كريشتيانۋ رونالدۋ بيىل «رەال مادريد» كومانداسىمەن بىرگە يسپانيا چەمپيونى اتانىپ, چەمپيوندار ليگاسىندا ەكى جىل قاتارىنان توپ جاردى. سونداي-اق ۋەفا سۋپەركۋبوگى مەن يسپانيا سۋپەركۋبوگىنە قول جەتكىزدى. رونالدۋ – مادريدتىكتەر ساپىندا 44 ويىنعا قاتىسقان, 38 گولدىڭ جانە 9 ناتيجەلى پاستىڭ اۆتورى. ال چەمپيوندار ليگاسىنىڭ وتكەن ماۋسىمىندا 12 گول سالىپ, ۇزدىك سۇرمەرگەندەر تىزىمىندە كوش باستاعان بولاتىن.
فۋتبولدان 2018 جىلعى الەم چەمپيوناتىنا ىرىكتەۋ كەزەڭدە پورتۋگاليا ۇلتتىق قۇراماسى «ۆ» توبىندا سىنعا ءتۇسىپ, ءوز توبىندا ءبىرىنشى ورىنمەن كەلەسى جىلعى الەم بىرىنشىلىگىنە جولداما الدى. رونالدۋ قۇراما ساپىندا بيىل 11 ويىندا 11 گول سوعىپ, ارىپتەستەرىنە ءتورت ناتيجەلى پاس بەردى.
«رەال مادريد» شابۋىلشىسى بيىل ۋەفا نۇسقاسى بويىنشا ەۋروپانىڭ ۇزدىك ويىنشىسى اتانعان ەدى. ايتا كەتەرلىك تاعى ءبىر جايت, وسى ماۋسىمدا رونالدۋ چەمپيوندار ليگاسىندا كەزەكتى رەت رەكورد جاڭارتتى. ول توپتىق كەزەڭدەگى التى كەزدەسۋدىڭ بارىندە گول سوققان العاشقى ويىنشى.
ەسكە سالا كەتەيىك, «التىن دوپ» جۇلدەسىن 2016 جىلدان باستاپ France Football باسىلىمى قايتا تابىستادى. ال 2009-2015 جىلدارى بۇل فيفا-نىڭ قۇزىرەتىندە بولعان ەدى. France Football ۇزدىك ويىنشىنى سپورت جۋرناليستەرىنىڭ داۋىس بەرۋى ارقىلى انىقتايدى.
«ەگەمەن-اقپارات»
