ويىن باستالماس بۇرىن «سلاۆيانىڭ» قۇرامىنا قاراپ ۇزاق وتىردىم. بىلاي قاراساڭىز, فۋتبولشىلارىنىڭ قۇرامى كادىمگىدەي تىسقاققانداردان قۇرالعان. يان لاشتۋۆكا «شاحتەر» (دونەتسك) كومانداسىنىڭ نەگىزگى قاقپاشىسى بولعان. ميگەل دانني دا «زەنيت» ساپىندا جارقىلداپ, سۋپەركۋبوكتىڭ فينالىندا «مانچەستەر يۋنايتەد» قاقپاسىنا گول سوققان. سوندىقتان پورتۋگاليالىقتى تانىستىرىپ جاتۋدىڭ ءوزى بەكەر. 2012 جىلى «ەڭ ادەمى گولدى» كىم سوققانىن بىلەتىن شىعارسىزدار؟ سول شاقتا «فەنەرباحچەنىڭ» ويىنشىسى بولعان ميروسلاۆ ستوح قازىر «سلاۆيانىڭ» ساپىندا.
وسىدان ەكى جىل بۇرىن قازاقستان ۇلتتىق قۇراماسىمەن بىرگە پلزەندەگى چەحيا-قازاقستان ويىنىنا بارعان ەدىم. ول ماتچ تا قازىر كوز الدىمدا. 75-مينۋتقا دەيىن جەڭىپ تۇردىق. الاڭعا الماسىپ كىرىپ, 2 گول سالىپ, سالىمىزدى سۋعا كەتىرگەن ميلان شكودا «سلاۆيانىڭ» ءبىر اتارى. 2004 جىلى قازاقستان قۇراماسى ۋەفا جالاۋىنىڭ استىندا العاشقى ويىنىن ۋكرايناعا قارسى وتكىزدى ەمەس پە؟ ءيا, ءدال سول تاريحي ماتچتا ءبىز سوڭعى سەكۋندتا گول جىبەرىپ, تەڭ ناتيجەدەن ايىرىلىپ قالدىق. گولدى رۋسلان روتان سوقتى. توماش نەتسيدتىڭ شەبەرلىگىنە دە شەك كەلتىرمەيمىز. ال حاليل التىنتوپ 2010 جىلى سيدەلنيكوۆتىڭ قاقپاسىنا عالامات گول سوققان حاميت التىنتوپتىڭ سىڭارى عوي.
جالپى, قاراپ وتىرساق, بارلىعى تاجىريبيەلى, وزدەرىنىڭ سپورتتىق عۇمىرلارىندا جوعارى ناتيجەلەرگە قول جەتكىزگەن اياقدوپشىلار.
1-تايم. كەزدەسۋ باستالىسىمەن قوس كوماندا بىردەن شابۋىل جاساۋعا اسىقپادى. ەكەۋى دە ەمىن-ەركىن پاس الماسىپ, وزدەرىنىڭ كىشىگىرىم دايىنداعان قيتۇرقى كومبيناتسيالارىن ىسكە اسىرىپ كورگىسى كەلدى. الايدا سونداي ءبىر عالامات شابۋىلداردى كورە المادىق. ويىننىڭ 25-مينۋتىنا قاراي ءبىزدىڭ قاقپامىزدىڭ الدىندا بۇرىشتامالار كوبەيىپ, قاۋىپتى ساتتەر پايدا بولا باستادى. «سلاۆيا» قاقپاشىسى يان لاشتۋۆكا توڭعاننان بولار, دەنە قىزدىرىپ, ءارلى-بەرلى جۇگىرىپ ءجۇردى.
ال 38-مينۋتتان باستاپ شابۋىلعا شىعا باستاعان ەلوردالىقتار ستاندارتتى جاعداي ورىنداۋعا مۇمكىندىك الدى. ايىپ الاڭىنا كوتەرىلگەن پاس بايقاۋسىزدا مارين ءانيچيچتىڭ الدىنا كەلە قالدى. قورعاۋشىمىز بوس قاقپاعا گول سوقتى. الايدا قاپتالداعى تورەشى وفسايد جاعدايى بولعاندىعىن كورسەتتى. دەگەنمەن, باس تورەشى انيچيچكە دوپتىڭ توماش نەتسيدكە ءتيىپ كەلگەنىن انىق كورىپتى. اقىلداسا كەلە, سالىنعان گولدىڭ ءادىل بولعانىن ءبىلدىرتتى. تابلوداعى كورسەتكىش – 0:1.
2-تايم. ەكىنشى تايم باستالىسىمەن «سلاۆيا» شابۋىلعا شىقتى. ال قازاقستاندىقتار قورعانىسقا باسا كوڭىل ءبولىپ, اراگىدىك قارىمتا شابۋىلدارعا يەك ارتىپ وتىردى. 78-مينۋتقا دەيىن قاقپاشىمىز نەناد ەريچ ۋاقىت سوزعاندىقتان, سارى قاعاز الدى. ودان ءارى قاپتاعان بۇرىشتامالار دەگبىرىمىزدى قاشىردى. قورعاۋشىلارىمىز شابۋىلداردى ءبىرىنىڭ ارتىنان ءبىرىن قايتارىپ جاتتى.
ورتادا جۇرگەن سەرىكجان مۇجىقوۆتىڭ ورنىنا ستانيمير ستويلوۆ قورعاۋشى سەرگەي مالىيدى شىعاردى. بويى ۇزىن ورتالىق قورعاۋشى كومانداعا اۋاداي قاجەت ەدى. الاڭ جيەگىندە ستويلوۆتىڭ كومەكشىسى گريگوري بابايان 80-مينۋتتان باستاپ بايىز تاۋىپ وتىرا المادى. اياقتان تىك تۇرىپ, شاكىرتتەرىنە اقىل-كەڭەس ايتۋمەن بولدى. جۇيكەنى توزدىرعان سوڭعى 10 مينۋت عاسىردان دا ۇزاققا سوزىلعانداي كورىندى.
تورەشىنىڭ سوڭعى ىسقىرىعى قازاقستاندىق كلۋبتى پلەي-وفف ساتىسىنا الىپ شىقتى. قازاقستان فۋتبولىنىڭ تاريحىنا ەنەتىن بۇل ويىندى تريبۋنادا تولقىپ وتىرىپ كورگەن مەندە دە ارمان جوق, قازاق فۋتبولىنىڭ جانكۇيەرلەرىندە دە ارمان جوق. العا, «استانا», العا قازاقستان!
ەرمۇحامەد ماۋلەن,
«ەگەمەن قازاقستان»
