جاستار اكتسياعا «قۋىرشاق چەللەندج » دەگەن ەرەكشە فلەشموب دايىندادى. ولار وزدەرى مانەكەن سەكىلدى تۇرىپ, كوپشىلىكتىڭ كوز الدىنا تۇرمىستاعى زورلىق كورگەن ايەلدىڭ كەيپىن ەلەستەتتى. ستۋدەنتتەردىڭ ويلاعان ءىسىن جۇزەگە اسىرۋعا «سالاۋاتتى ءومىر سالتى» ورتالىعىنىڭ پسيحولوگتارى, وبلىستىق ىشكى ىستەر دەپارتامەنتىنىڭ ايەلدەردى زورلىق-زومبىلىقتان قورعاۋ توبىنىڭ جانە ل.تولستوي اتىنداعى وبلىستىق امبەباپ كىتاپحانانىڭ قىزمەتكەرلەرى كومەككە كەلدى. فلەشموب وبلىستىق كىتاپحانادا ۇيىمداستىرىلدى, ستۋدەنتتەر كەلۋشىلەرگە, كوشەدەگى جۇرگىنشىلەرگە «قورعاۋعا قادام جاسا» اتتى بۋكلەتتەر تاراتتى.
«زورلىق-زومبىلىقسىز 16 كۇن» اكتسياسى ەلىمىزدىڭ بارلىق جەرىندە وتەدى. وتباسىلارىندا بولىپ جاتاتىن كەلەڭسىز كورىنىستەرگە ءتوزىمسىز قاراۋ ءۇشىن كۇن سايىن ءتۇرلى شارالار وتكىزەمىز. كوللەدج ستۋدەنتتەرى ءبىزدىڭ باستامانى قولداپ, وزدەرىنىڭ فلەشموبىن وتكىزدى. ولار ۇيىمداستىرعان «قۋىرشاق چەللەندج» بويىنشا بەتتەرىن گريم ارقىلى كوكالا تورعايداي تاياق جەگەن سەكىلدى ەتىپ بوياعان جاستار كوشەدە كەلە جاتىپ, بىردەن ءجابىر كورگەن ايەلدىڭ تۇرىنە ەنىپ, قۋىرشاقتاي تاس بولىپ تۇرىپ قالادى. مۇنىڭ بارلىعى ءتۇسىرىلىپ, عالامتور ارقىلى تاراتىلادى» دەيدى وبلىستىق ىشكى ىستەر دەپارتامەنتىنىڭ قىزمەتكەرى, پوليتسيا كاپيتانى گاۋحار حايرۋللينا. كامەراعا تۇسىرىلگەن فلەشموب «زورلىق-زومبىلىقسىز 16 كۇن» دەگەن اتپەن عالامتوردا تاراتىلادى. بۇل اكتسياعا, ەڭ باستىسى قوعامداعى كەلەڭسىز كورىنىسكە جۇرت نازارىن كوبىرەك اۋداراتىن بولادى.
ءنازيرا جارىمبەت,
«ەگەمەن قازاقستان»
قوستاناي
