سىر وڭىرىنە ساپارى بارىسىندا عابيدوللا راحمەتوللا ۇلى قالانىڭ سول جاعالاۋىندا سالىنىپ جاتقان قۇرىلىس نىساندارىنىڭ جۇمىسىمەن تانىسىپ, وڭ باعاسىن بەردى. بۇدان سوڭ وبلىستىق مەكەمەلەر ۇيىندە ەلباسى, «نۇر وتان» پارتياسىنىڭ توراعاسى نۇرسۇلتان نازارباەۆتىڭ تاپسىرمالارىنىڭ ورىندالۋ بارىسى جونىندە جانە مەملەكەتتىك باعدارلامالاردىڭ ىسكە اسىرىلۋى باعىتىندا جيىن وتكىزدى. ماجىلىسكە وبلىس اكىمى قىرىمبەك كوشەرباەۆ, پرەزيدەنت اكىمشىلىگىنىڭ مەملەكەتتىك ينسپەكتورى نۇرلان تىلەشەەۆ, ءماسليحات دەپۋتاتتارى, اۋدان, قالا اكىمدەرى, وبلىستىق دەپارتامەنتتەر مەن باسقارما باسشىلارى جانە پارتيا اكتيۆى قاتىستى.
جيىندى «نۇر وتان» پارتياسىنىڭ قىزىلوردا وبلىستىق فيليالىنىڭ توراعاسى, ايماق باسشىسى قىرىمبەك كوشەرباەۆ جۇرگىزىپ وتىردى. فيليال توراعاسى پارتيانىڭ سايلاۋالدى تۇعىرناماسىندا كوزدەلگەن مىندەتتەر مەن مەجەلەردى, مەملەكەتتىك باعدارلامالاردىڭ ورىندالۋىنا «نۇر وتان» تاراپىنان قاداعالاۋ جايىندا ءسوز قوزعادى. وسىعان سايكەس, وڭىردەگى اتقارىلعان جۇمىستاردىڭ ءجون-جوباسىمەن تانىستىرۋ ءۇشىن بىرقاتار باسقارما باسشىلارى مەن اۋداندار اكىمدەرىنە ءسوز بەرىلدى.
وبلىستا ءبىلىم بەرۋ سالاسىن قارجىلاندىرۋ جىل سايىن ارتىپ كەلەدى. «وتكەن وقۋ جىلىندا 13 مەكتەپتىڭ قۇرىلىسى جۇرگىزىلىپ, پايدالانۋعا بەرىلدى. ال بيىل ارال, قازالى, قارماقشى اۋداندارىنداعى 11 اپاتتىق جاعدايداعى مەكتەپتىڭ قۇرىلىسى وبلىستىق بيۋدجەتتەن, جاڭاقورعاندا 300 ورىندىق 2 مەكتەپ «نۇرلى جول» باعدارلاماسى بويىنشا قايتا سالىندى», – دەدى وبلىستىق ءبىلىم باسقارماسىنىڭ باسشىسى باقىتجان سايلىباەۆ.
وبلىستىق دەنساۋلىق ساقتاۋ باسقارماسىنىڭ باسشىسى اقمارال ءالنازاروۆا ايماقتاعى «دەنساۋلىق» باعدارلاماسى بويىنشا اتقارىلعان جۇمىستارعا توقتالىپ, ونىڭ ناتيجەلەرىمەن تانىستىرىپ, مەديتسينا سالاسىنداعى كادر جەتىسپەۋشىلىگى جايىندا ءسوز قوزعادى.
سونداي-اق اقمارال شارىپبايقىزى بىرقاتار پروبلەمالارعا دا توقتالدى. «مەديتسينا سالاسىنداعى مەملەكەتتىك قىزمەتشىلەرگە, سونىڭ ىشىندە دارىگەرلەرگە مەديتسينالىق تاجىريبەگە تىيىم سالىنعان. بۇل ءوز كەزەگىندە دارىگەرلەردىڭ بىلىكتىلىگىنە, ۋاقىت وتە كەلە كاسىبي داعدىلارىن جوعالتۋىنا الىپ كەلەدى», – دەدى ول.
ماجىلىستە مەملەكەتتىك قىزمەت ىستەر اگەنتتىگىنىڭ قىزىلوردا وبلىسى بويىنشا دەپارتامەنت باسشىسى, ادەپ جونىندەگى كەڭەستىڭ توراعاسى ابزال مۇحيموۆ, قارماقشى اۋدانىنىڭ اكىمى سۇلتان ماقاشوۆ تا بايانداما جاسادى. جيىن سوڭىندا پارتيا حاتشىسى عابيدوللا ءابدىراحىموۆ قىزىلوردا وبلىسىنداعى وڭ وزگەرىستەرگە توقتالىپ, الداعى ۋاقىتتا دا قارقىندى جۇمىس ىستەي بەرۋگە تىلەكتەستىگىن ءبىلدىردى.
ەرجان بايتىلەس,
«ەگەمەن قازاقستان»
قىزىلوردا
