جەر شارىنىڭ ەڭ مىقتى گىر كوتەرۋشىلەرى جينالعان سەۋلدەگى الەمدىك چەمپيوناتتا كوكشەتاۋلىق اقساقال 74 جاستاعى سپورتشى ارداگەرلەر اراسىندا توپ جاردى. 70-74 جاس ارالىعىندا ونەر كورسەتكەن بوريس اقساقال بويىندا رۋح پەن نامىستىڭ قىزۋى بار ەكەنىن بىلەكتىڭ كۇشىمەن دالەلدەدى. اسىرەسە گىردى سىلكە كوتەرۋدەن الەمدەگى ەڭ مىقتى سپورتشى ەكەنىن كورسەتتى. زىلدەي تەمىردى كوتەرۋدىڭ قىر-سىرىن جاقسى مەڭگەرگەن ب.نۇعمانوۆ ءوز ماشىعىنىڭ سىرىمەن بىلايشا ءبولىستى: «گىر كوتەرۋدىڭ بۇل تۇرىندە الدىمەن ونى كوتەرىپ كەۋدەگە تىرەيمىز دە, ارتىنان جوعارى سەرمەيمىز, 1-2 سەكۋند ۇستاپ تۇرىپ, قايتادان كەۋدەگە اكەلەمىز دە تومەن سىرعىتامىز. وسىلايشا قايتالاي بەرەمىز».
ارينە ايتۋعا وڭاي, ال 500 سپورتشى قاتىسقان ايتۋلى دودادا جەڭىپ شىعۋ وڭاي بولماعانى انىق. ويتكەنى قىزۋ جارىستا قوس سايىس بويىنشا باق سىناسقان بوريس اقساقال ەكىنشى ورىندى قاناعات تۇتىپتى. بۇل رەتتە اتلەت 2008 جىلدان بەرى ارداگەرلەر سايىسىنا بەلسەندى قاتىسىپ كەلەدى. ءسوز رەتى كەلگەندە ايتا كەتۋ كەرەك, ۇستىمىزدەگى جىلدىڭ قازانىندا وتكەن قازاقستاننىڭ جاتىپ سىعىمداۋ چەمپيوناتىندا دا جەڭىمپاز بولعان ەدى. مىنە, ەندى, الەمدىك دودادا توپ جارىپ وتىر. ەلگە ورالا سالىسىمەن بوريس اقساقال كەلەسى جىلدىڭ مامىرىندا بۋداپەشت قالاسىندا وتەتىن ەۋروپا چەمپيوناتىنا دايىندىقتى باستاپ تا جىبەردى.
اسقار تۇراپباي ۇلى,
«ەگەمەن قازاقستان»
اقمولا وبلىسى
