قۋات اۋەسباي جامبىل وبلىسىنىڭ تۋماسى. ول ءال-فارابي اتىنداعى قازاق ۇلتتىق ۋنيۆەرسيتەتىنىڭ جۋرناليستيكا فاكۋلتەتىن ءتامامداپ, ەۋرازيا ۇلتتىق ۋنيۆەرسيتەتىنىڭ ماگيسترانتى اتانعان. العاش قىزمەت جولىن «انا ءتىلى» رەسپۋبليكالىق گازەتىندە ءتىلشى بولىپ باستاعان جۋرناليست رەسپۋبليكالىق «اق جەلكەن», «حالىق ءسوزى», «ۇلتتىق مۋزەي» باسىلىمدارىندا باسشىلىق قىزمەت اتقارعان. 2015-2017 جىلدار ارالىعىندا «استانا نيۋس» جشس ديرەكتورى, «اتىراۋ اقپارات» مەديا حولدينگى ديرەكتورىنىڭ ورىنباسارى قىزمەتتەرىن اتقاردى.
قۇرىلتايشىلاردىڭ ورتاق شەشىمىمەن تاعايىندالعان ءجۋرناليستى گازەت ۇجىمىنا وبلىستىق ىشكى ساياسات باسقارماسىنىڭ باسشىسى عاليا بورانباەۆا تانىستىردى. تۋعان جەرگە ەڭبەك ەتۋگە بىلەك سىبانا كەلگەن قوعام بەلسەندىسى, كرەاتيۆتى ازاماتتىڭ وبلىستىڭ باس گازەتىن العا جەتەلەۋگە مۇمكىندىگى مول. «وتە قۋانىشتىمىن. وبلىستىڭ باس گازەتىنە, تالاي مارعاسقالاردىڭ تابانىنىڭ ءىزى, قولىنىڭ تابى قالعان قارا شاڭىراققا كەلىپ, قىزمەت ەتۋ, وزدەرىڭىزبەن قاۋىشۋ ۇلكەن مارتەبە, ۇلكەن جاۋاپكەرشىلىك. سول سەنىمنىڭ, سول جاۋاپكەرشىلىكتىڭ ۇدەسىنەن وزدەرىڭىزبەن بىرگە شىعامىز دەپ ويلايمىن», دەدى جامبىل وبلىستىق «Aq Jol» گازەتىنىڭ ديرەكتور-باس رەداكتورى قۋات اۋەسباي.
ەسكە سالا كەتسەك, «اق جول» - وبلىستىق گازەتى 1922 جىلدىڭ 1 مامىرىنان باستاپ سول كەزدەگى اۋليەاتا ۋەزدىك كەڭەس اتقارۋ كوميتەتىنىڭ ورگانى «ۆولنايا بەدنوتا» گازەتىنىڭ قوسىمشاسى رەتىندە «كەدەي ەركى» دەگەن اتپەن شىعا باستاعان. ول توتە جازۋمەن 300 دانا بولىپ تارادى. 1924 جىلى تامىز ايىنان «ەڭبەك» دەگەن اتاۋعا يە بولىپ, دەربەس باسىلىم رەتىندە شىعا باستادى. كەيىنەن «ديحان داۋىسى», «كولحوزشى», «كولحوز جولى» دەگەن اتپەن جارىق كوردى. 1939 جىلى جامبىل وبلىسىنىڭ قۇرىلۋىنا بايلانىستى وبلىستىق گازەت بولىپ قايتا قۇرىلىپ, «كوممۋنيست» اتاۋىن يەلەندى. 1944 جىلى «ستاليندىك جول», 1958 جىلى «ەڭبەك تۋى», 1990 جىلى «اق جايىق» اتاندى.
