اتالمىش جۇيە ستاتسيوناردا مەديتسينالىق كومەكتى ۇيىمداستىرۋدى جاقسارتۋعا, سونداي-اق, مەديتسينالىق قىزمەتتەر ساپاسىن كوتەرۋگە باعىتتالعان.
دەنساۋلىق ساقتاۋ مينيسترلىگى ۇسىنعان جاڭا جۇيە ناۋقاستارعا كابينەتتەن تىس قىزمەت كورسەتۋگە ارنالعان. الداعى كۇندەرى بۇل جۇيە ەلىمىزدىڭ بارلىق اۋرۋحانالارىنا ەندىرىلەدى.
الماتىدا №7 اۋرۋحانا العاشقىلاردىڭ ءبىرى بولىپ قابىلداۋ ءبولىمىن ترياج-جۇيەسىنە قاجەتتى قورلارمەن جابدىقتاۋعا كوشتى. وسى جاڭالىققا سايكەس قابىلداۋ بولىمىنە كەلىپ تۇسكەن ناۋقاستار ءۇش توپقا بولىنەدى. ولاردىڭ احۋالىنا بايلانىستى, سايكەسىنشە قولىنا قىزىل, سارى نەمەسە جاسىل ءتۇستى بىلەزىك تاعىلادى. قىزىل ايماق – شۇعىل تۇردە مەديتسينالىق كومەك كورسەتىلۋى ءتيىستى ناۋقاستار بولسا, سارى ايماق – ينتەنسيۆتىك ەمەس كومەك كۇتىپ وتىرعاندار, ال جاسىل ايماقتا ناۋقاستى قابىلداپ, قىزمەت كورسەتىپ, باعىت بەرۋگە, قاجەت بولعان جاعدايدا جوسپارلى تارتىپكە سايكەس اۋرۋحاناعا جاتقىزۋعا ارنالعاندار كەزەگىن كۇتەدى.
ىرىكتەۋدەن كەيىن ناۋقاستار ىقشام قول اربالارمەن جابدىقتالعان قاراۋ ايماعىنا وتەدى. بۇل جەردە ناۋقاستانىپ كەلگەندەردىڭ دەنساۋلىعى جان-جاقتى تەكسەرىلەدى. مونيتورلارداعى ارنايى باعدارلامالىق جابدىقتاما ونلاين تارتىبىندە ناۋقاستانىپ تۇسكەندەرگە قىزمەت كورسەتۋ بارىسىن كورسەتىپ تۇرادى. وسى جاڭالىقتىڭ ارقاسىندا ماماندارعا قارالۋ ءۇشىن كەزەككە تۇرۋ قاجەت بولمايدى. ناتيجەسىندە ناۋقاستار جاعىنان كەلىپ تۇسەتىن شاعىمدار سانىن ەداۋىر ازايا تۇسەدى دەپ كۇتىلۋدە.
ايناش ەسالي,
«ەگەمەن قازاقستان»
