فوتو: تەمىربولات توقمامبەتوۆ
«تۇرعىنۇيقۇرىلىسجيناقبانكى» اق سالىمشىلارى مەن ورال قالاسىندا تۇرعىن ءۇي كەزەگىندە تۇرعان جاندارعا بەرىلگەن 9 قاباتتى ءۇي قۇرىلىسى «نۇرلى جەر» باعدارلاماسى اياسىندا سالىنعان. مەردىگەر «بولاشاق-ت» جشس – وڭىردە جاڭا تەحنولوگيانى يگەرىپ, ءۇي كومبيناتى ارقىلى پانەلدى تۇرعىن ءۇي قۇرىلىسىن جۇرگىزىپ باستاعان كومپانيا. نەمىس تەحنولوگياسى بويىنشا سالىنعان بۇل ۇيلەر جىلۋ ۇنەمدەگىش قاسيەتىمەن تۇرعىنداردىڭ كوڭىلىنەن شىققان.
– بيىل ءبىزدىڭ وڭىردە «نۇرلى جەر» باعدارلاماسى بويىنشا قالادا 14 كوپ قاباتتى ءۇي, اۋدان-اۋىلداردا 188 ءبىر قاباتتى ءۇي سالىنىپ جاتىر. بۇل 1700 وتباسى قونىس تويىن تويلايدى دەگەن ءسوز. جىل سوڭىنا دەيىن 1500 تۇرعىن جاڭا پاتەردىڭ كىلتىن قولىنا ۇستايدى. مۇنىڭ بارلىعى تاۋەلسىزدىكتىڭ, تۇراقتىلىقتىڭ, بىرلىگىمىزدىڭ ارقاسى. ەلباسى تاپسىرمالارىنىڭ ۋاقىتىلى ورىندالعانىنىڭ ناتيجەسى. وزدەرىڭىز بىلەسىزدەر, وسىدان بىرنەشە جىل بۇرىن ءدال وسى جەر بوس جاتقان دالا بولاتىن. ارا-تۇرا ات شاۋىپ, كوكپار تارتاتىن جەر ەدى عوي, – دەدى جاڭا پاتەرلەردىڭ كىلتىن تابىستاعان سالتاناتتى جيىندا باتىس قازاقستان وبلىسىنىڭ اكىمى التاي كولگىنوۆ.
2017 جىلى ورال قالاسى بويىنشا «نۇرلى جەر» باعدارلاماسىن جۇزەگە اسىرۋ بارىسىندا 10 857,195 ملن تەڭگە بولىنگەن ەكەن. ءوڭىر باسشىسى تۇرعىنۇيقۇرىلىسجيناقبانكىنىڭ باتىس قازاقستان وبلىسىنداعى سالىمشىلار سانى 54 مىڭنان اسقانىن ايتادى. «بۇل دەگەن ءالى وسىنشا ادام جاڭا پاتەر الۋدى جوسپارلاپ وتىر دەگەن ءسوز عوي. ونىڭ ۇستىنە قۇرىلىس بۇكىل ەكونوميكانىڭ لوكوموتيۆى سياقتى. ءۇي سالىنسا, وعان بەتون بۇيىمدارى كەرەك, كىرپىش كەرەك, ەسىك-تەرەزە كەرەك, پلاستيك قۇبىرلار قاجەت, جيھاز كەرەك. قانشا ادام قىزمەت ەتەدى, جالاقى الادى. قادىرلى جەرلەستەر, بۇگىنگى قۋانىش, جاڭا باسپانالارىڭىز قۇتتى بولسىن! الدا تاۋەلسىزدىك مەيرامى دا كەلە جاتىر. ول كەزدە دە قالامىزدا بىرقاتار نىساندار اشىلادى. مەرەكە قۇتتى بولسىن!» دەگەن وبلىس اكىمى جاڭا پاتەر يەلەرىنە كىلتتەردى تابىس ەتتى.
كەنجەگۇل قامىسپاەۆا تۇرعىنۇيقۇرىلىسجيناقبانكىنەن وسىدان ءۇش جىل بۇرىن ەسەپشوت اشقان ەكەن. ءوزى شىڭعىرلاۋ اۋدانى اقشات ەلدى مەكەنىندەگى اۋىل مەكتەبىندە تاريح ءپانىنىڭ مۇعالىمى.
– كونكۋرستان ەڭ الدىمەن ءوتىپپىن. ءۇش جىلدان بەرى قارجى سالىپ, مىنە, بۇگىن ءبىر بولمەلى پاتەرگە قولىم جەتىپ وتىر. بۇيىرسا, قالاعا كوشىپ كەلەمىن دەگەن جوسپارىم بار, – دەيدى كەنجەگۇل. كوپتەن كۇتكەن پاتەرى بيىك ءۇيدىڭ ەكىنشى قاباتىنان بۇيىرعانىنا ءدان ريزا.
ايتا كەتەيىك, بيىلعى تۇڭعىش پرەزيدەنت كۇنى تەرەكتى اۋدانىنىڭ پودستەپنوە اۋىلى تۇرعىندارىنىڭ دا ەسىندە قالاتىن بولدى. ورال قالاسىنىڭ ىرگەسىندە تۇرعان, ەرتەرەكتە ءمىناناي اتانعان ەلدى مەكەندە 10 مىڭنان اسا ادام تۇرادى. وسى اۋىلدا كوپتەن بەرى مəدەنيەت وشاعى سالىنباعان ەكەن. حالىقتىڭ سۇرانىسىنا وراي «نۇرلى جول» باعدارلاماسى اياسىندا قارجى ءبولىنىپ, مەردىگەر «التاير» جشس ەكى قاباتتى مادەنيەت ءۇيىنىڭ قۇرىلىسىن ۋاقىتىنان ەرتە ءبىتىرىپتى. قۇرىلىسقا جەرگىلىكتى بيۋدجەتتەن 319 ملن 628 مىڭ تەڭگە قارجى جۇمسالىپ, 50 ادام ەڭبەك ەتكەن. 300 ورىندىق كورەرمەن زالى بار بۇل مادەني وشاقتا بەس ۇيىرمە اشىلىپ, جەرگىلىكتى بالالاردى ءارتۇرلى ونەرگە باۋليتىن بولادى.
ءدال وسى كۇنى وبلىستىڭ تەرەكتى, ءبورلى, اقجايىق اۋداندارىندا بىرقاتار اۋىل تۇرعىندارى تازا اۋىز سۋ جۇيەسىن قولدانۋعا كوشتى. ال ورال قالاسىندا №4 جانە №6 شاعىن اۋداندار اراسىندا جاياۋ جۇرگىنشىلەرگە ارنالعان ادەمى ساياباقتى جول پايدالانۋعا بەرىلدى.
«بۇل بيىل قورىتىندىلاناتىن جۇمىستاردىڭ سوڭى ەمەس. الدا كەلەتىن ەلىمىزدىڭ ەڭ ۇلىق مەرەكەسى – تاۋەلسىزدىك كۇنىنە وراي دا بىرقاتار جاڭا نىساندار ىسكە قوسىلادى», دەيدى ءوڭىر باسشىسى التاي كولگىنوۆ.
قازبەك قۇتتىمۇرات ۇلى,
«ەگەمەن قازاقستان»
