«ەلباسى ايتقانداي دارىندى جاستار - ول ەلىمىزدىڭ بولاشاعى جانە الەۋەتى. جاستار ماسەلەسى, ساياساتى, ولاردى جۇمىس ورىندارىمەن قامتاماسىز ەتۋ, جاستاردىڭ الەۋەتىن اشۋ, تالانتىن كورسەتۋگە مۇمكىنشىلىك جاساۋ ارقاشان دا ەلباسىنىڭ جانە ەل ۇكىمەتىنىڭ نازارىندا. «دارىن» سىيلىعى بۇرىن ەكى جىلدا ءبىر رەت بەرىلگەن بولسا, بيىلعى جىلدان باستاپ جىل سايىن بەرىلەتىن بولادى. ول دا بارلىعىمىزدىڭ ورتاق جەتىستىگىمىز دەپ ويلايمىن. ونىڭ ۇستىنە ول مەملەكەتتىڭ جانە ۇكىمەتتىڭ جاستارعا نازار اۋدارۋىنىڭ كورىنىسى», - دەدى سىيلىق يەلەرىن ماراپاتتاۋ راسىمىندە قازاقستان رەسپۋبليكاسى ءدىن ىستەرى جانە ازاماتتىق قوعام ءمينيسترى نۇرلان ەرمەكباەۆ.
سىيلىق 10 نوميناتسيا بويىنشا - ادەبيەت, عىلىم, بەينەلەۋ ونەرى, جۋرناليستيكا, كلاسسيكالىق مۋزىكا, قوعامدىق قىزمەت, سپورت, تەاتر جانە كينو, ەسترادالىق ونەر, حالىق شىعارماشىلىعى سالاسىندا ۇزدىك دەپ تانىلعان جاستارعا تابىستالدى. وسىلايشا, «سپورت» نوميناتسياسى بويىنشا قازاقستاندىق مانەرلەپ سىرعاناۋشى دەنيس تەن جانە ايەلدەر اراسىنداعى حالىقارالىق گروسسمەيستەر, ءتورت دۇركىن الەم چەمپيونى دينارا سادۋاقاسوۆا جەڭىمپاز دەپ تانىلدى. «ەسترادا» نوميناتسياسى بويىنشا قازاق ەستراداسىنىڭ ءانشىسى سەرىك يبراگيموۆ پەن قازاق ۇلتتىق ونەر ۋنيۆەرسيتەتىنىڭ ستۋدەنتى رۇستەم جۋگىنىسوۆ ماراپاتقا يە بولدى.
«كلاسسيكالىق مۋزىكا» نوميناتسياسى بويىنشا «Young Eurasian Soloists» كامەرالىق وركەسترىنىڭ ءسوليسى شەرنياز مۇساحان مەن «استانا وپەرا» ۇلتتىق وپەرا جانە بالەت تەاترىنىڭ ءانشىسى ماريا مۋدرياك «دارىن» سىيلىعىن يەلەندى. «حالىق شىعارماشىلىعى» نوميناتسيا بويىنشا ايتىسكەر اقىن سىرىم اۋەزحان جانە قازاق ۇلتتىق ونەر ۋنيۆەرسيتەتىنىڭ وقىتۋشىسى داۋلەتحان سارتاي ماراپاتتالدى. «ادەبيەت» نوميناتسياسىندا اقىن دينارا مالىكوۆا, «اق جول» دەموكراتيالىق پارتياسىنىڭ يدەولوگيالىق جۇمىسى ءبولىمىنىڭ كەڭەسشىسى ەلدوس توقتارباەۆتىڭ ەڭبەگى ۇزدىك دەپ تانىلدى.
«تەاتر جانە كينو» نوميناتسياسى بويىنشا گ.مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر تەاترىنىڭ اكتريساسى دينارا ابدۋللينا جانە «استانا وپەرا» مەملەكەتتىك وپەرا جانە بالەت تەاترىنىڭ بالەت ترۋپپاسىنىڭ جەتەكشى ءسوليستى باقتيار ادامجان «دارىن» سىيلىعىنىڭ لاۋرەاتتارى اتاندى. «جۋرناليستيكا» نوميناتسياسى بويىنشا Atameken Business Channel ارناسىنىڭ «باستى تاقىرىپ» باعدارلاماسىنىڭ جۇرگىزۋشىسى ەربولات مۇحامەدجانوۆ جانە «رەسپۋبليكالىق راديو» جشس جاڭالىقتار قىزمەتىنىڭ رەداكتور-جۇرگىزۋشىسى الىبەك ءابدىلوۆ جەڭىس تۇعىرىنان كورىنە ءبىلدى.
«ديزاين جانە بەينەلەۋ ونەرى» نوميناتسياسى بويىنشا «دارىن» سىيلىعى قازاق ۇلتتىق ونەر ۋنيۆەرسيتەتىنىڭ ستۋدەنتى نۇربولات اسقار مەن اباي اتىنداعى جامبىل گۋمانيتارلىق كوللەدجىنىڭ وقىتۋشىسى, ءارى وڭ قولىنان ونەر تامعان زەرگەر حاليەۆ بەرىك جۇماعالي ۇلىنا بەرىلدى. «قوعامدىق قىزمەت» نوميناتسياسى بويىنشا «دارىن» سىيلىعى «جاس وتان» جاستار قاناتىنىڭ حاتشىلىعىنىڭ باسشىسى داۋلەت كارىبەككە جانە اتىراۋ وبلىسىنداعى «قازاقستان-2050» جالپىۇلتتىق قوزعالىسىنىڭ ۇيىمداستىرۋشىسى يلياس قونىسباەۆقا تابىستالدى. «عىلىم» نوميناتسياسى بويىنشا قورقىت اتا اتىنداعى قىزىلوردا مەملەكەتتىك ۋنيۆەرسيتەتىنىڭ جەتەكشى مامانى نۇرعالي اقىلبەكوۆ, سونداي-اق ل.ن.گۋميلەۆ اتىنداعى ەۇۋ-ءنىڭ عىلىمي توبى -يليا كورولكوۆا جانە دميتريا شليماس ۇزدىك دەپ تانىلدى. بارلىق جەڭىمپازدارعا قازاقستان رەسپۋبليكاسى ۇكىمەتىنىڭ قاۋلىسىمەن «2017 جىلعى دارىن مەملەكەتتىك جاستار سىيلىعىنىڭ لاۋرەاتى» اتاعى بەرىلدى, جانە ولار ديپلوممەن, توسبەلگىمەن جانە اقشالاي سىيلىقتارمەن ماراپاتتالدى.
