شىعارماشىلىق كەشكە ۇلتتىق مادەني ورتالىقتاردىڭ وكىلدەرى, جوعارى وقۋ ورىندارىنىڭ وقىتۋشىلارى مەن ماسكەۋدە ءبىلىم الىپ جاتقان قازاق ستۋدەنتتەرى قاتىسقان.
ساحنا تورىندە اقىننىڭ ولەڭدەرى وقىلىپ, قازاقستاننىڭ ەڭبەك سىڭىرگەن قايراتكەرى, ءانشى ساۋلە جانپەيىسوۆا جانە تانىمال ءانشى روزا القوجا سىندى انشىلەردىڭ ورىنداۋىندا بىرنەشە ءانى شىرقالدى, كەشكە اقىننىڭ قىزدارى سالتانات, ماحاببات, قۇسني, اينار قاتىستى.
«بايتاق مەكەنىم» قوعامدىق قورىنىڭ توراعاسى ءسابيت توقىمبەتوۆتىڭ ايتۋىنشا, اقىننىڭ شىعارماشىلىعىن زەرتتەۋدى قولعا الۋ ماقساتىندا وتكەن جىلى 22 اقپاندا اقتاۋ قالاسىندا باستاۋ العان «اتا جۇرتىن اڭساعان ايبەرگەنوۆ» اتتى ءبىرىنشى عىلىمي-تەوريالىق كونفەرەنتسيا وتكىزىلىپ, سول جىلى قازان ايىنىڭ 14-ءشى جۇلدىزىندا شىمكەنت قالاسىندا ءبىر توپ كاسىپكەرلەردىڭ قولداۋىمەن «تولەگەن ايبەرگەنوۆ اڭساعان الەم» اتتى حالىقارالىق عىلىمي-تاجىريبەلىك كونفەرەنتسيامەن جانە جازۋشىلار وداعىنداعى ادەبيەتشىلەر ۇيىندە «تولەگەن ايبەرگەنوۆ پوەزياسى جانە قازىرگى زامان» اتتى ءۇشىنشى حالىقارالىق عىلىمي-تاجىريبەلىك كونفەرەنتسيامەن جالعاسقان. اقتاۋ مەن شىمكەنتتە وتكەن كونفەرەنتسيانىڭ ماتەريالدارى كىتاپ بولىپ شىقسا, الماتىدا وتكەن كونفەرەنتسيا تۋرالى تولىققاندى ماعلۇمات جۋىق ارادا جاڭا كىتاپ بولىپ شىعادى دەپ كۇتىلۋدە.
اقىننىڭ 80 جىلدىعىنىڭ قورىتىندى كەشى استانا قالاسىندا بيىل 22 جەلتوقساندا وتەدى دەپ جوسپارلانىپ وتىر.
– تولەگەن ايبەرگەنوۆتىڭ ەسىمى ەل جادىندا ماڭگى ساقتالىپ قالارى ءسوزسىز. قاي قالاعا بارساق تا, اقىنعا دەگەن قۇرمەت ەرەكشە. وسىنداي اۋقىمدى شارا بيىل اقتوبە وبلىسى, بايعانين اۋدانىندا وتكەن ەدى. سونىمەن قاتار, بەسقالانىڭ نوكىس قالاسىنداعى بەرداق اتىنداعى ۋنيۆەرسيتەتى مەن ءاجينياز اتىنداعى پەداگوگيكالىق ينستيتۋتىندا, اقىننىڭ كىندىك قانى تامعان «تاڭ نۇرى» اۋىلىندا دا شىعارماشىلىق كەش ءوتتى. شاراعا تانىمال اقىندار قاسىمحان بەگمانوۆ جانە باۋىرجان باباجان ۇلى مەن اقىننىڭ ۇرپاقتارى تۇگەل قاتىستى. بۇل رەتتە ايبەرگەنوۆتىڭ شىعارماشىلىعىن ناسيحاتتاۋدا قوڭىرات اۋدانىنداعى تولەگەن ايبەرگەنوۆ اتىنداعى ورتا مەكتەپ ديرەكتورى جەتكىزگەن سارسەنباەۆ دەگەن ازاماتتىڭ ەلەۋلى ۇلەس قوسقانىن ايتىپ وتكەنىمىز ءجون, دەيدى «بايتاق مەكەنىم» قوعامدىق قورىنىڭ توراعاسى ءسابيت توقىمبەتوۆ.
سونداي-اق, بەلگىلى بولعانداي اقىننىڭ كەيبىر ولەڭدەرى بۇعان دەيىن ورىس تىلىنە اۋدارىلسا, بيىل تۇركيالىق عالىم وعىز دوعان تۇرىك تىلىنە, بۇلبۇل ماتاي قىتاي تىلىنە, باحودير ۋبايدۋللاۋعلى وزبەك تىلىنە اۋدارۋدى قولعا العان. ال, الداعى ۋاقىتتا شىمكەنت قالاسىندا تولەگەن ايبەرگەنوۆ اتىنداعى عىلىمي-زەرتتەۋ ورتالىعىن اشۋ جوسپارلانىپ وتىر.
كوزى تىرىسىندە زاڭعار جازۋشى ءابىش كەكىلباەۆ ء«بىزدىڭ قولىمىزدا قالعان ءبىر-ەكى جۇقا كىتاپ – ت. ايبەرگەنوۆ تالانتىنىڭ شالقار دارياسى ەمەس, اساۋ ارنانىڭ باسى عانا ەدى. ونىڭ كوك تەلەگەي كول بولىپ شالقۋىن كورۋدى تاعدىر ءبىزدىڭ ماڭدايىمىزعا جازباپتى» دەسە, وزگە دە بەلگىلى اقىندار تولەگەن تۋرالى جاقسى لەبىزدەرىن ارناعان. ولەڭىمەن وزىنە ماڭگىلىك ەسكەرتكىش سوققان اقىن ەسىمى حالقىنىڭ جۇرەگىندە, ال ونىڭ ولەڭدەرى حالقىنىڭ جادىندا ساقتاۋلى كۇيىندە جۇرتىمەن بىرگە جاساپ كەلەدى.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى
