وبلىستىق باسقارمالاردىڭ مەملەكەتتىك قىزمەتكەرلەرى اراسىنداعى بيليارد ويىنىندا بارلىعى 7 كوماندا جارىس جولىنا شىقتى. اتالمىش سپورت تۇرىنەن باسقارما باسشىلارى دا شەت قالمادى. اتاپ ايتساق, شىعىس قازاقستان وبلىسىنىڭ دەنە شىنىقتىرۋ جانە سپورت باسقارماسىنىڭ باسشىسى اسقار موجانوۆ, شقو جولاۋشى كولىگى جانە اۆتوموبيل جولدارى باسقارماسىنىڭ باسشىسى مۇرات مۇساتاەۆ, شقو ىشكى ساياسات باسقارماسى باسشىسىنىڭ ورىنباسارى سەرىك جەڭىسوۆ, سونداي-اق, شقو جەر قاتىناستارى باسقارماسى باسشىسىنىڭ ورىنباسارى ەرلان كارحۋنوۆ ءوز قابىلەتتەرىن بيليارد باسەكەسىندە سىناپ كوردى.
ويىن اينالمالى جۇيە بويىنشا ءوتتى. سايىسقا تۇسكەن مەملەكەتتىك قىزمەتكەرلەر ەكى توپقا ءبولىنىپ, ءوز توبىنان الدىڭعى ەكى ورىن العان كوماندالار جۇلدە ءۇشىن تالاس جۇرگىزدى. جارىس قورىتىندىسى بويىنشا شقو دەنە شىنىقتىرۋ جانە سپورت باسقارماسى, شقو جەر قاتىناستارى باسقارماسى, شقو مەملەكەتتىك ساتىپ الۋ جانە كوممۋنالدىق مەنشىك باسقارماسى بىرىككەن قۇراماسى جەڭىمپاز اتاندى. شقو ىشكى ساياسات باسقارماسى جۇلدەلى 2 ورىننان كورىنسە, شقو جەردىڭ پايدالانىلۋى مەن قورعالۋىن باقىلاۋ باسقارماسىنىڭ مەملەكەتتىك قىزمەتكەرلەرى 3 ورىنعا قول سوزدى.
ماراپاتتاۋ ءراسىمىنىڭ سوڭىنا قاراي تورەشىلەر تاراپى شقو دەنە شىنىقتىرۋ جانە سپورت باسقارماسىنىڭ باسشىسى اسقار موجانوۆقا بيليارد ويىنىنا قولداۋ تانىتقانى ءۇشىن ارنايى سىيلىق تابىس ەتتى.
ازامات قاسىم,
«ەگەمەن قازاقستان»
وسكەمەن
