فوتو: bustle.com
قايىرىمدىلىق شاراعا وبلىستىق ءماسليحاتتىڭ دەپۋتاتتارى, مەملەكەتتىك ۇيىمدار, كاسىپورىندار, جەكە ادامدار قىزۋ ءۇن قوستى. كوزدەرى جاۋتاڭداعان بالالاردىڭ قالاعان سىيلىقتارىن الىپ بەرەمىز دەگەن تاۋداي ۋادەلەرىن ورىنداۋعا قازىردىڭ وزىندە بەلسەنە كىرىسىپ كەتكەن.
«بالعىندار– ءبىزدىڭ بولاشاعىمىز. ءاربىر ازامات مۇمكىندىگىنشە مۇقتاجدارعا قول ۇشىن بەرگەنى ءجون. ودان ەشكىم كەدەيلەنىپ قالمايدى. «جەتىم كورسەڭ جەبەي ءجۇر» دەگەن ءتامسىلدى اتا-بابالارىمىز بىزگە وسيەت ەتىپ قالدىرعان», دەيدى ەۆرەي مادەني ورتالىعىنىڭ توراعاسى, وبلىستىق ءماسليحاتتىڭ دەپۋتاتى راشبيل ەۆداەۆ.
قايىرىمدىلىق اكتسياسىن العاشقىلاردىڭ قاتارىندا «ينتەرگو» كومپانياسى دا قۋاتتادى. 10 جىلدىق تاريحى بار سەرىكتەستىك وسى تەكتەس شارالارعا ۇنەمى قاتىسىپ كەلەدى. بىلتىر سوكولوۆ ارنايى مەكتەپ-ينتەرناتىنىڭ وقۋشىلارىنا سپورت جابدىقتارى مەن ءتۇرلى سىيلىقتار تارتۋ ەتىپتى. بيىل وسى ءۇردىستى جالعاستىرماقشى.
وبلىستىق جاستار رەسۋرستىق ورتالىعى 60 ۇيىمعا حات جولداعان. ولاردىڭ اراسىندا قايىرىمدىلىق اكتسياسىنا قاتىسۋعا نيەت بىلدىرگەندەر از ەمەس.
«سىيلىقتار مەن تارتۋ-تارالعىلاردى پەتروپاۆل سابيلەر ءۇيى مەن سوكولوۆ ارنايى مەكتەپ-ينتەرناتىنىڭ تاربيەلەنۋشىلەرىنە تاپسىرامىز. «ارماندار ورىندالادى» قايىرىمدىلىق اكتسياسى جاڭا جىلعا دەيىن جالعاسادى», دەيدى جاستار رەسۋرسى ورتالىعىنىڭ باس مامانى روكسانا ورىنباساروۆا.
ءومىر ەسقالي,
«ەگەمەن قازاقستان».
سولتۇستىك قازاقستان وبلىسى
