– ريمما, سۇراعىمىزدى جۋىردا عانا اياقتالعان ازيا چەمپيوناتىنان باستاساق. سارىقۇرلىق بىرىنشىلىگىنە قانشا ۋاقىت دايىندالدىڭىزدار؟
– ازيا چەمپيوناتىنا جوعارى دەڭگەيدە بارۋ ءۇشىن وتە ۇزاق ۋاقىت ءارى تىنىمسىز دايىندالدىق. اۋەلى قىتايدا سول ەلدىڭ بوكسشىلارىمەن بىرگە وقۋ-جاتتىعۋ جيىنىنا قاتىسىپ, سپاررينگتىك كەزدەسۋلەر وتكىزدىك. سەبەبى ازياداعى ءبىزدىڭ باستى قارسىلاستارىمىز وسى قىتاي بوكسشىلارى. ال جالپى فيزيكالىق دايىندىعىمىزدى الماتىداعى AIBA بوكس اكادەمياسىندا شىڭدادىق. چەمپيوناتقا سوڭعى دايىندىعىمىزدى استانادا پىسىقتاپ, ۆەتنامعا ساپار شەكتىك. قۇراما بوكسشىلارى ۆەتنامعا وتە جوعارى دايىندىقپەن باردى دەپ ايتا الامىن.
– ازيا چەمپيوناتىنداعى العاشقى كەزدەسۋىڭىزدە وڭتۇستىككورەيالىق قارسىلاسىڭىزدان تەڭ دارەجەدە وتكەن كەزدەسۋدە جەڭىلىپ قالدىڭىز. تورەشىلەر سىزگە قيانات جاسادى دەپ ويلامايسىز با؟
– جالپى, بوكستا مىناداي ءسوز بار. ەگەر تورەشى رينگتە سەنىڭ قولىڭدى كوتەرمەسە, وندا سەن جەڭىلگەنىڭدى مويىنداۋىڭ كەرەك. سوندىقتان تورەشىلەر تۋرالى ەشتەڭە ايتا المايمىن. سپورت وسىنىسىمەن قىزىق. بىردە جەڭەسىڭ, بىردە جەڭىلەسىڭ. ال مەن وسى كەزدەسۋدەن كەيىن جىبەرگەن قاتەلىكتەرىممەن جۇمىس ىستەۋ, كەلەسى باسەكەلەردە جەڭىسكە جەتۋ ءۇشىن دايىندىعىمدى ەكى ەسە ارتتىرۋ كەرەك ەكەنىن ءتۇسىندىم.
– كەزدەسۋدەن سوڭ سىزگە ۇلتتىق قۇراما باپكەرلەرى نە ايتتى؟
– ارينە, بۇل جەڭىلىس مەن ءۇشىن دە, جاتتىقتىرۋشىلار ءۇشىن دە وڭايعا سوقپادى. ازيا چەمپيوناتىنا تەك التىن مەدال الىپ, ەلىمىزدىڭ ءانۇرانىن شىرقاتامىن دەپ بارىپ ەدىم. دەگەنمەن, باپكەرلەرىم جەكپە-جەك كوڭىلدەرىنەن شىققاندارىن, ەڭسەمدى تۇسىرمەي, الداعى ۋاقىتتا كوپ جاتتىعۋ كەرەكتىگىن ايتتى.
– جالپى, سپورتتىڭ بۇل تۇرىنە قالاي كەلدىڭىز؟ بوكسپەن شۇعىلدانۋ قىزدارعا قيىن ەمەس پە؟
– بوكس ماعان بالا كەزىمنەن ۇنايتىن. اكەم ەكەۋمىز تەلەديداردان ۇنەمى كاسىپقوي بوكستىڭ جەكپە-جەكتەرىن تاماشالايتىنبىز. ءسويتىپ مەنىڭ بوكسقا دەگەن قىزىعۋشىلىعىم ارتىپ, بوكس ۇيىرمەسىنە جازىلۋعا نيەتتەندىم. الايدا اۋىلىمىزدا تەك ۆولەيبول سەكتسياسى عانا بار ەدى. قالاعا كەلگەنگە دەيىن ۆولەيبول سپورتىمەن اينالىستىم. كەيىننەن, كوللەدجگە وقۋعا ءتۇسىپ, بوكس زالىنا جازىلدىم. مىنە, سول ۋاقىتتان بەرى بوكستى جانىما سەرىك ەتىپ كەلەمىن. مەنىڭشە, بوكس سپورتى قىزدارعا قيىن ەمەس سياقتى (ك ۇلىپ).
