ماڭىزدى قۇجاتقا «قازاقستاننىڭ تۇرعىن ءۇي قۇرىلىس جيناق بانكى» اق وبلىستىق فيليالىنىڭ باسشىسى نۇرلان كۇزەمباەۆ پەن «ۆوستوك-كليو» جشس ديرەكتورى ۆياچەسلاۆ تارنايكين قول قويدى.توقسان بەس پاتەرلى, بەس قاباتتى جاڭا ءۇي كۇلەنوۆ شاعىن اۋدانىندا بوي كوتەرگەن «ريۆەرا رەزيدەنس» تۇرعىن ءۇي كەشەنىندە ورنالاسقان. ەرەكشە ساۋلەتىمەن كوز تارتاتىن ءزاۋلىم عيمارات الاڭىندا بىرنەشە سپورت جانە ويىن الاڭدارى, اۆتوتۇراق, سەنىمدى قاۋىپسىزدىك جۇيەسى, ءدارىحانالار مەن ناۋبايحانا, سۋپەرماركەت, بانك بولىمشەلەرى اشىلىپ, كەشەن تۇرعىندارى ءۇشىن بارىنشا قولايلى جاعداي جاسالعان. بۇگىندە اۋماعى 46 شارشى مەتردەن 242 شارشى مەترگە دەيىن جەتەتىن ءبىر, ەكى, ءۇش, ءتورت بولمەلى پاتەرلەر ساتىلا باستادى. «جەكە قۇرىلىس سالۋشىلاردى تۇرعىن ءۇي سالۋعا ىنتالاندىرۋ» باعىتىن جۇزەگە اسىرۋعا ءۇش تاراپ قاتىسىپ وتىر. ەكىنشى دەڭگەيلى بانك جەكە قۇرىلىس سالۋشى «ۆوستوك-كليو» جشس-گە جەڭىلدىكپەن نەسيە بەرەدى. ويتكەنى حالىقتىڭ ءار ساناتىنىڭ تۇرعىن ءۇي ماسەلەسىن كەشەندى شەشۋ ماقساتىندا ەلباسىنىڭ تاپسىرماسىمەن قولعا الىنعان وسى باعدارلامانىڭ اياسىندا مەملەكەت «دامۋ» قورى ارقىلى جەكە قۇرىلىس سالۋشىلاردىڭ نەسيەلەرى بويىنشا سىياقى مولشەرلەمەسىنىڭ 7 پايىزىن سۋبسيديالاپ وتىر. مۇنىڭ ءوزى سالىنعان تۇرعىن ءۇيدىڭ شارشى مەترىنىڭ قۇنىن تومەندەتۋگە مۇمكىندىك بەردى. ماسەلەن, اتالعان ءۇيدىڭ نارىقتاعى باعاسى شارشى مەترىنە 200 مىڭ تەڭگە بولسا, ۇسىنىلىپ وتىرعان باسپانانىڭ شارشى مەترى – 175 مىڭ تەڭگە. «قازاقستاننىڭ تۇرعىن ءۇي قۇرىلىس جيناق بانكى» اق-تىڭ وبلىستىق فيليالى بۇل پاتەرلەردىڭ 50 پايىزىن ءوز سالىمشىلارىنا ۇسىنادى. تۇرعىن ءۇي رەسىمدەۋدە ازاماتتاردىڭ جاسىنا قارامايدى. ءۇي قۇنىنىڭ 30 پايىزىن تولەپ, ءارى قاراي نەسيە تولەۋگە جالاقىسى جەتەتىن بولسا, كەز كەلگەن ازامات باسپانا الا الادى.
وڭىرىمىزدە تۇرعىن ءۇي قۇرىلىسى قارقىندى دامىپ كەلەدى. قازاقستاننىڭ تۇرعىن ءۇي قۇرىلىس جيناق بانكى سالىمشىلارىنىڭ سانى 78 مىڭنان استى. بۇگىنگى تاڭدا بانكتەن شوت اشۋعا جەڭىلدىك جاسالىپ, تەگىن جۇرگىزىلىپ جاتىر. شوتقا بەلگىلى مەرزىمگە دەيىن قارجى جيناعان سوڭ سالىمشىلارىمىز يپوتەكا عانا ەمەس, سونىمەن قاتار جەكە ءۇي سالۋىنا, باسپاناسىن جوندەۋ جۇمىستارىنا قاجەتتى نەسيەنى بانكتەن ارزان پايىزبەن الا الادى. جىل سوڭىنا دەيىن 1142 سالىمشى ءوز باسپانالارىنىڭ كىلتىنە يە بولادى. ال 2018 جىلى تاعى دا 1 مىڭنان استام پاتەر سالىمشىلارعا ۇسىنىلادى», دەيدى وبلىستىق فيليال ديرەكتورى ن.كۇزەمباەۆ.
ازامات قاسىم,
«ەگەمەن قازاقستان»
وسكەمەن
