋدا. ال مۇنداعى جىلۋ جانە ەلەكتر جۇيەلەرى 2018-2019 جىلدارى اياقتالادى دەپ جوسپارلانعان.
بۇگىنگى تاڭدا وبلىستا جەكە تۇرعىن ءۇيدىڭ 1 شارشى مەترىنىڭ قۇنى 120 مىڭ تەڭگە بولىپ وتىر. سونىمەن قاتار رەسپۋبليكالىق بيۋدجەتتەن بولىنەتىن 3,6 ميلليارد تەڭگەگە 300 ءبىر ۇلگىدەگى جەكە ۇيلەردى تۇرعىزىپ, قازاقستان تۇرعىن ءۇي قۇرىلىس جيناق بانكى ارقىلى بانك سالىمشىلارىنا ساتۋ كوزدەلگەن. وبلىس اكىمدىگىنىڭ مالىمەتىنشە, اعىمداعى جىلعا بەكىتىلگەن, سونداي-اق بارلىق قاراجات كوزدەرىنەن سالىناتىن تۇرعىن ءۇي قۇرىلىسىنىڭ اۋدانى 319,6 مىڭ شارشى مەتر بولسا, قازىرگى كەزدە 293,2 مىڭ شارشى مەتر تۇرعىن ءۇي پايدالانۋعا بەرىلگەن.
حاميت ەسامان,
«ەگەمەن قازاقستان»
جامبىل وبلىسى
