بيزنەستى ترانسفورماتسيالاۋ باعدارلاماسىنا «سامۇرىق-قازىنا» ءال-اۋقات قورىنا قاراستى قازپوشتا, قتج, قازاتومپروم, KEGOC, قازمۇنايگاز, سامۇرىق-ەنەرگو كومپانيالارى قاتىسۋدا. باعدارلاما كومپانيالاردىڭ قۇنىن ارتتىرۋ, قۇرىلىمىن وزگەرتۋ, ينۆەستيتسيالىق قىزمەتىن جەتىلدىرۋ سىندى باعىتتاردى قامتيدى.
ءۇش جىل بۇرىن وسى باستاماعا قاتىستى فورۋمعا پرەزيدەنت نۇرسۇلتان نازارباەۆ تا قاتىسقان ەدى. ەلباسى سول جيىندا سويلەگەن سوزىندە: «سامۇرىق-قازىنا» قورىنىڭ الدىندا ۇلتتىق ماسشتابتاعى مىندەتتەر تۇر. ترانسفورماتسيا اياسىندا ەڭ الدىمەن قور كومپانيالارى اكتسيالارىنىڭ باعاسىن وسىرۋگە باعىتتالعان جۇمىستاردى اتقارۋى كەرەك. ول ءۇشىن ونىمدىلىكتى ارتتىرىپ, تابىسى كوپ جانە تيىمدىلىگى جوعارى جوبالارعا ينۆەستيتسيا قۇيعان ماڭىزدى», دەگەن بولاتىن. مامانداردىڭ ايتۋىنشا, باعدارلاما اياسىندا اتقارىلاتىن جۇمىستار ناتيجەسىندە پرەزيدەنت ايتقان مىندەتتەر ورىندالىپ, «سامۇرىق-قازىنا» ءال-اۋقات قورىنىڭ ونىمدىلىگى 5 جىلدا 30-40 پايىزعا ارتۋعا ءتيىس.
بيزنەستى ترانسفورماتسيالاۋ باعدارلاماسى قىزمەت تيىمدىلىگىن ارتتىرۋ ءۇشىن قاجەتتى جوبالار جيىنتىعىن قاراستىرادى. بيزنەستىڭ ترانسفورماتسياسى باعدارلاماسىنىڭ نەگىزگى باعىتتارىنا پروتسەستەردىڭ اشىقتىعىن قامتاماسىز ەتۋ, قىزمەتكەرلەردىڭ بىلىكتىلىگىن ارتتىرۋ, قىزمەت پروتسەستەرىن اۆتوماتتاندىرۋ كىرەدى. ياعني, «ادامدار – تەحنولوگيالار – پروتسەستەر» باعىتتارى بويىنشا وزگەرىستەر جوسپارلانعان. سونىمەن قاتار باعدارلاما اياسىندا قىزمەتكەرلەردىڭ بىلىكتىلىگىن ارتتىرۋ كوزدەلگەن. ءبىز باعدارلامانىڭ قالاي جۇزەگە اسىرىلىپ جاتقانىن ءبىلۋ ءۇشىن «سامۇرىق-قازىنا» ءال-اۋقات قورىنا قاراستى KEGOC كومپانياسىنا حابارلاسقان ەدىك.
KEGOC – مەملەكەت ءۇشىن ستراتەگيالىق ماڭىزى بار اۋقىمدى ينۆەستيتسيالىق جوبالاردى جۇزەگە اسىرۋدا مول تاجىريبەسى بار ينفراقۇرىلىمدىق كومپانيا. ول ەلەكتر جەلىلەرىن ۇنەمى جاڭعىرتىپ وتىرادى. سونىمەن قاتار بۇگىنگە دەيىن كومپانيا ەۋروپا قايتا قۇرۋ جانە دامۋ بانكى, دۇنيەجۇزىلىك بانك سەكىلدى الەمدىك جەتەكشى قارجى ينستيتۋتتارىنىڭ قاتىسۋىمەن جالپى قۇنى 1 ملرد اقش دوللارىنان جوعارى ءىرى جوبالاردى جۇزەگە اسىرعان.
