«ەكى جۇلدىز» سالتانات سارايىندا وتكەن شارا قوناقتارى استانا تۋرالى فوتو كورمەسىن تاماشالادى. ساحنا شىمىلدىعى «سۇگىر» اتىنداعى قازاق ۇلت اسپاپتار وركەسترىنىڭ ورىنداۋىنداعى ب.رىسپانبەتوۆتىڭ «تاۋەلسىز قازاقستان» كۇيىمەن ءتۇرىلدى.
سالتاناتتى شارادا ءسوز العان وبلىس اكىمى جانسەيىت تۇيمەباەۆ جينالعانداردى مەرەكەمەن قۇتتىقتادى.
«1997 جىلى 10 جەلتوقسان كۇنى ەلباسىمىز قازاق ەلىنىڭ استاناسىن الماتىدان اقمولاعا كوشىرۋ جونىندەگى تاريحي جارلىققا قول قويدى. بۇل كۇن – تەك ەلوردا تۇرعىندارىنىڭ عانا ەمەس, بۇكىل ەل حالقىنىڭ مەرەيلى مەرەكەسى. بارشاڭىزدى وسىناۋ مەرەكەمەن شىن جۇرەكتەن قۇتتىقتايمىن! كەمەڭگەر ساياساتكەردىڭ وسىناۋ كورەگەن شەشىمىنىڭ دۇرىس ەكەنىن بۇگىندە ۋاقىتتىڭ ءوزى دالەلدەپ بەردى. كوپ ۇزاماي استانا ەلىمىزدىڭ ەكونوميكالىق, ساياسي, مادەني ءومىرىنىڭ قايناعان ورتاسىنا اينالدى» - دەدى جانسەيىت قانسەيىت ۇلى.
مۇنان سوڭ ءوڭىر باسشىسى ەلىمىزدىڭ دامۋى مەن ءوسىپ-وركەندەۋىنە ەلەۋلى ۇلەس قوسقان 20 مەتسەناتقا «وبلىسقا سىڭىرگەن ەڭبەگى ءۇشىن» مەدالى مەن العىس حات تابىستادى. مەتسەناتتار اراسىندا شىمكەنت قالاسىندا از قامتاماسىز ەتىلگەن 6 وتباسىعا ارناپ ءۇي سالىپ بەرگەن عاني احمەتباەۆ, ارىس قالاسى بايتوعاي ەلدىمەكەنىندەگى م.مامەتوۆ جالپى ورتا مەكتەبى جانىنان سپورت كەشەنىن سالىپ بەرگەن حاديشا نۇرتايقىزى سىندى كاسىپكەرلەر بار.
ايتا كەتەيىك, بۇگىندە وبلىسىمىزدا «تۋعان جەر» ارنايى جوباسى بويىنشا دەمەۋشىلەر تاراپىنان جالپى 31 ملرد. 467 ملن. تەڭگەنى قۇرايتىن 577 وڭىرلىك جوبا جۇزەگە اسىرىلۋدا.
سونىمەن قاتار, قوعامدىق كەلىسىمدى نىعايتۋ, گۋمانيستتىك دايەكتى قىزمەت ەتۋ, قوعامنىڭ رۋحاني دامۋىنا ۇلەس قوسقان 11 ازاماتقا ەلباسى ن.نازارباەۆتىڭ العىس حاتى, قۇرمەت گراموتاسى جانە «بىرلىك» التىن مەدالى تابىستالدى.
سونداي-اق, ەلىمىزدە العاش رەت قازاقستان رەسپۋبليكاسىندا قايىرىمدىلىق پەن مەتسەناتتىق قىزمەتتى دامىتۋعا قوسقان ۇلەسى ءۇشىن ەلباسىنىڭ اتىنان قازاقستان حالقى اسسامبلەياسىنىڭ «جومارت جان» توسبەلگىسىمەن لاتيپشا اسانوۆ, قازاقستان حالقى اسسامبلەياسىنىڭ قوعامدىق «بىرلىك» التىن مەدالىمەن ابىلقاسىم دوسبولوۆ, بەكمات تۇردىقۇلوۆ, پاك يۋري, ليديا مەحليك, حاسان حامەدوۆتەر سىندى ازاماتتار ماراپاتتالدى.
بۇدان بولەك, «بولاشاققا باعدار: رۋحاني جاڭعىرۋ» باعدارلامالىق ماقالاسىن حالىققا ناسيحاتتاۋ, ءتۇسىندىرۋ جۇمىستارىندا بەلسەندىلىك تانىتقان 4 ازامات ەلەنىپ, «وبلىسقا سىڭىرگەن ەڭبەگى ءۇشىن» مەدالى جانە العىس حاتپەن ماراپاتتالدى.
شارادا استانادا ءوتىپ جاتقان ءتۇرلى حالىقارالىق ءىس-شارالار جəنە حالىقارالىق سپورتتىق ويىندار, «ەكسپو-2017» كورمەسىنىڭ ءوتۋى تۋرالى بەينەروليكتەر كورسەتىلدى. ەلىمىزگە تانىمال ءوڭىرىمىزدىڭ ونەرپازدارى ب.تىلەۋحاننىڭ «جەرىم مەنىڭ», س. بəيتەرەكوۆتىڭ «سارىارقا» جəنە وزگە دە اۆتورلاردىڭ «استانا», «سالەم استانا», «ازيادا الاۋى-استانا», «ەكسپو-2017» سىندى بىرقاتار əندەرىن ورىندادى. ءشامشى قالداياقوۆتىڭ «وتان» əنىمەن قورىتىندىلانعان كونتسەرتتىك كەشتە «قازىنا», «تۇمار», «شامسينۇر» بي ۇجىمدارىمەن قاتار گيمناستشىلار دا اتسالىستى.
