ءمۇسىننىڭ شىمىلدىعىن سالتاناتتى جاعدايدا ءتۇسىرۋ ءراسىمىن قاراجال قالاسىنىڭ قۇرمەتتى ازاماتى, ءبىلىم بەرۋ سالاسىنىڭ ارداگەرى, اقتاي ەلدى مەكەنىندەگى №6 مەكتەپتى ۇزدىكسىز 25 جىل باسقارعان باتاگوي قاريا امانكەلدى تىلەۋباەۆ پەن ءبىلىم بەرۋ سالاسىنىڭ ارداگەرى, №1 قازاق ورتا مەكتەبىندە قازاق ءتىلى جانە ادەبيەتى ءپانىنىڭ مۇعالىمى بولىپ 40 جىلدان استام ۋاقىت ەسەلى ەڭبەك ەتكەن ارداقتى انا ماكىش جاپپاروۆا جۇزەگە اسىردى. قوس قاريا جالپى قاۋىمعا جۇرەك تورىنەن توگىلگەن جىلى لەبىزدەرىن ارناپ, ماڭگىلىك ەل مۇراتىن ۇستانعان مەملەكەتتىڭ باسىنا قونعان باقىتى باياندى بولۋىن تىلەدى.
شاعىن شاھاردىڭ شىرايىن ەنگىزىپ تۇرعان ۇلتتىڭ ۇلى تۇلعاسىنىڭ تۇعىرى بيىك ءمۇسىنى شىنىندا دا اسقاق رۋحتىڭ ايعاعىنداي اسەر قالدىرادى. سول توڭىرەككە جاڭادان قويىلعان «بەيبىتشىلىك كوگەرشىنى» شاعىن ساۋلەت قۇرىلىمى دا تارتىمدىلىعىمەن ەرەكشەلەنەدى. جوعارىدا اتالعان قوس تۋىندىنىڭ اۆتورى – قازاقستاندىق تانىمال سۋرەتشى يگور باگراموۆ.
جەرگىلىكتى بيۋدجەتتەن ماقساتتى نەگىزدە بولىنگەن قاراجات ەسەبىنەن جاڭعىرتىلعان ساياجولعا كورگەن كوز قۋانارلىقتاي اسەم قورشاۋلار ورناتىلىپ, 24 ورىندىق پەن 20 شاعىن قوقىس جاشىكتەرى ورنالاستىرىلعان. جاياۋ جۇرگىنشىلەرگە ارنالعان جولدارعا تاس توسەنىشتەر توسەلگەن. جۇرتشىلىقتىڭ شۇيىركەلەسىپ, اڭگىمە-دۇكەن قۇرۋىنا ارنالعان كۇن كوزىنەن قورعايتىن قالقاندارى بار دەمالىس ورىندارى دا تۇرعىنداردىڭ سۇيىكتى مەكەنىنە اينالارى ءسوزسىز.
بۇقارا حالىق, مەملەكەتتىك جانە قوعامدىق ۇيىمداردىڭ وكىلدەرى مەن قالا قوناقتارى قاتىسقان جيىندا جۇرتشىلىقتى مەرەيلى قۋانىشتارىمەن قالا اكىمى تىلەكتەس دوساەۆ قۇتتىقتادى.
– مەملەكەت باسشىسىنىڭ «رۋحاني جاڭعىرۋ» باعدارلاماسىنىڭ باستى وزەگى وتكەننىڭ ونەگەسىن باعامداۋ, ونىڭ قاسيەتى مەن كيەسىن جاس ۇرپاقتىڭ ساناسىنا ءسىڭىرۋ ەكەندىگى بەلگىلى. وسى تۇرعىدان العاندا, قازىنالى قالا تورىندە قازاق حالقىنىڭ ۇلى اقىنى ابايدىڭ ەسكەرتكىش-ءمۇسىنىنىڭ اشىلۋى – بارشا قاراجالدىقتار ءۇشىن تاريحي ماڭىزى بار ايتۋلى وقيعا. اباي بەينەسى – ءار قازاقتىڭ جۇرەگىندە. ۇلتتىڭ رۋحاني اعارتۋشىسى, حالقىنا وشپەس مۇرا قالدىرىپ, قازاق ادەبيەتىن الەمدىك دەڭگەيدە مويىنداتقان تۇلعا رۋحىنا لايىقتى قۇرمەت كورسەتە ءبىلۋ – قاستەرلى پارىز. بۇل ءمۇسىن – سول پارىزدى وتەۋدىڭ بولماشى ءبىر ايعاعى. دانالىق پەن دارالىقتىڭ سيمۆولى ىسپەتتى كەمەڭگەر بابامىزعا قويىلعان وسىناۋ ءمۇسىن بەرەكە-بىرلىگى جاراسقان جەرگىلىكتى حالىقتىڭ لايىقتى ماقتانىشى بولارىنا كۇمانسىز سەنەمىن, – دەدى قالا باسشىسى ءوزىنىڭ جۇرەكجاردى لەبىزىندە.
قالا اكىمدىگى مەن سالاعا جاۋاپتى مەملەكەتتىك ورگانداردىڭ دەمالىس ايماعىن جارىقتاندىرۋ جايىنا دا جاناشىرلىقپەن جەتە ءمان بەرگەنى انىق بايقالادى. ساياباقتارعا لايىقتالعان كۇن ساۋلەسىنەن قۋات الاتىن جارىق بەرۋ شامدارى – سونىڭ ايعاعى. سول ماقساتپەن ساياجول اۋماعىنا 27 باعانا ورناتىلعان ەكەن.
بۇلاردان تىسقارى, توڭىرەگىنە ءتۇن مەرزىمىندە نۇرلى ساۋلە شاشىپ تۇراتىن «JAN جۇرەك QARAZHAL» ساۋلەت قۇرىلىمى – جۇرەكتەرگە جىلىلىق ۇيالاتىپ, جۇرتتى ىزگىلىك پەن تۋعان جەردى ايالاۋعا ۇندەيتىن بولەك ءبىتىمدى, بىرەگەي شەشىمدەردىڭ ءبىرى.
قالاي بولعاندا دا, قويناۋى قازىنا-بايلىققا تولى وڭىردە مەملەكەت باسشىسىنىڭ تاپسىرمالارىنان باستاۋ الاتىن قوعام ءۇشىن قايتارىمى مول ىستەر ىجداعاتتىلىقپەن قولعا الىنىپ, ولاردىڭ ناقتى ناتيجەلەرى جۇرتشىلىقتىڭ سۇيىسپەنشىلىگىن تۋدىرۋدا. ەڭ باستىسى, بيلىك پەن بۇقارا اراسىنداعى ءوزارا تۇسىنىستىك احۋالى كوزگە ۇرىپ تۇر. ال ءوز كەزەگىندە بۇل – بولاشاقتاعى جۇيەلى ءھام ءباتۋالى جۇمىستاردىڭ بەرىك ىرگەتاسىنا اينالارى كۇمانسىز.
ميراس اسان,
«ەگەمەن قازاقستان»
قاراعاندى وبلىسى,
قاراجال قالاسى