– ءسىزدىڭ پىكىرىڭىزشە, ەلىمىزدە قىزدار بوكسىنىڭ دەڭگەيى قاي دارەجەدە؟
– قازاقستاندا قىزدار بوكسىنىڭ دەڭگەيى وتە جوعارى. ەرلەر دارەجەسىنە جەتپەسەك تە, سوعان جەتەعابىل دەپ ەسەپتەيمىن. ويتكەنى قازىرگى ۇلتتىق قۇرامادا جۇرگەن بوكسشى قىزداردىڭ اراسىندا حالىقارالىق دارەجەدەگى, قازاقستان رەسپۋبليكاسىنا ەڭبەگى سىڭگەن سپورت شەبەرلەرى وتە كوپ. سونداي-اق بىرنەشە دۇركىن الەم جانە ازيا چەمپيوندارى, وليمپيا ويىندارىنىڭ جۇلدەگەرلەرى دە بار. قازىرگى تاڭدا بوكستان قازاقستان قىزدار قۇراماسى الەمنىڭ كەز كەلگەن قۇراماسىنا لايىقتى قارسىلىق كورسەتەتىنىن جانە ولار دا ءبىزدىڭ بوكسشىلارمەن ساناساتىنىن سەنىممەن ايتا الامىن.
– كەلەسى جىلى قانداي ءىرى دودالارعا دايىندالىپ جاتىرسىز؟
– ازيا چەمپيوناتىنان سوڭ ۇلتتىق قۇراما باپكەرلەرى جاڭا جىلعا دەيىن دەمالىس بەرگەن بولاتىن. بىراق كۇندەلىكتى جاتتىعۋ زالىنا بارىپ ءجۇرمىن. ال قاڭتار ايىندا تولىق جاتتىعۋعا كىرىسىپ, ەل بىرىنشىلىگىنە دايىندالاتىن بولامىز. قازاقستان چەمپيوناتىنان كەيىن 2018 جىلعى ازيا ويىندارىنا جانە الەم بىرىنشىلىگىنە كىمدەر باراتىنى انىقتالادى. بۇيىرسا, ەل چەمپيوناتىندا توپ جارىپ, حالىقارالىق جارىستارعا قاتىسىپ قانا قويماي, ەلىمە جۇلدە اكەلگىم كەلەدى.
– كارەراڭىزداعى ەڭ جارقىن جەڭىسىڭىز قايسى؟
– ازيا چەمپيوناتىنان كەيىن جەكە باپكەرىم بەرىك مارجىقپاەۆپەن بىرگە رەسەيدىڭ بەلويارسك قالاسىندا مۇنايلى ەلدەر اراسىندا وتكەن الەم كۋبوگىنا قاتىسىپ, توپ جاردىم. وسى جەڭىسىم ارقىلى حالىقارالىق دارەجەدەگى سپورت شەبەرى اتاندىم. كارەرامداعى ەڭ جارقىن جەڭىسىم دەپ, وسى جەتىستىگىمدى ايتار ەدىم. بۇل جەڭىستى ەشقاشان ۇمىتپايمىن. مۇنايلى ەلدەر اراسىنداعى جارىستا بۇرىن قازاقستاننان مارينا ۆولنوۆا عانا جەڭگەن بولاتىن. ەندى, مەن دە مۇنايلى ولكەنىڭ چەمپيونى بولدىم. ازيا چەمپيوناتىنداعى ساتسىزدىگىمنەن كەيىن جەكە باپكەرىم بەرىك مارجىقباەۆ مەنى بىردەن وسى جارىسقا دايىندادى. ول كىسى تەك باپكەرىم ەمەس, اقىلشىم ءارى جاناشىرىم. وسى ورايدا مەنى وسىنداي دارەجەگە جەتكىزگەن بەرىك بورانباي ۇلىنا ءوز العىسىمدى ايتامىن.
– قازىرگى تاڭدا ەرلەرمەن قاتار قىزدار دا دەندەپ كاسىپقوي بوكسقا اۋىسىپ جاتىر. سىزدە كاسىپقوي بوكسقا اۋىسۋ نيەتى جوق پا؟
– شىنىندا دا, قىزدار اراسىنداعى كاسىپقوي بوكس تا قارقىندى دامىپ كەلەدى. دەگەنمەن, كاسىپقوي بوكسقا اۋىسۋ تۋرالى ءالى ويلانىپ كورمەپپىن. مەنىڭ قازىرگى باستى ارمانىم – وليمپيادا چەمپيونى اتانۋ. توكيو وليمپياداسىنا بارىپ, ەلىمىزگە التىن مەدال اكەلگىم كەلەدى.
اڭگىمەلەسكەن
ءالي قۇديار ۇلى
