32 جاستاعى ويىنشى بۇل اتاققا وسىعان دەيىن 2008, 2013, 2014 جانە 2016 جىلدارى قول جەتكىزگەن بولاتىن. «التىن دوپ» سانى بويىنشا ول ەندى «بارسەلونا» شابۋىلشىسى ليونەل مەسسيمەن تەڭەستى.
كريشتيانۋ رونالدۋ بيىل «رەال» كومانداسىمەن بىرگە يسپانيا چەمپيونى اتانىپ, چەمپيوندار ليگاسىندا ەكىنشى جىل قاتارىنان توپ جاردى. سونداي-اق, ۋەفا سۋپەركۋبوگى مەن يسپانيا سۋپەركۋبوگىنە قول جەتكىزدى. مادريدتىكتەر ساپىندا 44 ويىنعا قاتىسىپ, 38 گولدىڭ جانە 9 ناتيجەلى پاستىڭ اۆتورى اتاندى. ال چەمپيوندار ليگاسىنىڭ وتكەن ماۋسىمىندا 12 گول سالىپ, ۇزدىك سۇرمەرگەندەر تىزىمىندە كوش باستاعان بولاتىن.
پورتۋگاليا ۇلتتىق قۇراماسىمەن بىرگە ىرىكتەۋ كەزەڭىندە ءوز توبىن 1-ورىنمەن اياقتاپ, 2018 جىلعى الەم چەمپيوناتىنا جولداما الدى. قۇراما ساپىندا بيىل 11 ويىندا 11 گول سوعىپ, 4 ناتيجەلى پاس شىعاردى.
«رەال» شابۋىلشىسى بيىل ۋەفا نۇسقاسى بويىنشا ەۋروپانىڭ ۇزدىك ويىنشىسى اتانعان بولاتىن. ايتا كەتەرلىك تاعى ءبىر جايت, وسى ماۋسىمدا رونالدۋ چەمپيوندار ليگاسىندا كەزەكتى رەت رەكورد جاڭارتتى. ول توپتىق كەزەڭدەگى التى كەزدەسۋدىڭ بارىندە گول سوققان العاشقى ويىنشى اتاندى.
ەسكە سالا كەتەيىك, «التىن دوپ» جۇلدەسىن 2016 جىلدان باستاپ France Football باسىلىمى قايتا تابىستايتىن بولدى. ال 2009-2015 جىلدارى بۇل فيفا-نىڭ قۇزىرەتىندە بولعان. France Football ۇزدىك ويىنشى جۋرناليستەردىڭ داۋىس بەرۋى ارقىلى انىقتايدى.