KEGOC بيزنەستى ترانسفورماتسيالاۋ باعدارلاماسىنا 2015 جىلى كىرگەنى بەلگىلى. KEGOC-تا بيزنەستى ترانسفورماتسيالاۋ باعدارلاماسىن جۇزەگە اسىرۋ 4 كەزەڭگە بولىنگەن. «دايىندىق كەزەڭىندە» قاجەتتى رەسۋرستار ءبولىنىپ, ارنايى جۇمىس توبى قۇرىلعان. نەگىزگى قۇجاتتار بەكىتىلىپ, كەڭەسشىلەر جۇمىلدىرىلعان, كومپانيا ماماندارى وقۋ كۋرستارىنان وتكەن. ال «دياگنوستيكا جانە ديزاين» كەزەڭىندە كومپانيا قىزمەتىنىڭ تيىمدىلىگىن ارتتىرۋعا باعىتتالعان باستامالار قولعا الىنىپ, «جوسپارلاۋ» ساتىسىندا جوبالار پورتفەلىندە كورسەتىلگەن بارلىق باستامالار توپتاستىرىلعان. ال سوڭعى «جۇزەگە اسىرۋ» كەزەڭىندە جوبالار ىسكە قوسىلادى دەپ جوسپارلانعان. بۇگىنگى كۇنى كومپانيا ءتورت كەزەڭنىڭ ۇشەۋىن جۇزەگە اسىرعان. «بيزنەستى ترانسفورماتسيالاۋ باعدارلامىسنىڭ العاشقى ساتىلارىندا ءبىز بارلىق بيزنەس پروتسەستەرگە قايتادان ينجينيرينگ جۇرگىزىپ, جاڭا ۇيىمداستىرۋ قۇرىلىمىن جاسادىق. سونىڭ ناتيجەسىندە باسقارۋدىڭ بىرنەشە ساتىسى قىسقاردى. مىسالى, باسقارما توراعاسىنىڭ ورىنباسارى, دەپارتامەنت باسشىسىنىڭ ورىنباسارى سەكىلدى قىزمەتتەر الىنىپ تاستالدى. فيليالداردا ەكونوميكالىق ماسەلەلەر بويىنشا ديرەكتوردىڭ ورىنباسارى, باس ەسەپشىنىڭ ورىنباسارى لاۋازىمى دا قازىر جوق», دەيدى كومپانيانىڭ باسقارما توراعاسى ب.قاجيەۆ. ونىڭ ايتۋىنشا, كومپانيا قازىرگى ۋاقىتتا جەتى ءىرى جوبانى ىسكە اسىرىپ جاتىر. سولاردىڭ ىشىندە ەڭ نەگىزگىسى «كاسىپورىن پروتسەستەرىن ەنگىزۋ» جوباسى. بۇل جوبا بيزنەستى باسقارۋعا ارنالعان باعدارلامامەن قامتاماسىز ەتەتىن الدىڭعى قاتارلى الەمدىك مەردىگەر سانالاتىن SAP كومپانياسى شەشىمدەرىنىڭ نەگىزىندە ىسكە اسىرىلدى. اتالمىش كومپانيا مەن «سامۇرىق-قازىنا» اق اراسىندا جاسالعان كەلىسىمشارت بويىنشا 5 جىلدا ەكونوميكالىق ناتيجە 200 ملرد. تەڭگەنى قۇرايدى دەپ بولجانىپ وتىر. «بۇل جوبا بويىنشا ماتەريالدىق قۇندىلىقتاردى, تەحنيكالىق قىزمەت كورسەتۋ مەن باسقارۋدى جەتىلدىرۋگە بولادى. جوبا ناتيجەسىندە وپەراتسيالىق جانە باسقارۋ شىعىندارى مەن كوممەرتسيالىق شىعىنداردى ازايتىپ, اينالىم قۇرالدارىن ۇنەمدەۋگە جول اشىلادى», دەيدى كومپانيا ماماندارى. ولاردىڭ ايتۋىنشا, وسى جوبا شەڭبەرىندە KEGOC-تىڭ بارلىق بيزنەس-پروتسەستەرى بىرىڭعاي اقپاراتتىق پلاتفورماعا نەگىزدەلەدى.
ءبىر ايتا كەتەرلىگى, جوبا كومپانيا ساياساتى مەن ادىستەمەسى, بيزنەس پروتسەستەرى مەن اقپاراتتىق جۇيە سالالارىنا نەگىزدەلگەن. بۇل جوبا نەگىزىندە بىرنەشە جۇيەلەر قولعا الىنعان. مىسالى, SAP ERP جۇيەسى نەگىزگى بيزنەس پروتسەستەردى اۆتوماتتاندىرۋعا مۇمكىندىك بەرەدى. سول ارقىلى كومپانيا اكتيۆتەرىن قولدانۋ تيىمدىلىگىن ارتتىرۋعا بولادى. ال SAP Human Capital Management - ادام كاپيتالىن باسقارۋ قىزمەتى - مامانداردى وقىتۋ, بىلىكتىلىگىن ارتتىرۋ, مەنەدجەر مەن قىزمەتكەرلەرگە پورتال ارقىلى ءوز-وزىنە قىزمەت كورسەتۋگە مۇمكىندىك بەرۋدى كوزدەيدى. سونىمەن قاتار قىزمەتكەرلەرگە موتيۆاتسيا بەرىپ, ءبىرسارىندى جۇمىستى ازايتۋدى ماقسات ەتەدى. جوبا اياسىندا جۇزەگە اسىرىلاتىن تاعى ءبىر جۇيە – ەڭبەك قاۋىپسىزدىگىن باسقارۋ (SAP EHS). بۇل جۇيە جۇمىسشىلاردىڭ جاراقات الۋىن ازايتىپ, قىزمەتكەرلەردىڭ باقىلاۋ جۇمىسىن اۆتوماتتاندىرۋعا مۇمكىندىك بەرەدى دەپ كۇتىلۋدە. مامانداردىڭ ايتۋىنشا, اۆتوماتتى جوبا ارقىلى كىمنىڭ قانداي جەردە جۇمىس ىستەپ جاتقانىن ءبىلىپ, قاۋىپتى جەردە جۇرگەندەردى ارنايى بەلگىلەپ, ولارعا قوسىمشا جاعداي جاساۋعا مۇمكىندىك تۋادى. سونىمەن قاتار ادىستەمە, بيزنەس-پروتسەسس جانە اقپاراتتىق جۇيەلەرگە نەگىزدەلگەن اكتيۆتەردى باسقارۋ جۇيەسى جەتىلدىرىلەدى.
جالپى العاندا باعدارلامانى ىسكە اسىرۋ كومپانيانىڭ تۇراقتىلىعىن قامتاماسىز ەتىپ, سىرتقى جانە ىشكى وزگەرىستەرگە تەز بەيىمدەلۋگە, رەسۋرستاردى بيزنەستىڭ باعىتتارىنا شوعىرلاندىرۋعا, ەڭبەك ونىمدىلىگىن ارتتىرۋعا مۇمكىندىك بەرمەك.
گۇلنۇر قۋانىشبەكقىزى,
«ەگەمەن قازاقستان»
