اتالعان وقۋ ورنىنىڭ سانجار اسفەندياروۆتىڭ ەسىمىمەن اتالاتىنىنان كوپشىلىك xاباردار بولعانىمەن, بۇل باستامانىڭ قالاي جۇزەگە اسىرىلعانىن ەكىنىڭ ءبىرى بىلە بەرمەيدى. سول سەبەپتى وسى وقيعاعا بايلانىستى ءوزىم كۋا بولعان ەكى جايتتى بايانداعىم كەلەدى.
ءبىرىنشى وقيعا 1987 جىلدىڭ كۇز ايلارىندا بولدى. مەن ول كەزدە ينستيتۋتتىڭ 4-كۋرسىندا وقيتىنمىن. ستۋدەنتتەر كاسىپوداعىنىڭ توراعاسى قىزمەتىن قوسا اتقاراتىندىقتان, عىلىمي كەڭەسكە مۇشە ەدىم. ۇلكەن جيىن ءوتىپ, وعان بارلىق فاكۋلتەت دەكاندارى جانە كافەدرا مەڭگەرۋشىلەرى تولىق شاقىرتىلدى. سول باسقوسۋدا وقۋ ورنىنىڭ رەكتورى ە.بەلوزەروۆ بىرنەشە ەڭبەك ارداگەرىنەن مينيسترلىككە س.اسفەندياروۆتىڭ ەسىمىن اتالمىش وقۋ ورنىنا بەرۋىن سۇراعان حاتتىڭ تۇسكەنىن مالىمدەدى. مينيسترلىكتەگىلەر وسى xاتتى تالقىلاۋ ءۇشىن ينستيتۋتقا جىبەرگەن. تالداۋ توتاليتارلىق جۇيەدە قالىپتاسقان ۇردىسكە ساي ءجۇردى. «وقۋ ورنىنا ەسىمى بەرىلەتىندەي اسفەندياروۆتىڭ قانداي ەڭبەگى ءسىڭدى؟» دەگەن «سۋىق» سۇراۋعا ستوماتولوگيا فاكۋلتەتىنىڭ دەكانى جانىبەك نالىباەۆ بۇلتارتپاس دالەل ايتىپ, ەردىڭ ەڭبەگىن ءتىزىپ شىققانمەن, وعان سەلت ەتكەن ەشكىم بولمادى. اشىق داۋىسقا سالعاندا دا س.اسفەندياروۆ ەسىمى بەرىلمەيتىن بولىپ شەشىلدى.
زىرعىپ ۋاقىت ءوتىپ جاتتى. 1989 جىلدىڭ ناۋرىزى بولاتىن. بۇل جولى تالقىلاۋدى وتكىزۋ ينستيتۋتتىڭ ۇلكەن عىلىمي كەڭەسىنىڭ ەنشىسىنە ءتيدى. الگى رەكتور مينيسترلىكتىڭ نۇسقاۋىمەن س.اسفەندياروۆتىڭ ەسىمى ينستيتۋتقا بەرىلسىن دەگەن حابار كەلگەنىن باياندادى. ەندىگى شەشىم – مۇعالىمدەر مەن پروفەسسورلاردىڭ جانە ستۋدەنتتەردىڭ قولداۋىنا تاۋەلدى.
ول كەزدە ءوزىن-ءوزى باسقارۋ جۇيەسى ىسكە اسىپ جاتقان. ۇلكەن كەڭەسكە 11 ستۋدەنت مۇشە بولاتىن. پروفەسسور, بالالار دارىگەرلەرى فاكۋلتەتىنىڭ دەكانى بولىپ جاڭادان سايلانعان ك.ورمانتاەۆتىڭ جيىندا تالداۋ تۋرالى اڭگىمەنىڭ كەرەك ەمەسىن, «داۋىس بەرۋ» ءادىسىنىڭ ءتىپتى ەرسى بولاتىنىن ايتقانى كوپشىلىككە سەڭ بۇزىلعانداي اسەر ەتكەنىمەن, كەلەسى ءبىر «ساڭلاقتى» كۇتەيىك دەگەندەر دە بولدى. دەگەنمەن اڭگىمە جاقسىلىققا بۇرىلدى دا, «جاسىرىن داۋىس» بەرۋ تۋرالى شەشىم قابىلداندى. قىزىق جاعداي داۋىستىڭ شەشىمىن حابارلاعان شاقتا ورىن الدى. ويتكەنى اسفەندياروۆتى جاقتاپ داۋىس بەرگەندەر ەكى-اق ادامعا ارتىق ءتۇسىپتى. 29-ى قولداعان, 27-ءسى قارسى. العاش دەنساۋلىق ساقتاۋ مينيسترلىگىن باسقارعان, الماتى مەديتسينالىق ينستيتۋتىن اشۋعا وراسان ەڭبەگى سىڭگەن تۇلعانىڭ ەسىمى وسىنداي اۋرە-سارساڭمەن ازەر ەلەنگەن ەدى.
مۇرات بەرداليەۆ,
«جۇيكە اۋرۋلار ينتەرنات ءۇيىنىڭ» ديرەكتورى
جامبىل وبلىسى
