بيىل ەلىمىزدە 19 ميلليوننان استام قىزمەت كورسەتىلسە, ونىڭ 17 پايىزى e-gov پورتالى ارقىلى جۇرگىزىلدى. قىزمەت الۋشىلار بويىنشا ونلاين-دەرەكتەردىڭ جاڭارتىلۋى ازاماتتاردىڭ الەۋمەتتىك قۇقىعىن قامسىزداندىرۋدى مونيتورينگىلەۋگە جانە قاجەت بولعان جاعدايدا رەلەۆانتتى شەشىمدەر قابىلداۋعا مۇمكىندىك بەرەدى.
2017 جىلعى قازان ايىنان باستاپ بىرىڭعاي ەلەكتروندى ەڭبەك بيرجاسى ىسكە قوسىلدى. ەندى جۇمىس ىزدەۋشىلەر مەن جۇمىس بەرۋشىلەر ناتيجە بەرمەيتىن اڭگىمەلەسۋگە رەسۋرس شىعىندامايدى. بوس ورىندار مەن تۇيىندەمەلەر ءبىر جەردە ىڭعايلى فورماتتا جيناقتالعان. جۇمىس ىزدەۋشىلەر مەن جۇمىس بەرۋشىلەر اراسىنداعى قارىم-قاتىناس ەلەكتروندى فورماتقا كوشىرىلۋدە. وسىلايشا 2025 جىلعا قاراي جۇمىس ىزدەۋشىلەر ىشىندە (2,2 ميلليون) جۇمىسقا ورنالاسقانداردىڭ ۇلەسى ەكى ەسە ارتادى دەپ كۇتىلۋدە. جالپى, 1,5 اي ىشىندە بيرجا ارقىلى 15 مىڭ ادام جۇمىس تاپتى. بۇگىندە ەلەكتروندى بيرجادا 8 مىڭنان استام تۇيىندەمە جانە 30 مىڭنان استام بوس جۇمىس ورنى بار. سونىمەن بىرگە كەلەسى جىلى وعان 199 جۇمىسپەن قامتۋ ورتالىعى مەن 10-نان استام جۇمىسقا ورنالاسۋ جونىندەگى ينتەرنەت الاڭى قوسىلماق. بيرجا بازاسىندا ءوزىن-ءوزى جۇمىسپەن قامتىعان ادامدار ءۇشىن مەملەكەتتىك كىرىس ورگاندارىندا وڭايلاتىلعان تىركەلۋ تەتىگى ىسكە اسىرىلادى. جۇمىس بەرۋشىلەر مەن جۇمىسكەرلەردىڭ ەڭبەك شارتتارىن بىرىڭعاي ەسەپكە الۋ جۇيەسى ەنگىزىلەدى. ەلەكتروندى فورماتقا اۋىستىرىلعان ەڭبەك شارتى كىرىستەردى جالپىعا بىردەي دەكلاراتسيالاۋدى ەنگىزۋ ءۇشىن نەگىز بولماق.
مەملەكەتتىك الەۋمەتتىك ساقتاندىرۋ قورى جارنالارىنا تۇراقتى مونيتورينگ ارقىلى كاسىپورىنداردىڭ جالاقى جانە جۇمىسكەردىڭ بيۋدجەتتىك ەمەس قورلارعا مىندەتتى تولەمدەرى بويىنشا بەرەشەگىن ايقىنداۋ مۇمكىندىگى بار. ازىرگە بۇل اقپارات تەك اكىمدىكتەر مەن مەملەكەتتىك كىرىستەر كوميتەتىنە بەرىلدى.
تسيفرلاندىرۋ ءىسى مۇگەدەكتەردى الەۋمەتتىك قامسىزداندىرۋ جۇيەسىندە دە كەڭىنەن قولدانىلماق. مەديتسينالىق-الەۋمەتتىك ساراپتاما جۇرگىزۋ جونىندەگى كومپوزيتتىك قىزمەتكە كوشۋ جۇزەگە اسادى. ەندى ءتيىستى قىزمەتتى الۋ ءۇشىن ادام ءۇش ەمەس, ءبىر ۇيىمعا عانا جۇگىنەدى. كۋالاندىرۋ كەزىندە مۇگەدەك ادامنىڭ قاتىسۋى تالاپ ەتىلمەيدى, ول ءوتىنىشىن ەلەكتروندى تۇردە ە-gov ارقىلى بەرە الادى. ءوتىنىش ءوتىنىش بەرۋشىنىڭ اۋماعىنا قاراماستان تاۋەلسىز ساراپشىلار اراسىندا كەزدەيسوق ىرىكتەۋ ارقىلى بولىنەدى. وسىلايشا, ەلدە مەديتسينالىق-الەۋمەتتىك ساراپتاما كوميسسيالارى سانى قىسقارىپ, سىبايلاس جەمقورلىق كورىنىسى ازايادى. مۇگەدەكتەرگە قىزمەت پەن ءونىم بەرۋشىلەردى (شيپاجاي-ەمدەۋ ۇيىمدارى, الەۋمەتتىك قىزمەت كورسەتۋ ورتالىقتارى, تەحنيكالىق كومەكشى (ورنىن تولتىرۋشى) قۇرالدار ءونىم بەرۋشىلەرى) تاڭداۋ قۇقىعى بەرىلەتىن الەۋمەتتىك قىزمەت پورتالى قۇرىلادى. بۇل باسەكەلەستىك ورتا مەن كورسەتىلەتىن قىزمەت ساپاسىن ارتتىرماق. مەملەكەتتىك ساتىپ الۋ بارىسىندا اكىمشىلىك كەدەرگىلەردى جويۋ شاعىن جانە ورتا بيزنەستىڭ دامۋىنا مۋلتيپليكاتيۆتى اسەر ەتەدى.
سونداي-اق بۇرىنعى اتاۋلى الەۋمەتتىك كومەكتىڭ, بالالارعا بەرىلەتىن مەملەكەتتىك جاردەماقى مەن كوپ بالالى وتباسىلارعا كورسەتىلەتىن ارناۋلى مەملەكەتتىك كومەكتىڭ ورنىنا 2018 جىلعى 1 قاڭتاردان باستاپ جاڭا فورماتتاعى اتاۋلى الەۋمەتتىك كومەك ەنگىزىلەدى. ونى الۋ ءۇشىن جۇمىسپەن قامتۋ ورتالىقتارىنا جۇگىنۋگە بولادى.
دۋمان اناش,
«ەگەمەن قازاقستان»
